Isaia 7 - Baibuli Ekibono kya Katonda 2014

Musengwa Katonda agheereza Ahazi obukwenda

¹ Mu biseera Ahazi mutabane wa Yothamu era mwidhukulu wa Uzzia bye yafugiramu Buyudaaya, Rezini kyabazinga wa Siria, ni Peka mutabane wa Remalia era kyabazinga wa Isiraeli, baalumba Yerusalemu aye kyabalema okughangula.

² Kyabazinga wa Buyudaaya bwe yawulira nga Abasiria beeyimbye n'Abaefuraimu, agho mwene ghalala n'abantu be emyoyo gyabatengera ng'oti n'emiti egy'omu kibira bwe gitengeeta n'empewo.

³ Musengwa Katonda yaakoba Isaia ati: “Ja ni mutabane wo Sheari Yashubu, ye kyabazinga Ahazi agho gha mweta oguleeta amaadhi okuva mu nsulo y'eitale eri ku ngira enene eja mu kifo ekyetebwa Ekyolezo.

⁴ Omukobe oti, ‘Guma obe mwikaikamu, otatya era otawaamu maani. Obusungu obubitirivu obwa Rezini, n'obw'Abasiria, n'obwa Peka mutabane wa Remalia, buli ng'oti mwosi bwosi oguva ku buti obubiri obunioka.

⁵ Siria ni Isiraeli ghalala ni kyabazinga waayo, bakusaliire olukwe, nga

⁶ benda baidhe balumbe Buyudaaya bagitiisetiise bagighangule, era bateegho mutabane wa Tabeeli abe kyabazinga waayo.

⁷ “‘Aye nze Musengwa Katonda nkoba nti ekyo tikiidha kubaagho, era tikiidha kutuukirira naire

⁸ kuba Rezini afuga Siria yonka n'ekibuga kyayo ekikulu Damasiko. Ate mu myaka nkaaga n'etaanu, Isiraeli eriba yeekutwirekutwiremu nga tekaali ighanga irala.

⁹ Ekibuga ekikulu ekya Isiraeli kiri Samaria, era Peka mutabane wa Remalia ni kyabazinga wa Isiraeli. “‘Bwe muliroba okwikiriza, timuligumiragho ni mukakasibwa.’”

Akamanhiso ka Emmanueli

¹⁰ Agho Musengwa Katonda yaagheereza Ahazi obukwenda obundi ng'amukoba ati:

¹¹ “Saba Musengwa Katonda wo akughe akamanhiso, ka kabe nga kava ghansi e magombe oba nga kava ghaigulu mu igulu.”

¹² Aye Ahazi yairamu ati: “Tiidha kusaba kamanhiso, era tiidha kuleba Musengwa Katonda.”

¹³ Agho Isaia yaakoba ati: “Mbeeni muwulire imwe baidhukulu ba Daudi. Imwe okukooya abantu ababaguminkiriza tikibamala, memale mwende okukooya ni Katonda wange?

¹⁴ Kale ni Musengwa Katonda mwene ku lulwe alibagha akamanhiso, era ni kano: Omughala omwegha alitoola enda, yaazaala omwana omulenzi yaamutuuma eriina Emmanueli

¹⁵ Omwana oyo gh'alituukira okwawulagho ekirungi n'ekibi, abantu baliba banhwa mata na kulya mudheenene gwa ndhuki, ng'eyo n'emere yaibwe.

¹⁶ Era aliba akaali na kwawulagho kirungi na kibi, ng'ensi dha bakyabazinga ababiri ababatiisa dhaamala ira okusigala agho nga ndhereere.

¹⁷ Musengwa Katonda alikuleetera iwe ebizibu, n'abantu bo, n'ab'endhu ya lata wo, nga tibibangaghooku okuva obwakyabazinga bwa Isiraeli lwe bweyawula ku bwa Buyudaaya. Kuba aja kubaleetera kyabazinga w'e Assiria.

¹⁸ “Olunaku olwo bwe lulituuka, Musengwa Katonda alifuuwa endeka okweta Abamisiri baidhe ng'oti nsowera, nga baviira ku mwiga gw'e Misiri. Era alyeta n'Abassiria baidhe ng'oti ndhuki, nga baviira mu nsi yaibwe.

¹⁹ Baliidha beeyugha mu biiko, ni mu ntanda edheeyatisa mu mbaale, ni mu bisaka byonabyona eby'amawa, ni mu byayiro byonabyona.

²⁰ “Olunaku olwo bwe lulituuka, Musengwa Katonda alibasala enviiri n'akamwano k'alipangisa okuva ere ng'osomoike omwiga Eufurate oyo nga ni kyabazinga w'e Assiria. Alibasalaku enviiri ku mitwe, n'ebirevu, n'obuviiri obw'oku mibiri gyaimwe.

²¹ “Olunaku olwo bwe lulituuka, omuntu ni bw'aliba ng'asigaizaagho bwa nte ndala eyonsa ento, n'entaama ibiri bubiri,

²² dhiriva amata mangi inho agamumala okunhwa. Bwenebwene kiisi aliba asigaire mu nsi eyo, alinhwanga amata era yaalyanga n'omudheenene gw'endhuki.

²³ “Olunaku olwo bwe lulituuka, buli kifo aghaabanga emizabbibu olukumi (1,000), nga buli mulala gujaamu ebitundu bya feeza lukumi, ghalizika ghaameragho nkandwa na mawa.

²⁴ Abantu baliidhanga omwo okuyiiga n'obulaso n'obusaale, kuba ensi eyo yoonayoona eriba eidhwire nkandwa na mawa.

²⁵ Obusozi bwonabwona abantu bwe baalimangaku buliba buzise na nkandwa na mawa, ng'omuntu atya n'okujaayo. Kiriba nga kifuuse kifo kya kusindikangamu nte na ntaama, dhije dhiriirenga omwo.”