Isaia 66 - Baibuli Ekibono kya Katonda 2014

Musengwa Katonda asalira amaghanga omusango

¹ Musengwa Katonda akoba ati: “Eigulu n'ekityamo kyange eky'obwakyabazinga, ate ensi, kwe nta ebigere byange. Kale mulinzimbira ndhu nabaki? Era kifo ki mwe ndiwuumulira?

² Ebintu byonabyona ninze nabikola n'engalo dhange. Kale byonabyona byange. Aye omuntu ye nsangaalira n'oyo omuwombeefu era eyeeneniiza, antaamu ekitiisa era n'akola bye ndagira.”

³ “Ghaligho abantu abasalagho okukola ebintu nga bwebenda, nga tibataagho ndhawulo naire ghagati gha kino ni kire: Ole okughaayo ente ng'omusengo, akibona nga n'ekirala n'ole aghaireyo omuntu. Ole okughaayo entaama ento ng'omusengo, akibona nga n'ekirala n'ole amenha enkoto y'embwa. Ole okuleeta ekigheebwayo eky'emere ey'empeke, akibona nga n'ekirala n'ole aghaireyo omusaayi gw'embiidhi. Ole okuniokeza obubbaani, akibona nga n'ekirala n'ole asaba enkabi eri ekisinzibwa ekitali Katonda. Abantu abo kye benda kye bakola, era basanhukira inho ebyenhinhalwa bye bakola.

⁴ Kale zeena ndibasindikira ebyo byene bye batya ebibaleetera obulumi kuba bwe nayeta ghazira waire omulala ati eyavugira, era bwe nayogera ghazira yafaayo kuwulira. Aye baakola bwa bibi ye ndi, baalondagho okukola ebitansangaaza.”

⁵ Imwe abafuba einho okugondera Musengwa Katonda by'alagira ni mubikola, muwulire Musengwa Katonda oyo ky'akoba: “Olw'okuba muli beesigwa ye ndi, abandi ku bantu baimwe beene babakyagha era baababingagania, nga babayeeyereza bati, ‘Musengwa Katonda leka abawonie ayolese nga bw'ali ow'ekitiisa, tuboneku nga bwe musagamba.’ Aye beene n'abaliswazibwa.

⁶ Muwulire akasasamalo akali kuva mu kibuga! Ghaligho amamiro agali kuva mu isinzizo, era amamiro ago n'aga Musengwa Katonda nga yeesasuuliza ku bazigu be.

⁷ “Ekibuga kyange Sioni kiri ng'oti mukazi azaala ng'akaali kulumwaku naire! Ebisa byali bikaali na kumuluma, ng'azaala omwana mulenzi.

⁸ Naani eyaali awuliireku ekintu ng'oti n'ekyo, era naani eyaali akiboineku? Ensi esobola okuzaalibwagho mu lunaku olulala luti? Eighanga lisobola okumerukagho mu kaseera obuseera? Aye Sioni yali yaakalumwa ati, ng'azaala abaana be.

⁹ Mulowooza muti nze ndituusa abantu bange mu kaseera ak'okuzaalibwa, aye naabalekayo mu nda, naaloba kubatuusa ku kuzaalibwa?

¹⁰ Imwe mwenamwena abagonza Yerusalemu, musangaalire ghalala naye, era musagambe ku lulwe. Imwe mwenamwena abalira ku lulwe era abamulumirwa, mweyimbe ghalala mu isanhu lye musagambe,

¹¹ musobole okwonka mwigute amabeere ge agaidhwire, era mugabane ku kitiisa kye ekiswikiriire.”

¹² Musengwa Katonda akoba ati: “Bona, ndireetera ebirungi okuba mu Yerusalemu ebingi einho, nga bikuuluula bukuuluule ng'oti mwiga. Obukombe obw'amaghanga buliyoolookera omwo ng'oti n'omwiga ogwidhwire ni gubanda n'okubanda. Era imwe mulirabirirwa ng'oti mwana mughere inhina y'ayonsa, n'amulera era n'amutenga ku mubiri.

¹³ Ndibaghemberera mu Yerusalemu ng'oti n'inhina w'omwana bw'aghemberera omwana we okumusirisaagho.

¹⁴ Ekyo mulikibona mwasagamba mu myoyo ni mu mibiri, mwairamu obulamu n'amaani. Era kirimanhikana nga nze Musengwa Katonda nhamba abagheereza bange abampulira, aye naasungughalira abazigu bange.”

¹⁵ Bona, Musengwa Katonda aliidhira mu muliro ng'ali n'ebigaali eby'omu lutalo ebiziinhuuka ng'oti kiwunga, ng'aidha okwolesa obusungu bwe obubitirivu, n'okubonereza ng'akozesa enimi edh'omuliro.

¹⁶ Musengwa Katonda alibonereza abantu boonaboona ng'akozesa muliro na mpiima, era abo b'aliita baliba kamaala.

¹⁷ Musengwa Katonda akoba ati: “Abo abeerongoosa ni beetukuza, era ni basimba enhiriri okuja ku mikolo egiba mu nimiro dhe basengamu emisambwa, ni balya emamba y'embiidhi, n'empube, n'ebyenhinhalwa ebindi, balizikirizibwa boonaboona ghalala.

¹⁸ Nze ndidhi bye bakola ni bye balowooza. Ekiseera kiidha kutuuka nsoloze ab'amaghanga goonagoona aboogera enimi edha buli nsambo. Baliidha baabona ekitiisa kyange,

¹⁹ era naakola akamanhiso nga babona. Abo abaliwonagho ku abo, ndibatuma mu maghanga ni mu biketezo eby'oku nhandha eby'eghala ye batampulirangaku, waire okubona ku kitiisa kyange. Balija baalangirira ekitiisa kyange mu maghanga: e Tarushishi, e Puti, e Ludi eri abakugu mu kulasa obusaale, e Tubali, n'e Yavani.

²⁰ Baliiza baganda baimwe boonaboona nga babatoola mu maghanga goonagoona, baabaleeta ng'ekigheebwayo eri nze Musengwa Katonda, ku lusozi lwange olutukuvu Yerusalemu. Balibaleetera ku mbalaasi, ku nhumbu, ku ngamiya, ku bigaali eby'omu lutalo, ni ku bigaali ebindi, ng'oti n'Abaisiraeli bwe baleeta ebigheebwayo eby'emere ey'empeke mu isinzizo nga babitaire mu bintu ebirongoofu ebireeterwamu.

²¹ Abandi ku abo ndibafuula bakabona na Balevi. Nze Musengwa Katonda, ninze nkobye.

²² “Ng'eigulu eiyaaka n'ensi empyaka bye ndikola bwe birisigalagho mu maiso gange, n'eizaire lyaimwe lityo bwe lirisigalagho era n'eriina lyaimwe lyona lyasigalagho.

²³ Buli ku kuboneka kw'omwezi na buli ku Sabbato, abantu boonaboona baliidhanga baasinza mu maiso gange.

²⁴ Bwe balibanga bavaayo, baliringanga ku mirambo egy'abantu abandheemera, kuba enhengere edhibalya tidhirifa, n'omuliro ogubookya tigulizikira, era baliba kyenhinhalwa eri abantu boonaboona.”