Isaia 44 - Baibuli Ekibono kya Katonda 2014

Musengwa Katonda ni Katonda yenka

¹ Musengwa Katonda akoba ati: “Mpegaano muwulire imwe baidhukulu ba Yakobo omugheereza wange, imwe Abaisiraeli be nalondamu.

² Mulobe kutya, kuba muli bagheereza bange, era abantu bange be nalondamu, be ngonza. Nze ninze Musengwa Katonda eyabatonda ni mbata mu nda dha bainhaimwe, era ndidha kubayambanga.

³ Ndireeta amaadhi gaagwa mu nsi eziramu waire itondo lya maadhi, era naata emiiga mu itaka eryakala. Ndireeta omwoyo gwange gwaika ku baana baimwe, era naayugha enkabi dhange ku baidhukulu baimwe.

⁴ Balikula bukalamu ng'oti isubi eriri kumpi n'amaadhi, era baagimuka ng'oti n'obuti obukulira ku mbali kw'omwiga.

⁵ Ghalibaagho omuntu alikoba ati, ‘Nze ndi wa Musengwa Katonda.’ Ate ole alyetuuma eriina lya Yakobo, n'owundi yaaghandiika ku mukono gwe ati, ‘Nze ndi wa Musengwa Katonda,’ era yeebalira mu Baisiraeli.”

⁶ Musengwa Katonda Afuga Amagye, Kyabazinga era Omununuzi wa Isiraeli, akoba ati: “Ninze entoolo era ninze enkomerero, era nze zenka, ninze Katonda. Ezirayo kyetebwa katonda okutoolaku nze zenka.

⁷ Naani ali ng'oti ninze? Bw'aba ng'aliyo, akyogere akikakase mu maiso gange. Naani okuva eira n'eira eyalangiriranga ebyali bija okubaagho? Kale buti leka akobere abantu n'ebyo ebija okubaagho.

⁸ Mutatya era mutawaamu maani. Mukiidhi bukalamu ng'okuva eira n'eira n'okutuusa ye buli eno, mbairenga mbakobera ebiribaagho. Era niimwe abadhulizi bange. Ate eriyo ekyetebwa katonda okutoolaku nze? Ninze zenka ali ng'oti n'olubaale mwe mwewogoma, ezirayo wundi ye ndidhi.”

Okusinza ebitali Katonda kuvumirirwa

⁹ Abo boonaboona abakola ebisinzibwa ebitali Katonda bali agho batyo, bazira kye bagasa naire. N'ebisinzibwa byaibwe ebyo ebibeesiimisa, biziramu muganhulo. N'abo ababisinza batulu beene, era tibaidhi ng'ekyo kye bakola kisobola okubaleetera okuswala obuswale.

¹⁰ Ole akola ekifaananie n'akyeta katonda oba n'akiwumba obuwumbe, aba adaagiire bwereere.

¹¹ Buli alikisinza ensoni dhirimugema, kuba abakola ebifaananie ebyo bantu buntu. Bagwaine boonaboona babaleete babeemereze ghalala, bawozesebwe. Memale olwo batye era baswazibweswazibwe.

¹² Omugheesi bw'aba ali kugheesa ekifaananie ekisinzibwa, atoola ekyuma yaakifuguta mu manda ag'omuliro, yaagema enhundo mu ngalo dhe edh'amaani yaakikonta okukitereeza. Bweyeeyongera okuja ng'akola atyo, endhala emuluma, yaakoogha, era bw'atanhwa ku maadhi awaamu amaani.

¹³ Ate omubaadhi apima omuti n'olukoba, yaagulambaku n'ekalaamu. Yaagulanda n'eranda, era yaagulambaku n'ekyuma ekipima, yaagukolamu ekifaananie ekirungi kyene ekiri ng'oti muntu, eky'okuteebwa mu isabo.

¹⁴ Asobola okutema omuvule mu kibira yaakozesa ogwo, oba yaakozesa omusipuressi, oba omuti omukologho ogundi. Oba yaasimba omuti ogundi, amaadhi gaagwa gaagukuza.

¹⁵ Omuntu oyo atoola ku muti gw'atemye yaakolamu ekisinzibwa ekitali Katonda, era ekifaananie ekyo ekibaadhe yaakikubira amakiryaivu, yaakisinza. Bw'amala, omuti ogusigairegho agufuulamu nku, yaatwala yaakumisa omuliro, yaayota yaasuugha, era yaafumbisa n'emere.

¹⁶ Enku edhindi adhikumisa omuliro yaatalika emamba, yaalya yaiguta. Era yaayota omuliro, yaamala yaakoba ati: “Ha, akaliro akalungi kansuuyiiza!”

¹⁷ Ekitundu kire ekindi eky'omuti akikolamu ekisinzibwa, yaakikubira amakiryaivu, yaakisinza ng'akoba ati: “Nkweghembye mponia, kuba niiwe katonda wange!”

¹⁸ Abantu abo bazira kye baidhi era bazira kye balowooza kikalamu. Baaziba amaiso gaibwe n'emyoyo gyaibwe, baaloba kubona waire okutegeera.

¹⁹ Omuntu akola ekisinzibwa ekitali Katonda, taidhukira waire okwefumintirizaaku mule ati: “Ekitundu ky'omuti ogwo nkikumiisa omuliro naagufumbisa emere, era naatalikaku n'emamba naagirya. Memale obwo ekitundu kyagwo ekisigairegho ate kye nnaafuula ekisinzibwa ekyenhinhalwa, era ni nkikubira n'amakiryaivu, ate nga kiti buti?”

²⁰ Omuntu oyo ali ng'oti n'ole alya eivu. Aba yeerimbye era ng'adaaliimye, nga takaasobola kuwonia bulamu bwe, waire okwebuuzaaku mule ati: “Ekifaananie kye ngemye mu ngalo dhange ti kya buguya bwereere?”

Musengwa Katonda omutonzi era omulokozi

²¹ Musengwa Katonda akoba ati: “Iwe Yakobo idhukiranga ebintu ebyo, kuba oli mugheereza wange iwe Isiraeli. Nakutonda obe mugheereza wange, era tirikwerabira naire.

²² Ndheyiiyaagho ebibi byo byavaagho ng'oti kire, ebyonoono byo ebyo byabulagho ng'oti lufu. Kyuka oire ye ndi, kuba ninze nakununula.”

²³ Iwe eigulu yemba, kuba Musengwa Katonda n'akoze ekyo. Imwe ebitundu ebiri eyo ghansi mu itaka, muleekaane. Imwe ensozi n'emiti gyonagyona egy'omu bibira, mwembe, kuba Musengwa Katonda yanunula baidhukulu ba Yakobo, era alyoleka ekitiisa kye mu Baisiraeli abo.

²⁴ “Ninze Musengwa Katonda Omununuzi waimwe, eyabatonda ni mbata mu nda dha bainhaimwe. Ninze Musengwa Katonda eyakola ebintu byonabyona, ni mmambagho eigulu zenka, era ni nhandhagho ensi nga ghazira angemeireku naire.

²⁵ Ninze mmala amakulu mu ebyo abalaguzi bye balagula, n'ebyo abalogo bye bakola. Ndhuuluusa abagezi bye boogera, naayoleka nti bye beeta eby'amagezi byaga busiru.

²⁶ Aye nkakasa ebyo omugheereza wange by'ayogera, naatuukiriza omukwenda wange oyo by'alangirira. Ekibuga Yerusalemu nkikakasa nga bwe kiidha okubangamu abantu, n'ebibuga bya Buyudaaya ebyayonoonebwa naabikakasa nga bwe birizimbibwa obuyaaka.

²⁷ Ninze ndagira amaadhi g'enhandha amangi gaakala, n'emiiga gyona gyakala.

²⁸ Ninze nkoba Kuro nti, ‘Niiwe omufuzi ye ntairegho otuukirize byonabyona bye nhenda.’ Naalagira Yerusalemu nti, ‘Oidha kuzimbibwa buyaaka,’ era naakoba n'eisinzizo nti, ‘Omusingi gwo gwidha kuteebwagho.’ ”