Isaia 56 - Baibuli Ekibono kya Katonda 2014

Abantu ba Musengwa Katonda baliva mu maghanga goonagoona

¹ Musengwa Katonda akoba abantu be ati: “Mukolenga amazima n'obutuufu, kuba ndi kumpi kwidha okubalokola, era ndholeke nga ninze mbawonia ebizibu byaimwe.

² Ndigha enkabi abo abakuuma Sabbato buliidho ni batagyonoona, era naagha enkabi abo abeekuuma ni batakola bibi.”

³ Omugwira eyasenga mu bantu ba Musengwa Katonda, atakobanga ati: “Nze bwenebwene Musengwa Katonda aidha kumboola mu bantu be.” N'omulaawe, olw'obutasobola kuzaala baana, atakobanga ati: “Bona, nze ndi ng'oti bwa muti mukalu.”

⁴ Musengwa Katonda akoba abantu abo ati: “Omulaawe akuuma Sabbato dhange, n'asalagho okukolanga bye nsiima, era ni yeekalangula ku ndagaano yange,

⁵ ndireetera eriina lye okwidhukirwanga buliidho mu isinzizo lyange ni mu bantu bange aghazira kwerabirwa naire, okusinga bwe yandibaire azaire abaana abalenzi n'abaghala.”

⁶ Ate eri abagwira abaasenga mu bantu ba Musengwa Katonda, ni bagheereza Musengwa Katonda oyo nga bamugonza, ni beekalangula ku ndagaano ye, era ni bakuuma Sabbato dhe ni batadhoonoona, Musengwa Katonda abakoba ati:

⁷ “Ndibatwala ku Sioni olusozi lwange olutukuvu, naabagha eisanhu mu ndhu yange ey'okusinzizaamu. Ebigheebwayo byaibwe ebyokebwa n'emisengo gyaibwe ndibiikiriza ku alutaari yange, kuba endhu yange enaayetebwanga ndhu ya kusinzizaamu ab'amaghanga goonagoona.”

⁸ Musengwa Katonda, oyo asoloza abantu be Abaisiraeli abaabingibwa mu nsi yaibwe, akoba ati alisolozaayo n'abandi, boona baidha beeyongera ku abo abaamala eira okusolozebwa.

Abakulembeze ba Isiraeli bavumirirwa

⁹ Musengwa Katonda era akoba ati: “Imwe mwenamwena amaghanga ag'endha mwidhe muzikirize abantu bano ng'oti n'ensolo edh'omu nsiko bwe dhizikiriza.

¹⁰ Abakulembeze b'abantu bange bali ng'oti batulu beene. Tibakaalimu magezi, bali ng'oti n'embwa edhitaboigola. Baba mu kuwongera, na mu kutenduka ndoolo, na mu kuloota.

¹¹ Bali ng'oti mbwa edh'amairu amangi, edhitaiguta naire. Abakulembeze abo tibakaalimu kategeera, buli muntu yeefubiriire ku bibye, nga yeenooneza by'anaafunamu amagoba.

¹² Bakobagana bati, ‘Mwidhe tufuneyo ku mwenge ogw'emizabbibu tunhweku. Ka twerenge ebitamiiza, n'olwaidho lwona lwidha kuba ng'oti n'olwaleero, era n'okulusingaku.’ ”