Isaia 54 - Baibuli Ekibono kya Katonda 2014

Musengwa Katonda agonza inho Abaisiraeli

¹ Iwe Yerusalemu, obairenga oti n'omukazi omugumba, omukazi atazaalanga ku mwana naire. Aye mpegaano timbuka oyembe era okube emizira; kuba oidha kuba n'abaana kamaala okusinga n'omukazi iba y'atavangaku n'amulekulira agho.

² Kola ogaziye weema yo, ogaziye n'ensuubo dhaamu, oleeye n'emigugha gyayo, era onhweze n'enkondo dhaayo.

³ Oligaziya ensalosalo edh'ekiketezo kyo dhaaja ku ndhuyi dhoonadhoona edh'ensi. Abantu bo balitwala ebiketezo eby'abamaghanga agandi, era baliidhula mu bibuga ebyali birekeibwa obwagho.

⁴ Leka kutya, kuba toliiramu kuswazibwa kabiri; leka na kutabulwa, kuba ensoni tidhiriiramu kukugema kabiri. Olyerabira ensoni edh'omu buto bwo edh'obutaba mwesigwa, weerabira n'enaku ey'okulekebwa agho otyo nga namwandu.

⁵ Omutonzi wo mwene n'aliba balo, era eriina lye ni Musengwa Katonda Afuga Amagye. Omutukuvu wa Isiraeli n'aliba Omununuzi wo, era oyo ni Katonda w'ensi yoonayoona.

⁶ Isiraeli, oli ng'oti n'omukazi omufumbo akaali omuto, iba ye yabayiza, ate n'amala n'amuvaaku n'amulekulira agho mu nnaku; era oli ng'oti n'omukazi iba ye yabinga n'asigala nga munakughavu. Aye mpegaano Musengwa Katonda akweta oire y'ali, ng'akoba ati:

⁷ “Nakulekulira agho okumala akaseera, aye ndikwiza ye ndi, kuba nkugonza inho.

⁸ Nga ndidhwire obusungu obubitirivu, naloba n'okukulingaku okumala akaseera. Aye okuva ni mpegaano ndidha kukugemerwanga ekivunika, olw'okugonza kwange okutawaagho ebyanda n'ebyanda.” Musengwa Katonda Omununuzi wo, atyo bw'akobye.

⁹ “Nga bwe nalayira mu biseera bya Noa obutairamu kabiri kuleeta maadhi ga mwidhuzo kubanda ku nsi, ni leero ntyo bwe ndi kulayira obutairamu kabiri kukusungughaliranga na kukudhuukanga, waire okukubonerezanga.

¹⁰ Ensozi dhisobola okuvaagho, n'obusozi bwawaagho. Aye nze okugonza kwe nkugonzaamu tikuja kuvaagho, n'endagaano ey'emiraala ye nakola n'iwe teja kukoma.” Atyo bw'akoba Musengwa Katonda oyo akugemerwa ekivunika.

Yerusalemu nga bwe kiriba mu biseera ebiidha

¹¹ Musengwa Katonda akoba ati: “Iwe ekibuga Yerusalemu odaazibwadaazibwa era oyuuzibwayuuzibwa kiwunga, ghaaloba kubaagho akugumyaku naire. Aye bona eno, ndikuzimbisa amabaale ag'okudholigadholiga, emisingi gyo naagizimbisa amabaale ag'omughendo ageetebwa saffiro.

¹² Obusolya obw'endhu dho ndibuzimbisa amabaale ageetebwa agate, emiryango gyo naagizimbisa ageetebwa karabunkule, ate ebimante byo ebikwezungulwire naabizimbisa amabaale agandi ag'omughendo aga buli nsambo.

¹³ Nze Musengwa Katonda mwene ninze ndyegeresa abantu bo, naabaleetera ebintu okubajiiranga obukalamu nga bali mu miraala.

¹⁴ Okukola amazima n'obutuufu birikuleetera okuba ow'amaani. Oliwona okutuntuzibwa, era ebintu ebitiisa tibiriseeta gh'oli.

¹⁵ Omuntu yeenayeena alikutanulaku olutalo, ti ninze ndiba nga mmuganhie akole atyo. Buli alikutanulaku olutalo olimughangula yaagwa ere.

¹⁶ Bona, ninze ntonda omugheesi w'ebintu by'ekyuma, yaafuguta amanda ag'omuliro, yaagheesa eby'okulwanisa. Era ninze ntonda omwisirukale akozesa eby'okulwanisa ebyo okwita.

¹⁷ Aye tighalibaagho bya kulwanisa bye baligheesa birisobola kukulumya. Era kiisi aliwoza n'iwe olimusinga. Ndidha kulwaniriranga abagheereza bange, era mbaleeterenga okughangula.” Musengwa Katonda atyo bw'akoba.