Isaia 39 - Baibuli Ekibono kya Katonda 2014

Abakwenda abaava e Babilonia

¹ Mu biseera ebyo, kyabazinga w'e Babilonia ng'ayetebwa Merodaki Baladani, mutabane wa Baladani, yaawulira nga Hezekia bwe yali alwaire era nga bwe yamala n'awona. Agho yaamughandiikira embaluwa, yaagigha abakwenda baagitwala, baatwaliraku n'ekirabo.

² Hezekia yaabasangaalira, yaabalaga eby'obukombe bwe byonabyona ebyali mu iterekero: feeza, zaabu, obuwoowo, omuzigo ogw'omughendo, eby'okulwanisa, ni byonabyona ebyali mu materekero ge. Ghazira kintu waire ekirala kiti ekyali mu kisaagaati kye eky'obwakyabazinga oba mu bwakyabazinga bwe bwonabwona, ky'ataabalaga.

³ Agho Isaia omulanzi yaidha eri kyabazinga Hezekia, yaamubuuza ati: “Abasaadha bano baviiriire gha okwidha y'oli era bakobye ki?” Hezekia yairamu ati: “Baviire mu nsi ya ghala, Babilonia.”

⁴ Era Isaia yaamubuuza ati: “Baboine ki mu kisaagaati kyo eky'obwakyabazinga?” Hezekia yairamu ati: “Baboine ebiri mu kisaagaati kyange eky'obwakyabazinga byonabyona, ghazira kintu kiri mu materekero gange kye ntabalaze.”

⁵ Isaia yaakoba Hezekia ati: “Wulira Musengwa Katonda Afuga Amagye ky'akoba, ati,

⁶ ‘Manha ng'ekiseera kiidha kutuuka, byonabyona ebiri mu kisaagaati kyo eky'obwakyabazinga, n'ebyo badhaadha bo bye baatereka okutuusa buti, batwalibwe e Babilonia. Tighalibaagho waire ekirala kiti ekirisigalagho.

⁷ N'abandi ku batabane bo beene, balibatwala baabalaawa, baafuuka bagheereza ba mu kisaagaati ekya kyabazinga w'e Babilonia.’ ”

⁸ Agho Hezekia yaakoba Isaia ati: “Musengwa Katonda by'ayogeire birungi.” Hezekia oyo yakoba atyo, kuba yalowooza mule ati: “Kasita mu bulamu bwange twidha kubanga mu miraala nga ghazira kitweraliikiriza?”