Isaia 57 - Baibuli Ekibono kya Katonda 2014

Okusinza ebitali Katonda kuvumirirwa

¹ Omuntu akola ebituufu afa, era ghaaloba kubaagho ekyo akitaaku mwoyo omuntu atya Katonda yaatwalibwa, era ghaaloba kubaagho ekyo akitegeera. Aye ng'abantu abalungi abo baba bawonezeibwa akabi akandibaidhiire.

² Bwe bafa bafuna emiraala, baawuumula mu idembe.

³ Aye imwe abalogo, n'imwe abenzi, n'imwe bamalaaya, museete ghano musalirwe omusango.

⁴ Imwe aboonooni era abaguya, naani ye muli kuleetaku omuzaanho? Naani ye muli kwasamizaaku eminwa okumusungiriza?

⁵ Mweguguna okukola obwamalaaya obw'omu masabo, nga musinza emisambwa ghansi mu binsense eby'emiti emikologho emizibirivu. Era mwitira abaana baimwe mu biiko ebirimu entanda edheeyatisa mu mbaale.

⁶ Mutoola eyo amabaale amaseene obukalamu mwagasinza ng'oti bakatonda. Mugafukira ebigheebwayo eby'okunhwa era mwagaleetera ebigheebwayo eby'emere ey'empeke. Mulowooza muti munampooyawooya nga mukola ebyo?

⁷ Mwala obuliri bwaimwe ku nsozi endeeyi engungumavu, era eyo ye muja ni mughaayo emisengo, ni mukola n'obwamalaaya obw'omu masabo.

⁸ Mughanika munda einhuma gh'endhigi dhaimwe ebifaananie ebyenhinhalwa. Nze mwaneerabira, mwasasula abantu empiiya, mwatoolamu ebivaalo byaimwe, mwaniina nabo obuliri bwaimwe obugazi, baaba n'imwe mu buliri obwo nga muli kwesanhusa.

⁹ Mwebbaaka ebizigo n'obuwoowo kamaala, mwaja okusinza omusambwa Moleki. Era olw'okwenda einho okufuna bakatonda bye musinza, musindika abakwenda baimwe baaja eyo eghala einho. Mwatuuka n'okubasindika baje ghansi mu magombe.

¹⁰ Mwekaluubiriza inho nga muli kunooniayo bakatonda abandi, aye era mwaloba kukoogha waire okuwaamu amaani; kuba mulowooza muti ebitali Katonda ebyenhinhalwa ebyo bye musinza, bibagha amaani.

¹¹ Musengwa Katonda akoba ati: “Bwenebwene bakatonda ki abo be mutya einho mutyo, ni mutuuka n'okuunimba nze era ni muneerabirira irala? Obwo mulekeire agho okuntya, lwa kuba nasirika busirike okumala ekiseera ekinene kityo?

¹² Imwe mulowooza muti bye mukola bituufu, aye nze ndyerula ebikolwa byaimwe, era ebyo bye musinza ebitali Katonda biriba tibikaabagasa naire.

¹³ Kale ni bwe munandiriranga mbayambe, ebisinzibwa byaimwe ebyo bye musoloza n'ebibe bibawonienga. Aye empewo obuwewo eribifuumuula yaabitwala. Ate nga abo abaneesiga nze, n'abalitwala ensi yaaba yaibwe era bansizizanga ku lusozi lwange olutukuvu.”

Musengwa Katonda asuubiza okuyamba okuwonia abantu be

¹⁴ Musengwa Katonda era akoba ati: “Muteegho oluguudo, muteegho oluguudo mangu, mutegeke abantu bange ghe banaabita. Mutoole ebitimuguunha byonabyona mu ngira y'abantu bange.

¹⁵ “Ninze Katonda Omutukuvu aligho ebyanda n'ebyanda, aswikiriire ebintu byonabyona. Mba mu kifo ekiri ghaigulu era ekitukuvu. Aye era mba ni mu bantu abawombeefu era abeenenia, nsobole okubaizaamu omwoyo n'eisuubi.

¹⁶ Ninze nafuuwa omuuka ogw'obulamu mu bantu bange, era tiribasungughaliranga bujiiririire waire okubavunaananga emisango buliidho kuba ekyo kisobola okubaleetera okufa, ate nga ninze mwene eyabagha obulamu.

¹⁷ Abantu abo nabasungughalira olw'ebibi byaibwe n'okwegomba kwaibwe okubi. Kye nava ni mbabonereza era ni mbalekulira agho nga tikaabalingaku naire. Aye beene beeyongera okunvaaku, era beekalangulira mu mpisa dhaibwe embi.

¹⁸ “Waire namala ira okubona nga bwe beebisa obubi, aye era ndibakyusa naabawonia, naabakulemberamu, era ebibi byaibwe naabisasulamu ebirungi olwo naasangula amaziga g'abo abalira.

¹⁹ Nze Musengwa Katonda nkoba nti ninze ndeetera abantu ab'okumpi n'eghala okuba mu miraala. Era ninze ndiwonia abantu bange.

²⁰ Aye abantu ababi bali ng'oti nhandha eyeefuukuula ekiseera kyonakyona, amaadhi gaayo ni gasiikuula ebitosi n'ebikaba, aghazira kulaalaku.

²¹ Aboonooni tibaba na miraala naire.” Musengwa Katonda atyo bw'akoba.