Isaia 38 - Baibuli Ekibono kya Katonda 2014

Hezekia alwala aye yaamala yaawona

¹ Agho mu biseera ebyo, Hezekia yaalwala inho kumpi afe. Omulanzi Isaia mutabane wa Amozi yaajaayo okumubona, yaamukoba ati: “Musengwa Katonda akoba ati, ‘Tegeka eby'omu ndhu yo bukalamu, kuba oja kufa, toidha kuwona.’ ”

² Agho Hezekia yaakyuka yaalinga eri ekimante, yaasaba Musengwa Katonda ng'akoba ati:

³ “Wo Musengwa Katonda, nkweghemba oidhukire nga bwe mbairenga omwesigwa y'oli, nga ngondera by'ondagira n'omwoyo mulala, era nga nfuba buliidho okukola by'osiima.” Hezekia oyo yaatimbuka, yaalira inho amaziga.

⁴ Agho Isaia bwe yali ava aghali kyabazinga, aye ng'akaali na kubita mu luya olwa ghagati, Musengwa Katonda yaayogera naye.

⁵ Yaamukoba okwirayo akobe Hezekia ati: “Musengwa Katonda, Katonda wa Daudi dhaadha wo akoba ati, ‘Mpuliire ky'onsabye era naabona n'amaziga go. Kale ni bona, ndidha kwongera emyaka ikumi n'etaanu ku bulamu bwo.

⁶ Era ndidha kukuwonia iwe n'ekibuga kino Yerusalemu, nkutoole mu ngalo dha kyabazinga w'e Assiria. Era ndidha kulwaniriranga ekibuga kino.’ ”

⁷ Isaia yairamu ati: “Musengwa Katonda aidha kukugha akamanhiso akakakasa ng'aja kutuukiriza ekyo ky'akobye.

⁸ Ekinsense ekijiira ku ngeri endhuba y'etambulamu, ekiri ku lupimo olw'amadaala kyabazinga Ahazi lwe yakola, Musengwa Katonda oyo aidha kukiizaayo einhuma obuleeyi bwa bigere ikumi.” Kale ekinsense ekyo kyairayo einhuma obuleeyi obwo obw'ebigere eikumi.

⁹ Luno n'olwembo kyabazinga Hezekia owa Buyudaaya lwe yaghandiika ng'amaze okuwona obulwaire bwe:

¹⁰ “Nali nkoba nti nja kufiira mu maani ghagati, nje bansibire e magombe nga nkaali kumalayo myaka gya bulamu bwange.

¹¹ Nali nkoba nti olwo tikairayo kubona Musengwa Katonda, mu nsi ey'abalamu, waire okwirayo okubona abantu abagibaamu.

¹² Obulamu bwange bwantoolebwaku era bwaja nga buweekereragho, ng'oti ni weema ey'omwayi ye basimbwiregho; era ng'oti n'ekighero kye basaze ku lugoye. Omusana gwonagwona n'obwire bwonabwona naalowoozanga nti Katonda aja kumalagho obulamu bwange.

¹³ Nasulanga nga nsinda businde obwire okukya, ng'oti n'ole empologoma y'eri kumemena amagumba. Omusana gwonagwona n'obwire bwonabwona naalowoozanga nti Katonda aja kumalagho obulamu bwange.

¹⁴ Nabanga agho nga nsinda ng'oti nhonhi. Amaiso ganduyirira olw'okulingiriranga eigulu. Wo Musengwa Katonda, idha omponie obuzibu bwe ndimu.

¹⁵ Tiidhi na kya kwogera, kuba Musengwa Katonda mwene n'aleeteire ebyo okubaagho. Ndi n'enaku nhingi ku mwoyo, n'amaani gampoiremu. Era tikaatenduka na ndoolo.

¹⁶ Wo Musengwa Katonda, nze ndidha kubangagho ku lulwo, nga niiwe ompa obulamu. Nkweghembye mponia mbe mulamu.

¹⁷ Bwenebwene okuba n'enaku enhingi nakufunamu omuganhulo; kuba iwe olw'okungonza einho wamponia amagombe agazikiriza, wansonigha ebibi byange byonabyona.

¹⁸ E magombe ezirayo asobola kukwebaza waire okukusaaka. Abafu baba tibakaasuubirira mu bwesigwa bwo naire.

¹⁹ Abalamu bonka n'abakusiima, nga nze bwe ndi kukola olwaleero. Abazaire bakobera abaana baibwe nga bw'oli omwesigwa.

²⁰ Wo Musengwa Katonda, ondokoire. Kale ni twidha kukwemberanga mu bulamu bwaife bwonabwona, nga bwe tukuba entongooli n'endingidi mu isinzizo lyo.”

²¹ Agho Isaia yali amaze okulagira baleete ekitole ky'ebibala ebikaziibwa eby'emitiini, batoolekuuku, bateeku ku ibwa lya Hezekia, asobole okuwona.

²² Era Hezekia yali amaze okubuuza Isaia ati: “Kamanhiso ki akanaakakasa nga ndidha kuwona, era nsobole okuja mu isinzizo?”