Isaia 46 - Baibuli Ekibono kya Katonda 2014

¹ “Eno n'enkomerero y'emisambwa egy'e Babiloni! Ebifaananie eby'emisambwa Beli ni Nebo egyasinzibwanga eira, buti babitwise ku ndogoyi na ku nte. Ebifaananie ebyo byafuuka migugu ku migongo gy'ensolo okudhiruyiriza.

² Emisambwa egyo amaani gagiwoire, ghazira ye gisobola kuyamba waire gyene okwewonia. Bagigema bugeme baagitwala mu bunhage. Eno n'enkomerero y'emisambwa egy'e Babiloni!

³ Mumpulirise imwe ab'endhu ya Yakobo, imwe mwenamwena Abaisiraeli abaawonagho. Bukyanga muzaalibwa, ninze mbalabirira okuviira irala mu nda dha bainhaimwe.

⁴ Ni bwe mulikula ni mukairigha ni mumera n'envu, era ndidha kubalabiriranga. Ninze eyabatonda, era ndidha kubakuumanga mbayambe mbalokole.

⁵ Naani ye mulingezaaku ni mumwagayaza ninze, oba naani ye mulingeragerania naye ni tufaanana naye?

⁶ Abantu baja baafukumula mu nsawo dhaibwe zaabu, baapima ni feeza ku minzaani. Olwo baasasula omugheesi era baalagira ebintu ebyo abigheeseemu ekifaananie eky'omusambwa, era baamala baakikubira amakiryaivu baakisinza.

⁷ Bakibbeedera ku mabega baakitwala, baakita mu kifo kyakyo, kyaba agho nga tikisobola kwesegenhiaku waire okuvaaghooku. Bwe ghabaagho aidha okukisaba tikisobola kumwiramu, waire okumuwonia mu bizibu bye.

⁸ Imwe abakozi b'ebibi, mwidhukire ekintu ekyo era mukirowoozeeku.

⁹ Mwidhukire ebyaligho mu biseera eby'eira, mumanhe nga ninze Katonda zenka, ezirayo wundi; era ezirayo ali ng'oti ninze.

¹⁰ Nalangirira okuviira irala mu mainhama ebyo ebyali eby'okwidha ku nkomerero; okuviira irala mu biseera eby'eira naayoleka ebyo ebyali n'okubaagho. Naakoba nti, ‘Ndituukiriza bye ntegeike, era naakola byonabyona bye nhenda.’

¹¹ Ndyeta omuntu yaidha okuva e buvandhuba. Aliidha ng'oti n'enhonhi eyiiga, yaaja yaakola kye ntegeike. Ntyo bwe nkobye era tiriroba kukituukiriza.

¹² Imwe abantu ab'empwitu mumpulirise, imwe abali eghala einho n'okulokolebwa:

¹³ Obulokozi bwange mbuseesiisa kumpi, tibukaali ghala naire. Tija kulwagho kulokola bantu bange. Ndinunula Yerusalemu olwa Isiraeli okumpeesanga ekitiisa.”