Isaia 52 - Baibuli Ekibono kya Katonda 2014

Katonda alinunula Yerusalemu

¹ Iwe Sioni situka, situka oiremu obe wa maani. Iwe Yerusalemu ekibuga ekitukuvu, vaala ebivaalo byo ebiboneka obulungi; kuba bale abatatya Katonda n'abatali balongoofu tibakairayo kwingira mu iwe.

² Iwe Yerusalemu ekibuga eky'abaatwalibwa mu bunhage, situka weekunkumule ove mu nkungu; imwe ab'e Sioni abazigu be baatwala mu bunhage, mwesibule endhegere edhibali mu nkoto.

³ Musengwa Katonda akoba ati: “Imwe abantu bange mwatundibwa mu bwiru nga ghazira asaswire mpiiya naire, era mulinunulwa nga ghazira asaswire mpiiya.

⁴ Mwasooka mwaja mwasenga e Misiri, aye Abassiria baamala baabatwala mu bunhage nga bazira kye basaswire naire.

⁵ Nze Musengwa Katonda kye nva ni nkoba nti, ‘Mpegaano kiki kye nnaakola, nga ndi kubona abantu bange babatwalira ku bwereere? Abo ababafuga beesuuta, era buli kaakyeire nze baanhooma.’

⁶ Kale ni ekiseera kirituuka abantu bange baamanha nga ninze Katonda, era nga ninze ndhogeire.”

⁷ Nga kisangaaza okubona omukwenda ng'ali kubitira mu nsozi okwidha okuleeta amawulire amalungi, amawulire agalangirira emiraala era agalangirira obulokozi n'obughanguzi! Omukwenda oyo akoba ati: “Katonda waimwe n'afuga!”

⁸ Muwulire abakuumi b'ekibuga kyaimwe bwe baasiikana! Bali kwembera ghalala olw'eisanhu, kuba bali kubonera irala n'amaiso gaibwe nga Musengwa Katonda ali kwira e Sioni.

⁹ Imwe ebifo bya Yerusalemu ebyayonoonebwa, mutimbuke mwembe enhembo; kuba Musengwa Katonda agumiiza abantu be, yaanunula Yerusalemu.

¹⁰ Musengwa Katonda alikozesa omukono gwe omutukuvu ogw'obuyinza, yaalokola abantu be ng'ensi yoonayoona eri kubona.

¹¹ Muje, muje, muve mu Babiloni, imwe ababbeeda ebintu ebikozesebwa mu isinzizo lya Musengwa Katonda. Mutagema ku kintu kyonakyona ekitali kirongoofu. Muje mwekuume nga muli balongoofu.

¹² Eyo timulivaayo nga mugwidhubana waire okuvaayo nga mulumuka; kuba Musengwa Katonda mwene n'alibakulemberamu, era Katonda oyo owa Isiraeli alibavaaku einhuma ng'abakuuma.

Okudaazibwadaazibwa kw'omugheereza wa Musengwa Katonda

¹³ Musengwa Katonda akoba ati: “Bona, omugheereza wange ebintu birimujiiranga bukalamu. Aligheebwanga ekitiisa ekitaloodheka era yaagulumizibwa inho.

¹⁴ Abantu kamaala baamwewuunhia inho, okumubona ng'ayonooneibwa emboneka ye okusinga omuntu owundi yeenayeena bwe yaali ayonooneibwaku. Yali afuusefuuse nga takaafaanana bantu.

¹⁵ Atyo bw'alyewuunhisa amaghanga kamaala, bakyabazinga baabulwa eky'okwogera; kuba balibona ekitabakoberwangaku era baategeera kye batawulirangaku.”