Isaia 35 - Baibuli Ekibono kya Katonda 2014

Engira ey'Obutukuvu

¹ Eirungu lirisagamba, ensi enkalukalu yaamulisa ebimuli.

² Eirungu liryemba lyakuba emizira. Liriboneka bulungi nga lisanhusa ng'oti n'ensozi dh'e Lebanoni, era lyaba igimu ng'oti n'enimiro edh'e Karumeli n'e Sharoni. Abantu boonaboona balibona ekitiisa kya Musengwa Katonda, baabona n'amaani n'obuyinza bwe.

³ Mwize amaani mu mikono gy'abantu egikooye, era mugumye ebivu ebiri kudhugumira olw'okunafugha.

⁴ Mukobe abo abawoiremu amaani muti: “Mube bagumu, mutatya. Mubone, Katonda waimwe ali kwidha okubalokola, yeesasuulize ku bazigu baimwe ng'ababonereza.”

⁵ Olwo amaiso g'abatulu galizibuka, n'amatu g'abasigha gairamu okuwulira.

⁶ Olwo omulema alituuma ng'oti mpongo, ni kasiru yaayemba olw'eisanhu; kuba amaadhi galitimbuka mu nhindo edh'ensulo mu irungu, gaakuuluulira mu nsi eyo enkalukalu.

⁷ Omusenho ogwokya gulifuukamu nhandha, n'eitaka eikalu ery'olubbalangu lyafuuka nsulo dha maadhi. Ekifo ebibe mwe byabanga, mulimeramu isubi na bitoogo.

⁸ Ghalibaagho oluguudo olulyetebwa “Engira ey'Obutukuvu.” Buli atali mulongoofu talibita mu ngira eyo. Era abaligitambuliramu ni bwe baliba abasiru einho, tibaja kubulira mu ngira eyo.

⁹ Eyo teribaayo mpologoma, waire okubaayo ensolo yoonayoona enswankuzi eriidha okutambulira mu ngira eyo. Aye abo Musengwa Katonda b'alinunula n'abaligibitamu.

¹⁰ Abo Musengwa Katonda b'alinunula balisituka bairayo e Yerusalemu nga bemba. Baliba mu masanhu era baaba mu kusagamba enaku dhoonadhoona, ng'enaku n'okusinda biwoiregho.