Isaia 34 - Baibuli Ekibono kya Katonda 2014

Musengwa Katonda alibonereza abazigu be

¹ Imwe abantu ab'amaghanga goonagoona museete kumpi. Abantu mwenamwena mutege amatu muwulire. Iwe ensi idha owulirise, ghalala n'ebikulimu byonabyona.

² Musengwa Katonda asungughaliire amaghanga goonagoona, yaasungughalira n'amagye gaago goonagoona, era yaagaghaayo y'abazigu bagazikirize goonagoona.

³ Abantu abaliitibwa tibaliziikibwa, aye balisigala bw'agho ekiwunha kyagema woonawoona, n'ensozi dhaakuuluula bwa musaayi gwaibwe.

⁴ Endhuba n'omwezi n'emuunienie, birighanuka ku igulu byagwa, eigulu lyazingibwaku ng'oti nzingo ya kitabo. Eby'oku igulu byonabyona birimagala, ng'oti n'amakaba bwe gava ku muzabbibu oba ku mutiini, ni gagwa.

⁵ Musengwa Katonda ng'ali eyo mu igulu, ategeike empiima ye, era eidha kwidha eike ku Edomu, esobole okwita abo boonaboona b'asaliire ogw'okuzikirizibwa.

⁶ Empiima ya Musengwa Katonda erisaabaana omusaayi n'amasavu eby'abantu, yaaba ng'oti bw'esaabaana omusaayi n'amasavu eby'entaama ento n'embuzi, edhimugheebwa ng'emisengo. Musengwa Katonda mwene n'alighaayo omusengo ogwo e Bozira, ng'aita abantu kamaala inho mu nsi Edomu.

⁷ Abantu baliitibwa ng'oti bwa mbogo era baitibwa ng'oti bwa nte nume entototo edh'amaani. Era ensi yaibwe erisaabaana omusaayi, n'eitaka lyaibwe lyagimuka n'amasavu.

⁸ Ekyo n'ekiseera Musengwa Katonda ky'alyesasuuliza ku bazigu ba Sioni, n'ababonereza olw'ebyo bye baakola abantu be.

⁹ Amaadhi ag'omu miiga egy'omu Edomu galiirugala geegema ng'oti koolaasi. Eitaka lyayo lirikyuka lyafuuka buganga bwa salufa. Era ensi eyo yoonayoona erigema omuliro oguli ng'oti gwa koolaasi.

¹⁰ Omuliro ogwo tigulizikira omusana n'obwire, era guliniokanga omwosi lubeerera. Ensi eyo erifuuka bifulukwa ebyanda n'ebyanda, era ghazira muntu aliirayo kugibitamu kabiri.

¹¹ Ebiwigulu n'amakoova n'enhonhi edhindi, n'ebirifuuka byenemu okubanga omwo. Musengwa Katonda alireeta mu nsi eyo okutabukatabuka, yaaleetera n'abakungu baayo okufuuka ng'oti bintuntu eyo bityo ebitakaali na mugaso naire.

¹² Eriba tekaalimu kyabazinga, era nga n'abakulembeze baayo tibakaaliyo.

¹³ Endhu dhaayo dirimeramu amawa, n'ebifo byayo eby'okwewogomamu byameramu ensiko n'enkandwa. Era biribangamu bwa bibe na biwigulu.

¹⁴ Ensolo edh'omu nsiko dhiritambuliranga omwo, n'emizimu gyayetaganiranga eyo. Bwenebwene n'ensolo ey'obwire eriidhanga omwo, yanoonia ekifo agh'okuwuumulira.

¹⁵ Ebiwigulu birizimba eyo ebisu byabyo, byabiikira eyo amagi, byagagonera, byagaalula, era n'ebito byakulira eyo. N'ensega dhoona ensaadha n'enkazi, dhiryesolokezanga eyo.

¹⁶ Mwagaaze mu kitabo kya Musengwa Katonda, musomemu mubone: Mwidha kuzuula nga ku bitonde ebyo tikulibaaku waire ekirala kiti ekitaliba eyo. Era tighalibaagho kisaadha kitaliba na kiinaakyo ekikazi. Musengwa Katonda mwene n'eyalagira bibe bityo, era mwene oyo n'alibisolokeza aghalala.

¹⁷ Musengwa Katonda n'alibigabaniamu ensi eyo, yaabisimbira n'ebiroowa ku bitundu byabyo. Ensi eyo eriba yaabyo ense n'ense, era birigibangamu ebyanda n'ebyanda.