Isaia 50 - Baibuli Ekibono kya Katonda 2014

¹ Musengwa Katonda era akoba ati: “Imwe abantu bange mulowooza muti nababinga, ng'oti n'omusaadha bw'abinga mukazi we? Bwe kiba kityo, memale embaluwa ey'okubabinga eri gha? Oba, mulowooza muti nabatunda mube bairu ng'oti n'omuntu bw'atunda abaana be? Aye naani eyali ammandha memale mmubaguze? Busa naire, mwatwalibwa mu bwiru lwa bibi byaimwe, era ebyonoono byaimwe n'ebyababinza.

² Lwaki tyayagaanagho muntu waire omulala ati lwe naidha okubawonia? Lwaki nayeta ni ghatabaagho anvugira? Omukono gwange n'ogufuuse omumpi einho, nga tigukaasobola kubatuukaku kubanunula? Oba amaani ag'okubawonia ge nzira? Mubone eno, nze nsobola okukaabukira enhandha yaakala, era naafuula aghabaire emiiga ghaaba irungu, ebyenhandha byamu byafa olw'okubulwa amaadhi era byawunha.

³ Nsobola okwirugaza eigulu, lyaba ng'oti ndivaaziiza kutiya lyoleke nga bwerinakughaire.”

Obuwulize bw'omugheereza wa Musengwa Katonda

⁴ Musengwa Katonda andhegereisa bye nnaayogera, bisobole okwiza amaani mu muntu akooye. Katonda oyo anzuusa buli kaakyeire yampa amaani, ag'okuwulira by'aba aja okundhegeresa.

⁵ Musengwa Katonda yampa okutegeera, naaloba kudheema era naaloba kwira inhuma kumuvaaku.

⁶ Nataagho omugongo gwange baakuba, naataagho amatama bankuunhuula ekirevu, era naaloba kukyukira mbali, nga bali kunfuudha mu maiso okunswaza.

⁷ Aye ebyo nze tibiimalaamu maani waire okuntabula, kuba Musengwa Katonda ambeera. Kale ni neevaamu naabagumira ng'oti ibaale, era ndidhi nga tiidha kuswazibwa.

⁸ Katonda oyo ali kumpi, era aidha kwoleka nga bwe nziraku musango. Kale naani ali ni ky'anvunaana? Aseete ghe ndi. Naani ali kuneesimbamu? Ka yeesimbegho tuwoze naye.

⁹ Bona, Musengwa Katonda mwene n'ambeera. Kale naani alinsalira omusango okunsinga? Abazigu bange boonaboona balikairigha baazikirira baawaagho ng'oti kivaalo ensiiriri ky'eriire.

¹⁰ Buli muntu ata mu Musengwa Katonda ekitiisa, era n'ajiira ku ebyo omugheereza wa Musengwa Katonda oyo by'akoba, ni bw'atambulira mu nzikiiza ng'azira kimulika, yeesigenga bwa Musengwa Katonda oyo, agumirenga ku Katonda oyo.

¹¹ Imwe mwenamwena abasala enkwe okuzikiriza banaimwe, mumanhe nti imwe beene niimwe mulyezikiriza mu nkwe dhaimwe dheene. Ekyo Musengwa Katonda mwene n'alikireetera okuba kityo, era mulifiira mu bulumi.