Isaia 4 - Baibuli Ekibono kya Katonda 2014

¹ Olunaku olwo bwe lulituuka, abakazi musanvu balyegema omusaadha mulala baamwesibaku, nga bakoba bati: “Ife tuneeyagaliranga beene eky'okulya n'eky'okuvaala. Aye mala gaikiriza twetebwenga bakazi bo, otuwonie okuswalanga olw'obutafumbirwa.”

Yerusalemu balikiiza buyaaka

² Olunaku olwo bwe lulituuka, Musengwa Katonda alireetera ebimera byonabyona n'emiti okuboneka obulungi era nga bya kitiisa. N'ebibala eitaka bye liribaza biriba bikalamu, byawoomera inho abo abaliba bawoniegho mu Isiraeli.

³ Kiisi muntu yeenayeena aliba ng'asigairegho mu Sioni, ng'alondeibwa okusigala nga mulamu mu Yerusalemu, alyetebwa mutukuvu.

⁴ Agho Musengwa Katonda aliba ng'amaze okukozesa obuyinza bwe okusalira omusango abantu b'omu Yerusalemu, n'okubanaazaaku ebibi byaibwe, n'okutoola ku Yerusalemu omusango ogw'obutemo bwe baakikoleramu.

⁵ Musengwa Katonda omusana alitaagho ekire ku Lusozi Sioni ni ku boonaboona abaliba balwesololeizaaku. Ate obwire yaataagho omwosi n'okwaka okw'enimi edh'omuliro. Ekitiisa kya Katonda oyo kirimaamira ekibuga kyonakyona, kyakikuuma.

⁶ Ekitiisa ekyo, omusana kirikingiriza ekibuga kyonakyona okukiwonia olwota, kyakifuula ekifo eky'okwewogomamu okuwona amaadhi ni kiwunga.