Luka 1 - Baibuli Ekibono kya Katonda 2014

Okwinhama

¹ Abantu kamaala bageziizaaku nga bwe basobola okughandiika ebijiire nga bibaagho mu ife

² nga bwe baabitukobera, abaabiboneraku irala okuva mu mainhama, abeegeresa ekibono kya Katonda.

³ Isebo ow'ekitiisa Theofilo, zeena ni, nga mmaze okunoonereza byonabyona n'obwegendereza okuva ku ntoolo, kyambonekera nga kikalamu mbikughandiikire nga mbisengeike,

⁴ osobole okumanha obukakafu obw'ebibono bye wayegeresebwa.

Okuzaalibwa kwa Yoanne Omubatiza

⁵ Mu biseera bya Herode, kyabazinga wa Buyudaaya, ghaaligho kabona nga bamweta Zekaria, nga wa mu kikunsu kya Abiya. Ni mukazi we nga bamweta Elisabethi, nga mwidhukulu wa Aaroni.

⁶ Bombi baali batuufu mu maiso ga Katonda, nga bagema ebiragiro bya Musengwa byonabyona n'amateeka ge, nga tibasobyamu.

⁷ Aye baali baziraku mwana, kuba Elisabethi yali mugumba, era nga bombi emyaka gyali gibawoireku.

⁸ Lwali lulala, Zekaria bwe yali ng'ali ku mulimo gwe ogw'obwakabona mu maiso ga Katonda, mu lugobo olw'ekikunsu kye,

⁹ akalulu kaamugwaku okwingira mu isinzizo okuniosa obubbaani, ng'empisa ey'obwakabona bwe yali.

¹⁰ Abantu abeesoloza boonaboona baali ku luya nga basaba, mu saawa ey'okuniosa obubbaani.

¹¹ Agho malaika wa Musengwa yaaboneka, ng'ayemereire ku mukono omusaadha ogw'alutaari ey'okuniokezaaku obubbaani.

¹² Zekaria olwamubona yeezinduka era yaatya inho.

¹³ Aye malaika yaamukoba ati: “Zekaria otatya, kuba okusaba kwo kuwuliirwa era mukazi wo Elisabethi aidha kukuzaalira omwana omulenzi, omutuume eriina Yoanne.

¹⁴ Olifuna eisanhu era waasangaala era abantu kamaala balisagamba olw'okuzaalibwa kwe.

¹⁵ Kuba aliba mukulu mu maiso ga Musengwa era talinhwa mwenge gwa mizabbibu oba ekitamiiza kyonakyona. Aliidhuzibwa Mwoyo Mutukuvu ng'akaali mu nda ya inhina.

¹⁶ Abaana ba Isiraeli kamaala alibaiza ye Musengwa Katonda waibwe.

¹⁷ Alyembereramu Musengwa mu mwoyo n'amaani ng'oti n'Eliya bye yali nabyo, emyoyo gya badhaadha agiitukize mu baidhukulu, abadheemu abaize mu magezi ag'abatuufu, ateeregho atyo Musengwa abantu abeetegefu.”

¹⁸ Zekaria yaakoba malaika ati: “Ekyo ndikimanhira ku ki? Nze ndi mukaire, ni mukazi wange emyaka gimuwoireku.”

¹⁹ Malaika yaamwiramu ati: “Ninze Gaburieli ayemerera mu maiso ga Katonda, era ntumiibwa okwogera n'iwe nkukobere amawulire amalungi ago.

²⁰ Aye ni wulira kino: Oidha kuziba omunwa, obe nga toghanga kwogera okutuusa ku olwo bino lwe biribaagho kuba iwe toikiriza bibono byange, ebirituukirizibwa mu biseera byabyo.”

²¹ Abantu baali mu kulindirira Zekaria, era nga beewuunhia ekimulwisisaayo mu isinzizo.

²² Bwe yafuluma tiyasobola kwogera ye bali, agho baamanha nga ghaligho ekimubonekeire mu isinzizo. Yagezaaku okubamanhisa bye yayenda mu bumanhiso, yaasigala ng'omunwa guzibye.

²³ Agho olugobo lwe bwe lwawaaku, yairayo eka.

²⁴ Era ghaabita entangama ya nnaku ti nhingi, mukazi we Elisabethi yaatoola enda, era yaamala emyezi etaanu nga taidha mu bantu,

²⁵ ng'akoba ati: “Musengwa ati bw'ankoze, mu nnaku dh'aboine yamponia okuswala kwe mbaire nakwo mu bantu!”

Okuzaalibwa kwa Yesu

²⁶ Mu mwezi ogwomukaaga, Katonda yaatuma malaika Gaburieli mu kibuga eky'e Galilaaya, eriina lyakyo Nazarethi

²⁷ y'omughala omwegha, eriina lye Maria, eyali ayandhwire omusaadha ow'omu kika kya Daudi, eriina lye Yosefu.

²⁸ Malaika yaidha y'ali yaamukoba ati: “Emiraala gibe n'iwe, oli wa nkabi, Musengwa ali n'iwe!”

²⁹ Maria yaatabulwa inho, era yaalowoolereza inho ku kulamusa okwo kye kutegeeza.

³⁰ Aye malaika yaamukoba ati: “Maria otatya, Katonda akughaire omukisa.

³¹ Oidha kutoola enda ozaale omwana wa bulenzi, omutuume eriina Yesu.

³² Aliba mukulu era alyetebwa Mwana w'oyo Ali Ghaigulu Yeene. Musengwa Katonda alimugha ekityamo kya Daudi dhaadha we.

³³ Alifuga ekika kya Yakobo ebyanda n'ebyanda, era Obwakyabazinga bwe tibulikoma.”

³⁴ Maria yaakoba malaika ati: “Kiyinzika kitya ekyo, ate nga tiidhi musaadha?”

³⁵ Malaika yaamwiramu ati: “Mwoyo Mutukuvu aidha kukwikaku, n'amaani g'oyo Ali Ghaigulu Yeene gaidha kukuboghera, kyova ky'olizaala, ekitukuvu, kiryetebwa Mwana wa Katonda.

³⁶ Ate bona, Elisabethi ow'ekika kyo ali nda ya mwana mulenzi, mu bukaire bwe obwo. Era guno omwezi n'ogwomukaaga ogw'oyo ye baayetanga omugumba

³⁷ kuba mpaagho kirema Katonda.”

³⁸ Maria yaakoba ati: “Ndi ghano omugheereza wa Musengwa, ka kikolebwe nga bw'okobye.” Agho malaika yaavaagho, yaagolola.

Maria akyalira Elisabethi

³⁹ Ghaabitagho enaku ntono Maria yaasituka yaaja mangu mu kibuga eky'omu nsi ey'ensozi, mu Buyudaaya.

⁴⁰ Yangira mu ndhu ya Zekaria, yaalamusa Elisabethi.

⁴¹ Ekyabaagho: Elisabethi olwawulira Maria ng'amulamusa, omwana yeedhaga mu nda ye, Elisabethi yaidhula Mwoyo Mutukuvu

⁴² era yaaleekaanira ghaigulu ati: “Wagheebwa omukisa mu bakazi, n'omwana y'olinda yagheebwa omukisa!

⁴³ Kiviire kuki inhina Musengwa wange okwidha ye ndi?

⁴⁴ Kuba bona eno, amamiro agaanamwisa olungwire mu kutu, omwana yeedhaga mu nda yange.

⁴⁵ Weesiimye eyaikiririzaagho kuba Musengwa bye yakukoba birituukirira.”

Olwembo lwa Maria olw'okusaaka Katonda

⁴⁶ Maria yaakoba ati: “Omwoyo gwange gugulumiza Musengwa.

⁴⁷ Omwoyo gwange gusangaaliire mu Katonda omununuzi wange.

⁴⁸ Yalingirira obunafu obw'omugheereza we; kuba bona, okuva n'olwaleero ense dhoonadhoona dhiidha kundhetanga wa nkabi,

⁴⁹ olw'okuba ow'obukumu yankolera eby'amaani era eriina lye itukuvu.

⁵⁰ Ekisa kye ku bamutya kirigho ku nse n'ense.

⁵¹ Akoze eby'amaani n'omukono gwe, abeekuza mu birowoozo byaibwe yabasansaania.

⁵² Ab'obukumu yabaniinusa ku makonero, y'aniinia abanafu.

⁵³ Yaigusa abayala n'ebirungi, abakombe yaabaleka bwereere.

⁵⁴ Yayamba Isiraeli omugheereza we, ng'aidhukira ekisa kye:

⁵⁵ Nga bwe yakoba badhaadha baife, okukiraga Aburahamu n'eizaire lye ebyanda n'ebyanda.”

⁵⁶ Maria yaasigala ni Elisabethi okumala emyezi ng'esatu, memale yairayo ewuwe.

Okuzaalibwa kwa Yoanne Omubatiza

⁵⁷ Agho, ebiseera bya Elisabethi eby'okuzaala byatuuka, yaazaala omwana wa bulenzi.

⁵⁸ Baliraanwa be n'abekika kye bwe baawulira nga Musengwa amulaze ekisa ekyaga agho, baidha okumusanhukiraku.

⁵⁹ Bwe lwatuuka olunaku olwomunaana, beesoloza okukeketa omwana, era baaba bamutuuma eriina lya Zekaria, oti ni ise

⁶⁰ aye inhina yaabakoba ati: “Busa, aidha kwetebwa lya Yoanne.”

⁶¹ Baamukoba bati: “Aye mu kika kyo muzira ayetebwa liina eryo!”

⁶² Baakozesa obumanhiso, baabuuza ise eriina ly'ayenda bamwete.

⁶³ Yaabasaba akabaawo, yaaghandiika ati eriina lye ni Yoanne. Boonaboona beewuunhia inho.

⁶⁴ Mangu ago omunwa gwazibuka, olulimi lwasibulukuka, yaayogera era yaasaaka Katonda.

⁶⁵ Abantu abaali babaliinaine boonaboona baatya, era ebintu ebyo byayogerwaku woonawoona mu nsi ey'ensozi ey'e Buyudaaya.

⁶⁶ Era boonaboona abaabiwulira baabitereka mu myoyo gyaibwe, mule nga bwe beebuuza bati: “Kale omwana ono aliba ki?” Kuba bwenebwene omukono gwa Musengwa gwali nga gumuliku.

Olwembo lwa Zekaria

⁶⁷ Era ni ise Zekaria yaidhula Mwoyo Mutukuvu yaalanga ng'akoba ati:

⁶⁸ “Musengwa Katonda wa Isiraeli asaakibwe, kuba akyaliire abantu be era yaabanunula.

⁶⁹ Atufuniire amaani okutulokola mu ndhu ya Daudi omugheereza we.

⁷⁰ Nga bwe yayogerera mu batuukirivu be, abalanzi abaaligho eira,

⁷¹ ati aidha kutuwonia abazigu baife, era atuwonie n'omukono ogw'abatukyagha.

⁷² Alage okusaasira kwe yasuubiza badhaadha baife, aidhukire endagaano ye entukuvu.

⁷³ Ekirayiro kye yalayirira Aburahamu dhaadha waife okukituukiriza mu ife.

⁷⁴ Nga tumaze okununulwa mu mikono egy'abazigu baife, tumugheereze aghazira kutya

⁷⁵ mu maiso ge, mu butukuvu ni mu mazima enaku edh'obulamu bwaife dhoonadhoona.

⁷⁶ N'iwe Omwana, olyetebwa mulanzi w'oyo Ali Ghaigulu Yeene; kuba olyembereramu Musengwa waamutegekera engira dhe

⁷⁷ oghe abantu be amagezi ag'okulokoka, mu kusoniyibwa ebibi byaibwe.

⁷⁸ Olw'okusaasira okunene okwa Katonda waife ali ng'oti n'endhuba evaayo, aliva ghaigulu yaidha yaatukyalira.

⁷⁹ Okwakira abo abatyaime mu nzikiiza ni mu kinsense eky'olumbe, n'okutereeza ebigere byaife mu ngira ey'eidembe.”

⁸⁰ Omwana yaakula era yaaba wa maani mu mwoyo, yaabanga eyo mu malungu okutuusa ku lunaku lwe yeeyoleka Isiraeli.