Isaia 5 - Baibuli Ekibono kya Katonda 2014

Olwembo olugema ku isamba ly'emizabbibu

¹ Ka nhembere omugonzi wange, olwembo olugema ku isamba ly'emizabbibu. Omugonzi wange yali n'eisamba ery'emizabbibu ku lusozi olugimu einho.

² Yaalitoodha bukalamu era yaalirondalondamu amabaale agaalimu, yaalisimbamu emizabbibu egisingamu bulungi. Yaalizimbamu ekituuti ekirengererwaku, yaalisimamu n'ekikunhiro ky'omwenge gw'emizabbibu. Yaasuubira ati eisamba eryo liidha kubaza emizabbibu emirungi, aye lyabaza bwa gikaagha ng'oti gya mu nsiko.

³ Mukagwa wange oyo mperaano akoba ati: “Kale ni, imwe abatyamye b'omu Yerusalemu n'ab'omu Buyudaaya, mbasaba mutusalire omusango ghagati ghange n'eisamba lyange eryo ery'emizabbibu.

⁴ Kiki ekindi kye nali n'okukolera eisamba lyange eryo, kye ntaalikolera? Lwaki bwe nasuubira eisamba eryo okubaza emizabbibu emirungi, ate lyabaza bwa gikaagha ng'oti gya mu nsiko?

⁵ Mpegaano ka mbakobere kye nja okukolera eisamba lyange eryo: Nja kulitoolaku olukomera olulyezungulwire, mmenhegho n'ekigo ekirikuuma, ensolo dhiriire omwo era dhirityankirire.

⁶ Ndidha kulizisa, emizabbibu balobe kugiwooleranga waire okugirimangamu. Mwidha kumeramu bwa nkandwa na mawa, era nja kulobera n'ebire okugwisanga amaadhi mu isamba eryo.”

⁷ Isiraeli n'eisamba eryo ery'emizabbibu erya Musengwa Katonda Afuga Amagye; abantu b'omu Buyudaaya n'ekirime kye yasimba nga musangaavu. Yabasuubiramu okukola amazima, aye baakola bwa butemo. Yabasuubiramu okukola ebituufu, aye baakola bwa biriza bantu maziga!

⁸ Mukagwireku imwe abagula endhu nga mwongereza ku dhe muli nadho, ni mugula n'enimiro okwongereza ku dhe muli nadho, okutuusa nga ghazira ghe mutaguze, olwo ensi mugibeemu mwenka.

⁹ Mpuliire Musengwa Katonda Afuga Amagye ng'akoba ati: “Bwenebwene endhu kamaala dhirifuuka bifulukwa, endhu enkologho era edhiboneka obulungi dhirisigala ndhereere omuzira bantu.

¹⁰ Eisamba ery'emizabbibu ery'eyiika eikumi, liidha kuvangamu bwa lita munaana edh'omwenge ogw'emizabbibu. Ate omusiri ogusigibwamu ekiibo ekiramba eky'ensigo, gwidha kukungulwangamu kaibo bwibo.”

¹¹ Bakagwireku abo abawuuna ku nkyo okunoonia eby'okunhwa ebitamiiza, ni banhwa omwenge okuzibya obwire okutuusa lwe gubatamiiza.

¹² Ebibinuko byaibwe bibaaku endingidi, entongooli, obugoma n'endere, era n'omwenge gw'emizabbibu. Aye tibalowooza ku ebyo Musengwa Katonda by'akola, waire okubifaaku naire.

¹³ Kale abantu bange kye baliva ni batwalibwa mu bunhage, olw'obutaba na kumanha. Abakungu baibwe endhala eribaita, n'abantu baibwe boonaboona baafa olw'endiwo.

¹⁴ Amagombe kye gava ni gabeeguguna, ni gaasamya omunwa okumira abakungu b'omu Yerusalemu aghalala n'eikuukuubira ery'abantu baamu, abaakiwowoiganirangamu nga basagamba.

¹⁵ Buli muntu aliswazibwa, n'abo abeekuluntaza baliisibwa ghansi.

¹⁶ Aye Musengwa Katonda Afuga Amagye agulumizibwa ng'asalira abantu mu mazima, era ayoleka obutukuvu bwe ng'akolera abantu mu butuufu.

¹⁷ Entaama ento dhiririira mu bibuga nga bizise ng'oti n'edhiri kuliira mu byayiro, n'edho edhipiitibwa obupiitibwe ensavu era n'embuzi ento, dhoona dhirifuna omwo eisubi.

¹⁸ Bakagwireku abo abaloba okuva ku kwonoona, obuguya bwaibwe ni bubasibiikirira ku kukola ebibi ng'oti n'emigugha bwe gisibiikirira ekigaali ekighaluzibwa.

¹⁹ Bakoba bati: “Musengwa Katonda atere ayanguyeeku by'akola tusobole okubibona; Omutukuvu wa Isiraeli oyo akole mangu by'ategeka tusobole okubimanha.”

²⁰ Bakagwireku abo abafuulania ebintu, ekibi ni bakyeta ekirungi ate ekirungi ni bakyeta ekibi; enzikiiza ni bagyeta obutangaavu ate obutangaavu ni babweta enzikiiza; ekikaagha ni bakyeta ekidhuudhuula ate ekidhuudhuula ni bakyeta ekikaagha.

²¹ Bakagwireku abo abeetwala okuba abagezi, ni beesuuta okuba abaidhi buli kintu.

²² Bakagwireku abo abamanhifu einho mu kunhwa omwenge, abaziramu ntete kutabikatabika bya kunhwa bitamiiza.

²³ Beedheereza abantu abaliku emisango baabaleetera okugisinga olw'enguzi, aye abaziraku musango baaloba okubakolera ekituufu ekibagwaniire.

²⁴ Kale ni ng'omuliro bwe gumamula ebikaba, n'eisubi eikalu ni liya okuweekereragho, boona ebyo bye beesiga bwe birivunda, n'ebyo bye bakola byafuumuuka ng'oti nkungu; kuba baaloba amateeka ga Musengwa Katonda Afuga Amagye, baanhooma ekiragiro eky'Omutukuvu wa Isiraeli.

²⁵ Obusungu bwa Musengwa Katonda butumbukiire ku bantu be ng'oti muliro, era agalwire omukono gwe okubabonereza. Ensozi dhiidha kutengeeta, n'emirambo gy'abo abaitiibwa gisigale agho mu nguudo dh'ebibuga ng'oti bikaba. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaasitwire omukono gwe okubabonereza.

²⁶ Musengwa Katonda alikola akamanhiso okweta abamaghanga agali eghala. Alibafuuyira endeka baava ensi y'ekoma, baidha amangu geene ago nga balumuka embiro.

²⁷ Mu abo timulibaamu akoogha waire eyeekontola kugwa; timulibaamu awongera waire atenduka. Ensibiro edh'omu nkende dhaibwe tidhirirebera naire, waire obukosi bw'engaito dhaibwe okukutuka.

²⁸ Obusaale bwaibwe bwogi, n'obulaso bwaibwe bwonabwona babudhuumwire. Ebinuulo by'embalaasi dhaibwe bibbalangafu ng'oti mabaale, n'enkede edh'ebigaali byaibwe eby'omu lutalo dhirumuka ng'oti n'empewo eyeezungulula n'amaani.

²⁹ Bawologoma ng'oti mpologoma egemye ensolo y'eyiize, ng'eri kugikwekwebya okugitwala era nga ghazira asobola kugigitoolaku.

³⁰ Olunaku olwo bwe lulituuka, baliwologomera mu Isiraeli, ng'oti n'enhandha bw'ewolomboka. Omuntu bw'aliringirira ensi eyo, alibona nzikiiza na nnaku byonka, ng'ebire bikingiriiza omusana, enzikiiza yaidha.