Isaia 59 - Baibuli Ekibono kya Katonda 2014

Omulanzi avumirira ebibi by'abantu

¹ Mutalowooza muti amaani ga Musengwa Katonda gaakoma, yaaba nga takaasobola kubalokola. Oba okulowooza muti amatu ge gaasemba, gaaba nga tigakaabawulira, nga muli kumweta okubayamba.

² Aye mumanhe nti ebibi byaimwe byene n'ebireetera Katonda waimwe okubalekulira agho, yaaloba kubalingaku, waire okuwulirisa bye mumusaba.

³ Muli n'omusango kuba mwogera eby'obuguya, era mwakola ebikolwa eby'obukambwe n'obutemo.

⁴ Ghaziragho muntu awoza musango mu butuufu ng'ali kukolera ku mazima. Aye muwoza ebiziragho, mwayogera eby'obuguya, memale mwasinga omusango. Mutegeka okukola ebibi era mwamala mwabikola, mwayonoonera irala.

⁵ Enkwe dhe musala dhiba dha kabi ng'amagi g'omusota ogw'obusagwa. Kiisi igi ly'omenha livaamu musota gwa busagwa, era buli alya ku igi ng'oti n'eryo afa bufe. Bye mukola tibyesigika ng'oti n'olutuula lwa nabumbuli.

⁶ Aye enkwe dhaimwe tidhiribaviiramu kalungi. Dhiriba ng'oti lugoye olukoleibwa mu wuuzi dha nabumbuli, oluzira muganhulo naire.

⁷ Mwangugha inho okukola ebibi aghazira kusibamu, era mwayanguyirwa inho okwita abantu abaziraku musango. Buli ghe mubita muzikirizaagho, mwaleka bifulukwa byereere. Ebirowoozo byaimwe mubimalira ku kukola bibi byonka.

⁸ Timwidhi kyetebwa miraala, era bye mukola tibijiira ku mazima. Mutambulira mu ngira engodegode, era kiisi adhibitamu taba na miraala naire.

Abantu baatula ebibi byaibwe

⁹ Abantu bakoba bati: “Bwenebwene okukola amazima kutuli ghala, n'okukola ebituufu kutuziramu. Tunoonia obutangaavu, aye twabona bwa nzikiiza ndhereere eri bedimudimu.

¹⁰ Tuja nga tughaamanta ku bimante ng'oti n'abatulu abatabona. Era twaja nga twekontola ni mu kasana ghagati nga buli ng'oti bwire, twaba ng'oti n'abali mu nsi y'abafu.

¹¹ Twenatwena twidhula okutya, twavuuma ng'oti bisolo bikambwe, era twalira ng'oti maghemba. Twegomba Katonda aidhe atuwonie okutuntuzibwa, aye ghazira kikolebwa naire. Era twegomba okulokolebwa, aye kwatuba ghala inho.

¹² “Wo Musengwa Katonda, twakola ebibi kamaala y'oli, era okusobya kwaife okwo kwene kutulumiriza kuba ebibi byaife tubibona, n'okusobya kwaife tukwidhi bukalamu.

¹³ Twakudheemera twakuvaaku iwe Musengwa Katonda, twaloba kukunonereza iwe Katonda waife. Twatuntuza banaife era twakudheemera. Bye tulowooza bikyamu, ni bye twogera bya buguya.

¹⁴ Tubingagho amazima twaloba kugakoleraku, n'okukola ebituufu kwaloba kuseeta ghe tuli. Amazima tigakaakolebwa mu mpya dha bibuga, n'obwesimbu tibukaaliyo.

¹⁵ Obwesigwa buziragho mu bantu, era oyo alekayo okukola ebibi bamuyiiga n'obukambwe.” Musengwa Katonda ekyo yakibona era yaasungughala, olw'obutabaagho kukolera ku mazima.

Musengwa Katonda ategeka okununula abantu be

¹⁶ Yeewuunhia okubona nga ghaziragho muntu waire omulala ati, afaayo kuwolerezaagho abo abatuntuzibwa. Kale mwene alikozesa obuyinza bwe n'obutuufu bwe, yaanunula abantu be okubatuusa ku bughanguzi.

¹⁷ Alivaala obutuufu ng'ekivaalo eky'omu kifuba eky'ekyuma, yaavaala obulokozi ku mutwe gwe ng'enkuufiira ey'ekyuma. Era okwesasuuliza ku bazigu be kulimubaaku ng'oti kivaalo kya munda, n'obusungu bwamubaaku ng'oti kivaalo kya ku ngulu.

¹⁸ Alibonereza abazigu be ng'ajiira ku bye baakola, ng'atwaliiremu n'abo ababa mu biketezo eby'eghala.

¹⁹ Abantu okuva e buvandhuba okutuuka e bugwandhuba balimutya, era baatya n'ekitiisa kye kuba aliidha ng'oti n'omwiga oguwolomboka n'amaani, nga gutwalibwa empewo Musengwa Katonda mwene y'asindika.

²⁰ Musengwa Katonda era akoba abantu be ati: “Ndija e Sioni okununula baidhukulu ba Yakobo abakyuka ni bava mu kwonoona kwaibwe.

²¹ Nkoze n'imwe endagaano, era mbaghaire obuyinza bwange n'endhegeresa yange, bibenga byaimwe buliidho. Era okuva ni mpegaano mwidha kungonderanga era mwegeresenga abaana baimwe okumpuliranga ebyanda n'ebyanda.”