Isaia 62 - Baibuli Ekibono kya Katonda 2014

¹ Ku lwa Sioni nze tiidha kusirika, ku lwa Yerusalemu tiidha kuwuumula naire, okutuusa nga kimaze okununulwa, n'obughanguzi bwakyo bwayaka ng'oti muliro.

² Yerusalemu, amaghanga galibona bw'onunwirwa, ni bakyabazinga boonaboona baabona ekitiisa kyo. Olituumibwa eriina eiyaaka, Musengwa Katonda mwene ly'alikugha.

³ Oliba ng'engule eboneka obulungi Musengwa Katonda y'agemye mu ngalo dhe, engule ey'obwakyabazinga eri mu makono ga Katonda wo.

⁴ Toliiramu kabiri kwetebwa “Eyalekulirwa agho,” oba ensi yo okwiramu okwetebwa “Ekifulukwafulukwa.” Aye olyetebwa “Eyasiimibwa,” n'ensi yo yaayetebwa “Mufumbo”; kuba Musengwa Katonda akusiima, era ensi yo eriba ng'omukazi omufumbo.

⁵ Ng'omwisuka bw'abayiza omughala omwegha, n'abantu bo batyo bwe baliba ng'oti bakubayiiza. Era ng'omusaadha bw'asagamba olw'omugole y'abayiiza, ni Katonda atyo bw'alisagamba olwa iwe.

⁶ Iwe Yerusalemu, ntaire abakuumi ku bimante byo, abataidha kusirikanga omusana n'obwire. Bateekwa okwidhukizanga Musengwa Katonda atuukirize bye yasuubiza, nga tibawuumulamu naire.

⁷ Batamuganha kuwuumulaku naire, okutuusa ng'aiziizaagho Yerusalemu obuyaaka, yaakireetera okusaakibwa mu nsi yoonayoona.

⁸ Musengwa Katonda yeerayiriire mu buyinza bwe ati: “Bwenebwene tiriirayo kuwaayo mere yaimwe ya mpeke kuliibwa bazigu baimwe. Abagwira tibalinhwa mwenge gwaimwe gwa mizabbibu gwe mwafaabiikanira.

⁹ Aye abo abaakungula emere eyo, n'abaligirya baasaaka Musengwa Katonda. N'abo abaanoga emizabbibu n'abalinhwera omwenge gwagyo mu mpya dh'ekifo kyange ekitukuvu.”

¹⁰ Imwe abantu bange ab'omu Yerusalemu mufulume, mufulume emiryango gy'ekibuga. Muje mutegeke abantu ghe banaabita mutemegho oluguudo. Mutemegho oluguudo mangu, mulumalemu ebibaalebaale. Mughanikire abantu ebendera ng'akamanhiso,

¹¹ bamanhe nga Musengwa Katonda ali kulangirira mu nsi yoonayoona ati: “Mukobe ab'omu Sioni muti, bona, omulokozi wuuyo aidha, ng'ali n'ebirabo eby'okugabira abantu be, n'empeera ey'okubasasula.”

¹² Mulyetebwa “Bantu batukuvu,” era “Abantu aba Musengwa Katonda abaanunulwa.” N'iwe Yerusalemu olyetebwa “Kibuga Katonda ky'ayenda,” era “Kibuga Katonda ky'atalekulirangaku agho.”