Isaia 61 - Baibuli Ekibono kya Katonda 2014

Amawulire amalungi ag'okununulwa

¹ Omwoyo gwa Musengwa Katonda gundiku, kuba yansiiga omuzigo, yantuma okukobera abadaazibwadaazibwa amawulire amalungi. Yantuma okugumya abaawaamu emyoyo, n'okulangirira eri abali mu bunhage nti baidha kulekulwa babe ba idembe, n'abasibe nti baidha kusibulwa mu ikomera.

² Yantuma okulangirira nti ekiseera kituuse, Musengwa Katonda agemerwe abantu be ekivunika, era yeesasuulize ku bazigu baibwe. Era yantuma okugumya abo boonaboona abalira olw'okuba mu nnaku.

³ Era yantuma eri abo abali mu Sioni, mbavaaze engule ku mitwe gyaibwe mu kifo ky'eivu lye beebbaase. Era mbaleetere okusangaala mu kifo eky'okunakughala, mbaleetere n'olwembo olw'okusaaka mu kifo eky'okuba mu bughafu. Olwo babe ng'oti n'emiti emikologho Musengwa Katonda mwene gye yeesimbira; era bakolenga ebituufu ebireetera Musengwa Katonda oyo okugheebwa ekitiisa.

⁴ Balizimba buyaaka ebifo eby'eira ebyayonooneka, era baizaagho buyaaka ebyo ebyali bifuuse ebifulukwafulukwa. Balirongoosa ebibuga ebyayonoonebwa ni bimala emyaka kamaala nga birekeibwa bw'agho bityo.

⁵ Abantu abamaghanga agandi n'abalibagheerezanga, imwe abantu bange, era baabaayiranga ebyayo byaimwe; abagwira abo n'abalibalimiranga era baalabiriranga amasamba gaimwe ag'emizabbibu.

⁶ Aye imwe, abantu balibeetanga bakabona ba Musengwa Katonda, era abagheereza ba Katonda waife. Mulikozesanga obukombe bw'amaghanga, bwabaleeteranga imwe okuteebwamu ekinhagansi.

⁷ Mulibanga mu nsi eyaimwe ku bwaimwe, obukombe bwaimwe bweyongerangaku obungi bwa mikuzi ebiri, mu kifo kyaimwe okwira agho okugemwanga obw'ensoni n'okunhoomebwa. Era eisanhu lyaimwe liribangagho ebyanda n'ebyanda.

⁸ Musengwa Katonda akoba ati: “Nze nhenda abo abakola amazima, aye nkyagha abo abanhazi n'abakozi b'ebibi. Ndigha abantu bange empeera yaibwe nga njiira ku mazima, era naakola nabo endagaano ey'ebyanda n'ebyanda.

⁹ Abaana baibwe balimanhikana mu maghanga, n'abaidhukulu baibwe baaba bamanhifu mu bantu boonaboona. Buli muntu anaababonanga alimanha ng'abo n'abantu, nze Musengwa Katonda be mpaire enkabi.”

¹⁰ Ekibuga Yerusalemu kikoba kiti: “Ndisagamba inho olwa Musengwa Katonda era naasangaala olwa Katonda wange oyo; kuba anvaaziiza obulokozi n'obutuufu ng'oti bivaalo. Ndi ng'oti n'omugole omusaadha ye bavaaziiza engule ku mutwe, era ng'oti n'omugole omukazi ye badholiige n'ebyamadholobera.”

¹¹ Bwenebwene ng'eitaka bwe limeza ebimera, era ng'enimiro bw'ekuza bye bagisimbyemu, ni Musengwa Katonda atyo bw'alireetera obutuufu okumeruka mu bantu be, amaghanga goonagoona gaamutaamu ekitiisa.