Isaia 42 - Baibuli Ekibono kya Katonda 2014

Omugheereza wa Musengwa Katonda

¹ Musengwa Katonda akoba ati: “Ono n'omugheereza wange ye mpa amaani, era ye nalondamu aneesiimisa. Namutaamu omwoyo gwange, aleetere amaghanga okusalanga mu mazima.

² Talikaabuka waire okwogera n'amaani, era ghazira alimuwulira ng'alangiriza mu nguudo.

³ Olugada oluvuniike talirukutulamu, n'olutambi olw'entaala olulikufenfeenha taliruzikiza, aye alireetera abantu okukolerwanga eby'amazima ebibagwaniire.

⁴ Taliwaamu maani waire okuwaamu eisuubi. Alireetagho okukolanga eby'amazima mu nsi ebigwaniire. N'ebiketezo eby'oku nhandha biri eyo biteegereire amateeka ge.”

⁵ Musengwa Katonda n'eyatonda eigulu yaalibambagho, era yaayandhagho ensi yaagitaamu n'ebigirimu byonabyona. Abantu ababa mu nsi eyo ni bagitambuliramu, yabataamu omuuka gwe bagheera n'omwoyo ogw'obulamu. Era Musengwa Katonda oyo akoba omugheereza we ati:

⁶ “Nze Musengwa Katonda nakweta oleetere abantu okukolerwanga eby'amazima ebibagwaniire. Nakugema ku mukono naakukuuma. Era ndibita mu iwe naakola endagaano n'abantu boonaboona, era naaleetera amaghanga goonagoona obutangaavu.

⁷ Olizibula abatulu amaiso, waatoola abasibe mu makomera, waabawonia okubanga mu nzikiiza.

⁸ Nze ninze Musengwa Katonda, eryo n'eriina lyange. Ekitiisa kyange tikigabiraku muntu wundi, waire okusaakibwa kwange okukughaaku ebifaananie ebibaadhe.

⁹ Bona, ebintu bye nalangirira eira biibyo bituukiriire. Mpegaano nja kubakobera ebiyaaka, nga bikaali na kutoolera kubaagho.”

Olwembo olusaaka Musengwa Katonda

¹⁰ Mwembere Musengwa Katonda olwembo oluyaaka. Ensi yoonayoona leka emusaake! Enhandha leka ewolome n'ebirimu byonabyona olw'eisanhu N'ebiketezo eby'oku nhandha leka byembe n'ababibaaku boonaboona.

¹¹ Eirungu n'ebibuga ebirimu ka byembere kulala nga bisaaka Katonda, n'abantu ab'e Kedari bamusaake. Abantu b'e Sela leka bakube emizira nga bali ku ngulu ku nsozi.

¹² Abo abali mu biketezo eby'oku nhandha leka basaake Musengwa Katonda, era bamuteemu ekitiisa.

¹³ Musengwa Katonda avaayo, yaaja okulumba ng'omulwani ow'amaani. Ayoleka obukambwe ng'omwisirukale, yaakaabuka ng'ataireku n'enduulu edh'omu lutalo, yaayolesa amaani amabitirivu ag'okulwanisa abazigu be.

Katonda asuubiza okubeera abantu be

¹⁴ Katonda akoba ati: “Mmaze ekiseera nga nsiriike busirike, naaba muguminkiriza era neefuga. Aye mpegaano nja kwasiikana ng'oti n'omukazi ali kulumwa okuzaala, asika omuuka nga tigwidha n'alakalaka obulakelake.

¹⁵ Ndyonoonayonoona ensozi n'obusozi, naakaza eisubi n'emiti ebidhiriku. Emiiga ndigifuula bizinga, naakaza n'ebidiba eby'amaadhi.

¹⁶ Ndikulemberamu abatulu, naababisa mu ngira dhe bataidhi. Enzikiiza ye balimu ndigifuula butangaavu, naasaania aghali ebikonko, baabita aghatereevu. Ebyo ndibibakolera, era tiribalekulira agho.

¹⁷ Abo abeesiga ebifaananie ebibaadhe, ni bakoba ebifaananie ebyakolebwa mu kyuma ekisaanuusiibwa bati, ‘Niimwe bakatonda baife’, ndibaleetera okunhoomebwa n'okuswazibwa.”

Abaisiraeli balemwa okwega

¹⁸ Musengwa Katonda akoba ati: “Muwulire imwe abaasemba amatu, n'imwe abatulu mumoge inho musobole okubona.

¹⁹ Naani omutulu okusinga omugheereza wange? Oba naani eyasemba amatu okusinga omukwenda wange ye ntuma?

²⁰ Iwe Isiraeli oboine bingi, aye ofuniemu makulu ki? Oli n'amatu agawulira, aye kiki kyene ky'owuliiremu?”

²¹ Musengwa Katonda olw'okuba yayenda okulokola abantu, yasalagho okugulumiza amateeka ge, abantu bagatengamu ekitiisa.

²² Aye abantu bano abazigu baabaiba era baabanhaga, era baabatega boonaboona baagwa mu biina, baabasibira mu makomera. Abazigu baabayiiga baabagemya aye nga ghazira abawonia, era baabanhaga aye ghaabulagho abanunula okubaiza.

²³ Naani ku imwe anaawulirisa ekyo? Naani aneetegereza n'amanha ebinaabaagho ye bwidha?

²⁴ Naani eyaghaayo Abaisiraeli okunhagibwa? Naani eyalekulira baidhukulu ba Yakobo abo mu ngalo dh'abanhazi? Ti ni Musengwa Katonda mwene, ye twasungughaza nga tukola ebibi, ni tuloba okukola by'ayenda, era ni tudheemera amateeka ge?

²⁵ Kale kyeyava n'atumaliraku obusungu bwe, era n'atusindikira entalo. Yatutumbukizaaku obusungu bwe ng'oti muliro bwayaka mu Isiraeli mwonamwona, aye twaloba kumanha birigho, bwatwokya aye era twaloba kubaagho ni kye twegamu naire!