Isaia 43 - Baibuli Ekibono kya Katonda 2014

Katonda asuubiza okununula abantu be

¹ Aye mpegaano iwe Isiraeli, Musengwa Katonda eyakutonda akoba ati: “Otatya, kuba ndidha kukununula. Era namala irala okukweta eriina lyo, buti oli wange.

² Bw'olibita mu maadhi agenda okukumira, ndiba ghalala n'iwe. Ni bwe galiba ag'emiiga tigalikweyaagho. Ni bw'olibita mu muliro tigulikwokya, ezira kabi kalikutuukaku;

³ kuba ninze Musengwa Katonda wo, Omutukuvu wa Isiraeli era Omulokozi wo. Ndighaayo Misiri olw'okukununula, era naaghaayo Ethiopia ni Seba olw'okukuwonia.

⁴ Ndighaayo abantu kamaala olw'okukuzaawula, era naaghaayo amaghanga mangi ku lw'obulamu bwo; kuba nkugonza inho era nkutwala ng'oli wa mughendo era wa kitiibwa ye ndi.

⁵ Otatya, kuba nze ndi ghalala n'iwe. Ndisoloza abantu bo nga mbatoola e buvandhuba n'e bugwandhuba, naabaiza ghalala.

⁶ Ndiragira oluuyi olw'omukono omugooda olw'e buvandhuba lwabalekula, naalagira n'oluuyi olw'omukono omusaadha olw'e buvandhuba lwaloba kubaloberaku. Olwo mwaleeta batabane bange okuva eyo eghala, era mwaleeta ni baghala bange okuva eyo mu nsi dhoonadhoona.

⁷ Abantu abo boonaboona bange ku bwange, era beetebwa liina lyange. Ekyabantondesa ni mbataagho, n'okumpeesanga ekitiisa.”

Abaisiraeli n'abadhulira Musengwa Katonda

⁸ Katonda akoba ati: “Muleete abantu bange bawozesebwe abatulu abo ate nga bali n'amaiso, era abasigha ate nga bali n'amatu.

⁹ Mwete abantu abamaghanga goonagoona beesololeze ghalala. Naani ku bakatonda baibwe asobola okulanga ebiribaagho, n'atukobera n'ebyaligho eira? Baleete obudhulizi bwaibwe obukakasa nga batuufu, era obudhulizi obwo n'obube bukakase amazima agali mu ebyo bye boogera.

¹⁰ Imwe Abaisiraeli niimwe abadhulizi bange era niimwe abagheereza bange be nalondamu, musobole okuumanha era mundhikirize. Olwo mukitegeere nga ninze Katonda zenka. Tebangayooku katonda yansooka kubaagho, era tighalibaagho alindhiririra naire.

¹¹ Nze zenka, ninze Musengwa Katonda, era nze zenka, ninze omulokozi waimwe.

¹² Imwe nabakobera ebiribaagho era naabalokola. Ghazira katonda wa bamaghanga gandi eyaali akozeeku ekyo, era niimwe abadhulizi bange.

¹³ Nze ninze Katonda okuva eira n'eira, era buliidho ndidha kusigalanga nga ninze Katonda. Ghazira asobola kutoola kintu kyonakyona mu buyinza bwange, era ghazira asobola kukyusaamu mu kye mba nkoze.”

Mulumuke muve e Babiloni

¹⁴ Musengwa Katonda Omununuzi waimwe era Omutukuvu wa Isiraeli akoba ati: “Olw'okwenda okubawonia ndisindika eigye okulumba Babiloni. Ndimenha eminhololo egisiba endhigi dh'ekibuga, era okwasiikana kw'abantu baayo okubaire okw'amasanhu, ndikufuulamu kulira maziga.

¹⁵ Ninze Musengwa Katonda Omutukuvu waimwe, Omutonzi wa Isiraeli era Kyabazinga waimwe.”

¹⁶ Eira einho, Musengwa Katonda oyo n'eyatema oluguudo mu nhandha, yaakola engira mu maadhi amaleeyi.

¹⁷ Yaazikiriza eigye ery'abalwani ab'amaani abaali n'embalaasi n'ebigaali eby'omu lutalo. Baagangalima baagwa obutairayo kusitukagho kabiri, olwo baazima era baawola ng'oti lutambi lwa ntaala.

¹⁸ Aye Musengwa Katonda oyo akoba ati: “Mulobe kwesibirira ku bya ira, waire okwemalira ku byabita.

¹⁹ Mpegaano mulingirire mubone ekiyaaka kye nja okukola. Era nakitandiseeku ira. Timuli kukibona? Nja kutema oluguudo mu irungu, era nte n'emiiga mu nsi eyo enkalukalu.

²⁰ Ensolo edh'omu nsiko dhirintaamu ekitiisa, n'ebibe ni maaya byansaaka; olw'okuba ntaagho emiiga mu nsi enkalukalu naaleetera amaadhi okuba mu irungu, olwo naagha abantu bange be nalondamu okunhwa.

²¹ Abo n'abantu bange, nze mwene be neeteeragho, bansaakenga.”

Okwonoona kw'Abaisiraeli

²² Musengwa Katonda akoba ati: “Aye imwe Abaisiraeli baidhukulu ba Yakobo, nze mwamala mwaneesinwa bwesinwe, mwaloba okunsinza.

²³ Timwandeetera ntaama dhaimwe ng'ebigheebwayo ebyokebwa, waire okuntaamu ekitiisa nga mumpa emisengo. Nze tibakaluubirizangaku nga mbasaba ebigheebwayo, waire okubakooya nga mbapikiriza okumpa obubbaani obw'okuuniokeza.

²⁴ Timwaghaayooku mpiiya kungulira bubbaani buwunha kawoowo, waire okundhigusa n'amasavu g'ensolo dhaimwe. Aye mu kifo ky'okukola ebyo, mwantwika bwa mugugu gwa bibi byaimwe, mwankooya n'ebyonoono byaimwe.

²⁵ Aye era nze, ninze mwene nsonigha ebibi byaimwe nze ku bwange, era tija kabiri kubibavunaana.

²⁶ Mwidhukire eby'eira era tunoonereze ensonga. Mughe empoza yaimwe mwoleke nga bwe muli abatuufu.

²⁷ Dhaadha waimwe eyasooka yakola ebibi, n'abakulembeze baimwe boona baayonoona bansungughaza.

²⁸ Kyenava ni ndeetera abo abalabirira Ekifo Ekitukuvu okunhoomebwa, naaghaayo baidhukulu ba Yakobo okuzikirizibwa, era naaleka Abaisiraeli abo baafuuka nseko dha balamu.”