Isaia 37 - Baibuli Ekibono kya Katonda 2014

Kyabazinga Hezekia yeebuuzaaku amagezi ku Isaia

¹ Kyabazinga Hezekia bwe yawulira ebibono ebyo, yaakanulamu ebivaalo bye era yaavaala ekutiya olw'enaku. Agho yaaja mu isinzizo.

² Yaatuma Eliakimu eyalabiriranga ekisaagaati kya kyabazinga, ni Shebuna omughandiisi, n'abakulira bakabona, baaja eri Isaia omulanzi mutabane wa Amozi nga bavaire kutiya olw'enaku.

³ Baamukoba bati: “Hezekia akoba ati, ‘Olunaku luno lwa kudaazibwadaazibwa, kubonerezebwa na kuswazibwa. Tuli ng'oti n'omukazi atuusiisa okuzaala, aye ng'aziramu maani gasindika mwana.

⁴ Kyabazinga w'e Assiria yatuma omukungu we akulira bakungu baine boonaboona okwidha okudhooga Katonda omulamu. Musengwa Katonda wo agwaine awulire ebyo byonabyona omukungu oyo by'ayogeire, era amubonereze olw'okubyogera.’ Kale ni sabira abo abanaawonagho ni basigala nga bakaaligho.”

⁵ Abakwenda ba kyabazinga Hezekia bwe baatuusa obukwenda bwe eri Isaia,

⁶ Isaia oyo yaabakoba okwirayo ye musengwa waibwe, bamukobe bati: “Musengwa Katonda akoba ati, ‘Otatya bibono by'owuliire, abakungu ba kyabazinga w'e Assiria bye boogeire nga banvuma.

⁷ Bona eno, ndidha kumutaamu ekidhuubo, mmuleetere okujiira ku lubono lw'awulira nga lwogerwa mu bantu, aireyo mu nsi ye. Era mmuleetere okwitibwa ng'ali eyo.’ ”

Abassiria bairamu kabiri okutiisatiisa Buyudaaya

⁸ Agho omukungu oyo Omuassiria yaawulira nga kyabazinga w'ewaibwe aviire e Lakishi, era ng'ali kulwanisa ab'omu kibuga Libuna, kale ni n'okuja y'ali.

⁹ Agho kyabazinga w'e Assiria baamukobera bati: “Bona, Tirihaka kyabazinga w'e Ethiopia asitwire eigye okukulwanisa.” Bwe yakiwulira, yairamu okugheereza abakwenda ye kyabazinga Hezekia, ng'akoba ati:

¹⁰ “Muje mukobe Hezekia kyabazinga wa Buyudaaya muti, ‘Katonda wo ye weesiga atakulimba ng'akoba ati Yerusalemu tikiidha kugheebwayo mu ngalo dha kyabazinga w'e Assiria.

¹¹ Wawulira bakyabazinga ab'e Assiria bye baakola ensi dhoonadhoona, ni badhizikiriza okudhisaaniagho. Obwo iwe olowooza oti onaawona?

¹² Badhaadha bange baazikiriza ebibuga, Gozani, ni Harani, ni Rezefu, era baazikiriza abantu Abaedeni abaali mu Telassari. Aye ghaalighooku omusambwa waire omulala ogwasobola okubawonia?

¹³ Bakyabazinga ab'ebibuga, Hamathi, ni Arupadi, ni Sefarivaimu, ni Hena, ni Ivva, buti bali gha?’ ”

¹⁴ Kyabazinga yaatoola embaluwa eyo ku bakwenda, yaagisoma. Yaamala yaaja mu isinzizo, yaagyandhuluza mu maiso ga Musengwa Katonda,

¹⁵ yaasaba Musengwa Katonda ng'akoba ati:

¹⁶ “Wo Musengwa Katonda Afuga Amagye, Katonda wa Isiraeli, iwe atyama ku bitonde eby'amaghagha ebyetebwa bikerubi, niiwe Katonda wenka. Niiwe wenka afuga obwakyabazinga bwonabwona ku nsi. Era niiwe watonda eigulu n'ensi.

¹⁷ Wo Musengwa Katonda lingirira obone ebitutuuseeku, era otege kutu owulire ebibono Sennakeribu by'agheereiza okukuvuma, iwe Katonda omulamu.

¹⁸ Wo Musengwa Katonda, mu butuufu bakyabazinga ba Assiria bazikiriiza amaghanga kamaala, baaleka ensi edh'amaghanga ago nga dhifafaagaine.

¹⁹ Baayokya emisambwa gy'amaghanga ago, mu butuufu egitaali Katonda, aye ebifaananie obufaananie abantu bye baakola n'emikono gyaibwe mu miti ni mu mabaale. Ekyo n'ekyaleetera emisambwa egyo okuzikirizibwa.

²⁰ Wo Musengwa Katonda waife, mpegaano ni tukweghembye tuwonie, otutoole mu ngalo edh'Abassiria. Olwo abantu abamaghanga agandi boonaboona basobole okumanha nga iwe, Musengwa Katonda, niiwe Katonda wenka.”

Obukwenda Isaia bwe yagheereza kyabazinga

²¹ Agho Isaia mutabane wa Amozi yaagheereza Hezekia obukwenda obukoba buti: “Musengwa Katonda wa Isiraeli akoba ati awuliire okusaba kwo ku bigema ku Sennakeribu kyabazinga w'e Assiria.

²² Era bino Musengwa Katonda oyo by'akoba ku kyabazinga Sennakeribu oyo, ati, ‘Ekibuga Sioni kikunhoomye kyakusekerera iwe Sennakeribu; era ekibuga ekyo Yerusalemu kikukongoire.

²³ Olowooza oti naani y'ovumye era y'onhoomye? Naani y'okaabukiire era y'oziimwire? Ninze Omutukuvu wa Isiraeli!

²⁴ Otumye abakwenda bo okuneesuutiraku nze Musengwa Katonda, nga bakoba nga bwe wakozesa ebigaali byo eby'omu lutalo, n'oghangula ensozi dhoonadhoona endeeyi edh'omu Lebanoni. Weesuuta ng'eyo bwe watemayo emivule egisinga obuleeyi, era waatemayo n'emiti emisipuressi egisinga bulungi. Waakoba nga bwe waingirira irala mu bibira, mu kitundu ekisinga kuba kizibirivu.

²⁵ Weesuuta nga bwe wasima ensulo, n'onhwa amaadhi mu nsi edh'abagwira. Era ng'ebigere eby'abaisirukale bo bwe byatyankirira ni bikaza emiiga gyonagyona egy'e Misiri.

²⁶ Towulirangaku ng'ebyo byonabyona nabitegeka ira nga byakubaagho? Ebyo bye ndeeteire okubaagho mpegaano, nabyekoota ira mu biseera ebyabita. Kyewava n'ozikiriza ebibuga ebyezungulwirwa ebimante ebigumu, ni bifuuka bwa mmungo ya bimunku.

²⁷ N'abaabirimu kye baava ni baweeramu irala amaani, ni batya einho era ni batabulwa, ni baba ng'oti n'eisubi erimera mu nimiro, era ng'oti n'ebisubi ebimera ghaigulu ku ndhu, ebiniala nga bikaali na kukula.

²⁸ Aye ndidhi byonabyona ebikufaaku, ndidhi buli ky'okola, naamanha na buli y'oja, era naamanha nga bw'oneedundeekezaaku.

²⁹ Mmaze okuwulira nga bw'oneedundeekezaaku, era nga bw'oneekuluntalizaaku. Mpegaano nja kukutunga eirobo lyange mu nhindo yo, nkusibe n'olukoba lwange mu kanwa mwo, nkwiririzeeyo mu ngira yeene ye wabitamu ng'oidha.’ ”

³⁰ Agho Isaia yaakoba kyabazinga Hezekia ati: “Kano n'akanaaba akamanhiso akakwoleka ebinaabaagho: Mu mwaka guno ogusooka mwidha kulya mere emera n'ekula yeene. Ate mu gule ogwokubiri muja kulya endhiraira y'eyo. Aye mu mwaka ogwokusatu mulisiga emere yaimwe mwagikungula. Mulisimba amasamba g'emizabbibu, mwalya n'ebibala byamu.

³¹ Abo abaliwonagho mu Buyudaaya, balisibuka ng'ebimera ebisimba emizi gyabyo ghansi mu itaka, ni bitaaku ebibala ghaigulu.

³² Ghaja kubaagho abaliwonagho mu Yerusalemu, n'abandi abaliva ku lusozi Sioni. Musengwa Katonda amaliriire okutuukiriza ekyo.

³³ “Bino Musengwa Katonda by'akoba ku kyabazinga w'e Assiria, ati, ‘Taidha kwingira mu kibuga kino, waire okulasaayo akasaale. Taidha kukirumba na ngabo, waire okukibungaku emungo y'eitaka ey'okuniiniraku.

³⁴ Engira emuleese yeene eyo yaidha okugema, aireyo nga taingiireeku mu kibuga kino. Nze Musengwa Katonda, ninze nkobye.

³⁵ Ndidha kulwanirira ekibuga kino nkikuume, ku lwange ni ku lw'omugheereza wange Daudi.’ ”

³⁶ Agho obwire obwo, malaika wa Musengwa Katonda yaaja mu kifo Abassiria ghe baasimba weema dhaibwe, yaita abantu emitwalo ikumi na munaana n'enkumi itaanu (185,000). Abantu bwe baazuuka ku nkyo, baaja okulinga bati ng'abo boonaboona mirambo!

³⁷ Agho Sennakeribu kyabazinga w'e Assiria yaavaagho yairayo, yaaja e Nineve yaaba eyo.

³⁸ Olundi bwe yali mu isabo ng'ali kusinza omusambwa gwe Nisiroki, batabane be Adurammeleki ni Sharezeri baamwita n'empiima, baamala baalumukira mu nsi y'e Ararati. Agho mutabane we owundi Esarahaddoni yaamusikira ku bwakyabazinga.