Isaia 64 - Baibuli Ekibono kya Katonda 2014

¹ Wo Musengwa Katonda, ngoli ni oyabuluza eigulu lyaghembuka, waidha eno ghansi! Ensozi dhanditengeese mu maiso go,

² ng'oti n'ebisaka ebigemye omuliro, oba ng'amaadhi bwegasambira nga gali ku muliro. Idha oyoleke obuyinza bwo eri abazigu bo, era oleetere amaghanga okudhugumirira mu maiso go.

³ Olundi, bwe waika n'okola ebitiisa bye twali titusuubire, ensozi dhaatengeetera mu maiso go.

⁴ Okuva eira n'eira ghazira muntu yaali aboineku waire okuwuliraku, oba okulowoozaaku ku Katonda owundi akolera abamusinza ebyewuninkiriza, okutoolaku iwe wenka.

⁵ Osangaalira abo abasanhukira okukola ebituufu, ni baidhukira okwebisa nga bw'oyenda. Iwe watusungughalira, aye ife tweyongera bweyongere kukola bibi. Era kuva ira nga tuli mu kukola bibi okwo. Aye oba tulibiwona?

⁶ Twenatwena twafuuka ng'oti n'abatali balongoofu, n'ebikolwa byaife byonabyona ebirungi, biri ng'oti n'ekivaalo ekikongeire eiko. Olw'ebibi byaife, twenatwena tuli ng'oti makaba maniavu, era empewo etufuuwa ere yaatutwalikiza irala.

⁷ Ghazira aidha y'oli kukusaba ghazira asitukiramu kulumukira y'oli omuyambe. Iwe watwegisaaku era waatulekulira agho mu bibi byaife.

⁸ Wo Musengwa Katonda, aye iwe niiwe Iseife. Ife tuli ng'eitosi eriwumba, ate iwe waaba ng'omuwumbi. Twenatwena niiwe watukola n'engalo dho.

⁹ Kale ni otatusungughalira kibitiriire, waire okutuvunaana ebibi byaife ebyanda n'ebyanda. Tugemerwe ekivunika, kuba twenatwena nga bw'otubona tuli bantu bo.

¹⁰ Ebibuga byo ebitukuvu byafuuka ng'oti irungu: olusozi Sioni luli ng'oti irungu, ekibuga Yerusalemu kyafuuka ng'oti kifulukwa.

¹¹ Eisinzizo lyo eitukuvu eriboneka obulungi, badhaadha baife mwe baakusaakiranga, lyayokebwa omuliro. N'ebifo byaife byonabyona ebisanhusa, byafuuka bifulukwafulukwa.

¹² Wo Musengwa Katonda, bwenebwene ozira ky'ofaayo naire ku ebyo byonabyona ebibairegho? Bwenebwene oja kusirika busirike, otuleke tudaazibwedaazibwe ebitaloodheka tutyo?