Isaia 8 - Baibuli Ekibono kya Katonda 2014

Mutabane wa Isaia ng'akamanhiso eri abantu

¹ Musengwa Katonda yankoba ati: “Toola ekipande ekinene okighandiikeku mu nhuguta enene, oti: OMUNHAGO OGW'AMANGU, OKUSWANKULA BYE BANHAGULWIRE

² Nze ndidha kutaagho Uria kabona ni Zekaria mutabane wa Yeberekia, babe abadhulizi bange abeesigwa, okukakasa ekyo.”

³ Agho naaja naaba ni mukazi wange, yaatoola enda era yaazaala omwana mulenzi. Musengwa Katonda yankoba ati: “Mutuume eriina OMUNHAGO OGW'AMANGU, OKUSWANKULA BYE BANHAGULWIRE

⁴ kuba omwana oyo aliba akaali na kwega kweta ati ‘Baaba’ oba ati ‘Maama’, ng'obukombe bw'e Damasiko n'ebintu byonabyona Samaria bye yanhaga, byamala ira okutwalibwa kyabazinga w'e Assiria.”

Kyabazinga w'e Assiria ali kwidha

⁵ Musengwa Katonda yaayogera ninze olundi kabiri.

⁶ Yankoba ati: “Abantu bano nga bwe balobye amaadhi ag'akaiga Shiloa agakuuluula empola, aye ni basanhuka olwa Rezini ni Peka mutabane wa Remalia abaidhie okubabeera,

⁷ kale ni bona eno, nze Musengwa Katonda nja kubaleetera amaadhi amangi ate ag'amaani agava mu mwiga Eufurate, oyo nga ni kyabazinga w'e Assiria n'abalwani be boonaboona. Amaadhi ago galiidha gaidhuza emyeta gy'amaadhi egy'omu Buyudaaya mwonamwona, gaakuuluulira ni ku mbali kwagyo.

⁸ Galyeyongera okukuuluulira mu Buyudaaya, gaidhulamu mwonamwona okutuuka ni mu nkoto, gaidhuza n'ensi yoonayoona y'ekoma.” Katonda aba ghalala n'ife.

⁹ Mwesoloze imwe amaghanga, aye balibatentena; mutege kutu imwe mwenamwena ab'omu nsi edh'eghala, mwetegeke okulwana, aye balibatentena; mwetegeke okulwana, aye balibatentena.

¹⁰ Mukolere ghalala entegeka dhaimwe, aye tidhirituukirizibwa; mwisanie ku kye munaakola, aye tikiidha kutuukirira; kuba Katonda ali ghalala n'ife.

Musengwa Katonda alabula Isaia

¹¹ Musengwa Katonda yandabula inho ng'ansikirira ndobe kujiiranga ku mpisa dha bantu bano. Yaakoba ati:

¹² “Iwe oteeyimbanga mu nkwe abantu bano dhe bakola, era ebyo bye batya iwe otabityanga naire, waire okuwaamu omwoyo.

¹³ Mumanhe nga nze Musengwa Katonda Afuga Amagye ndi mutukuvu. Ninze ye mube mutyenga era mumpenga ekitiisa.

¹⁴ Ninze ekifo ekitukuvu mwe muliwonera. Aye ab'omu bwakyabazinga bwombi, obwa Isiraeli n'obwa Buyudaaya, nga kw'otaire n'abatyamye b'omu Yerusalemu, ndibafuukira eibaale kwe beekontola n'ekitimuguunha kwe beeguunha ni bagwa, era naabafuukira olutuula olubagemya.

¹⁵ Bwenebwene bangi abalineeguunhaku ni bagwa, ni bategebwa olutuula ni lubagemya.”

Okulabula abeebuuza ku mizimu

¹⁶ Imwe abeegeresebwa bange mugumire ku bye mbasikiriire era mukalangukire ku bye mbeegereisa.

¹⁷ Ndidha kuteegerera Musengwa Katonda atubeere, waire nga mpegaano yeegisiisa ku bantu be. Oyo nze ye ndidha okusuubiriramu.

¹⁸ Bona eno, Musengwa Katonda oyo Afuga Amagye era atyama ku kityamo kye ku lusozi Sioni, yatutaagho nze n'abaana bange tube obumanhiso n'ebyamagero mu Isiraeli.

¹⁹ Kale batabakobanga bati: “Mwebuuze ku basamize n'abalaguzi, abalira ng'oti binhonhi era aboogera obwama.” Timwidhi ng'abantu bagwaine kwebuuza ku Katonda waibwe? Ebigema ku balamu ate byebuuzibwa ku bafu?

²⁰ Mubairangamu muti: “Ka twekalangulire ku ebyo Musengwa Katonda bye yatusikirira ni bye yatwegeresa.” Bwenebwene abo abatajiira ku ebyo nga bwe biri, tibalikyesa bwire nga bakaali kufa.

Ebiseera ebizibu

²¹ Era baidha kuyengeeteranga mu nsi nga beeraliikirivu inho, era nga balumwa endhala. Ng'endhala eri kubaluma, baidha kwesinwanga bakolime kyabazinga waibwe ni Katonda waibwe. Ni bwebaliringa ghaigulu batya,

²² oba ni balinga ghansi ku itaka, tibalibona kintu kindi naire, okutoolaku enaku n'enzikiiza etiisa, egemye bedimudimu, era mu yeene eyo mwe balibabingira.