Isaia 40 - Baibuli Ekibono kya Katonda 2014

Okulanga ebigumya abantu

¹ Katonda waimwe akoba ati: “Mugumye abantu bange, bwenebwene mubagumye.

² Mwize amaani mu bantu b'omu Yerusalemu. Mubakobe muti mpegaano okudaazibwadaazibwa kukomye, era ebibi byaibwe bisoniyiibwa. Nze Musengwa Katonda namala okubagha ekibonerezo ekibajaamu olw'ebibi byaibwe.”

³ Ghaligho amamiro g'oyo alangirira ati: “Mutegeke Musengwa Katonda gh'anaabita mu nsi enkalukalu, mutereeze oluguudo lwa Katonda waife mu irungu.

⁴ Buli kiiko kiriidhuzibwamu eitaka, buli lusozi na buli kasozi byasendebwa. Engira engodegode dhiritereezebwa, n'edh'ebikonko dhaanhirizibwa.

⁵ Olwo ekitiisa kya Musengwa Katonda kiryeyoleka, abantu boonaboona baakibona. Musengwa Katonda mwene n'akobye.”

⁶ Agho naawulira amamiro nga gakoba gati: “Langirira!” Nze naabuuza nti: “Kiki kye mbe nangirire?” Amamiro gandhiramu gati: “Langirira oti buli ekiri n'omubiri kiri ng'oti isubi, n'omunhiriro gwakyo guli ng'oti kimuli kya mu nsiko.

⁷ Musengwa Katonda bw'agheera obugheere ati omuuka, eisubi liniala n'ekimuli kyamagala. Bwenebwene abantu bali ng'oti isubi, tibaghangaala naire.

⁸ Waire nga kituufu ng'eisubi liniala n'ekimuli kyamagala, aye ekibono kya Katonda kibaagho ebyanda n'ebyanda.”

⁹ Iwe aleetera Sioni amawulire amalungi, niina ghaigulu ku lusozi oluleeyi. Iwe aleetera Yerusalemu amawulire amalungi, kangula ku mamiro, oyogere n'amaani. Okobe ab'omu bibuga by'e Buyudaaya, oti: “Mubone, Katonda waimwe wuuyo aidha!”

¹⁰ Bwenebwene Musengwa Katonda wuuyo aidha ng'afuga n'amaani n'obuyinza. Wuuyo aidha n'ebirabo eby'okugabira abantu be, n'ebibonerezo eby'okwesasuuliza ku bazigu be.

¹¹ Aidha kulabirira entaama dhe ng'oti n'omwayi bw'akola: asoloze edhikaali ento adhibbeedere mu kifuba, ate enzaire edhiyonsa adhitambuze mpola n'obwegendereza.

Katonda tasobola kugezebwa ku bantu

¹² Naani eyaali apimyeku obungi obw'amaadhi g'enhandha ng'agasenesa bwa ngalo dhe? Oba okupima eigulu ng'akozesa bwa mikono gye? Naani eyaali apimyeku obungi obw'enkungu eri ku nsi? Oba okuta ensozi n'obusozi ku minzaani okubipima?

¹³ Naani eyaali alagiireku Musengwa Katonda eky'okukola? Oba okumugalagira ng'omuwi ow'amagezi?

¹⁴ Naani Katonda ye yaali yeebuuziizaaku amughe ku magezi, olwo asobole okusala ensonga mu mazima? Naani eyaali amwegereisaaku asobole okumanha okukola ebintu n'okubitegeera?

¹⁵ Bona eno, Musengwa Katonda abona amaghanga goonagoona nga gaziramu muzindo, ng'oti n'eitondo obutondo ery'amaadhi. Era abona ebizinga nga biwewufu ng'oti nkungu bukungu.

¹⁶ Ensolo edhiba mu bibira eby'e Lebanoni dhoonadhoona aghalala, tidhimala kuvaamu bigheebwayo byokebwa eri Katonda. N'emiti egiba mu bibira ebyo gyonagyona aghalala tigivaamu nku dhimala kukuma muliro gwetaagisa.

¹⁷ Amaghanga goonagoona gali oti ti kintu naire mu maiso ge, gali bwa biwooboloolo.

¹⁸ Kale olwo Katonda tunaamugeza ku ani, oba kiki kye tunaamufaanania?

¹⁹ Tali ng'oti n'ekisinzibwa ekitali Katonda omukozi ky'ayiiya obuyiiye, ate omugheesi w'ebintu bya zaabu n'akirimbyaku zaabu, era n'akitaaku ebintu ebiri ng'oti ndhegere dha feeza.

²⁰ Aye omwavu atasobola kukozesa zaabu oba feeza, alondagho yaakozesa omuti ogutavunda. Yaanoonia omubaadhi omukugu, yaagukolamu ekifaananie ekitaatengeesebwe ni kigwa.

²¹ Obwo bwenebwene timukiidhi era timukiwulirangaku? Ghazira muntu akibakoberangaku okuva mu mainhama? Era timukitegeerangaku okuva ku kutondebwa kw'ensi?

²² Kale ni bwenebwene Katonda oyo n'atyama ghaigulu gh'ensi eneetooloovu. Abantu abagibaaku baboneka nga batini ng'oti masisi. Katonda oyo yabambagho eigulu ng'oti lutimbe, yaalyandhuluza ng'oti weema ya kubaamu.

²³ Oyo n'aleetera abafuzi okugwa, baasigala agho batyo nga bazira bwe bali.

²⁴ Baba ng'oti n'ebimera bye baakasimba, ebikaali kusimba mizi ghala inho mu itaka. Musengwa Katonda oyo bw'asindika empewo ebifuuwa byaniala. Agho empewo erimu kiwunga yaabifuuwa ng'ebitwaliriza ng'oti isubi ikalu.

²⁵ Kale olwo Katonda oyo Omutukuvu tunaamugeza ku ani? Ghaligho omuntu ye tunaamufaanania?

²⁶ Mulinge ghaigulu mubone! Naani eyatonda ebyo ebiri ku igulu? Ni Katonda omulala oyo abiduumira ng'oti igye, n'ayeta buli kirala eriina lyakyo. Era nga bw'ali omukologho ow'amaani agataloodheka, ghaziragho waire ekirala kiti ku ebyo ekitabaagho ng'ayese.

²⁷ Kale imwe baidhukulu ba Yakobo, nkoba imwe Abaisiraeli, lwaki mwemuluguunhia muti Musengwa Katonda tabalumirwa, era muti bwe munhigirizibwa, Katonda waimwe oyo tabafaaku naire?

²⁸ Obwo bwenebwene timukiidhi era timukiwulirangaku? Kale ni bwenebwene Musengwa Katonda oyo ni Katonda atawaagho, eyatonda ensi yoonayoona okuva y'eva okutuuka y'ekanga. Takoogha waire okuwaamu amaani. Era titusobola kutegeera bukalamu magezi ge.

²⁹ Abo abakooye abaizaamu amaani, n'abanafu yaabongeramu amaani.

³⁰ Abaisuka boona bakoogha, n'abakaali abato boona baawaamu amaani.

³¹ Aye abo abeesiga Musengwa Katonda baliiramu amaani: baatambula nga tibakoogha, baaligita embiro nga tibasalaku naire, era baaguluka n'amaghagha ng'oti nkookooma.