Isaia 32 - Baibuli Ekibono kya Katonda 2014

Kyabazinga ow'obutuufu

¹ Bona, ekiseera kiri kwidha ghabeegho kyabazinga alifugira ku butuufu, ghabeegho n'abakulembeze abalikolera ku mazima.

² Buli muntu ku abo aliba ng'oti kifo kya kwekwekamu okuwona empewo era ng'oti mpuku ya kwewogomamu okuwona kiwunga. Baliba ng'oti miiga gya maadhi mu nsi enkalu ey'eirungu, era ng'oti kinsense eky'ogubaale ogukologho mu kiketezo ekikalukalu.

³ Amaiso gaibwe galibonanga ebizibu by'abantu, n'amatu gaibwe gaawulirisanga ebibaluma.

⁴ Abantu aboogera nga tibasoose kulowooza baliba n'obuguminkiriza, n'enimi edh'abali n'ebiguguma dhiryogera ebitegeerekeka obukalamu.

⁵ Omusiru aliba takaayetebwa ati wa kitiibwa, waire omukupankupania okwetebwa ati wa mazima.

⁶ Omusiru ayogera bya kisiru, era mu mwoyo gwe ayiiya amagezi ga kukola bibi. Mu by'akola tatya Katonda naire, era by'ayogera bivuma bwa Musengwa Katonda. Abali endhala tabagha mere, waire okugha abali endiwo eby'okunhwa.

⁷ Omukupankupania muntu mubi, ni by'akola bibi byereere. Asala amagezi okwitaitana abaavu ng'ayogera eby'obuguya, ni bwe baba nga bye basaba okukolerwa n'ebyo ebituufu bye bagwaniire.

⁸ Aye omuntu omwesigwa alowooza ku kukola bwesigwa, era ebituufu byonka by'agumiraku.

Okusalirwa omusango n'okwizibwa obuyaaka

⁹ Imwe abakazi abali obukalamu mu idembe, muwulire bye nkoba.

¹⁰ Mpegaano muli mu idembe, aye mu mwaka mulala guti gwonka, muliba mu kudhugumira budhugumire, kuba emizabbibu gye mukungula buti, ku olwo tigiryama.

¹¹ Imwe abakazi abali obukalamu mutengere olw'okutya, imwe abali mu idembe mudhugumire. Mutoolemu ebivaalo byaimwe mube madu, mwesibe ekutiya mu nkende olw'enaku.

¹² Mute emikono mu nkoto munakughale, olw'enimiro enungi n'emizabbibu egyama einho,

¹³ n'olw'ensi ey'abantu bange eri kumeramu amawa n'enkandwa. Bwenebwene munakughale olw'amayumba agasanhusa, abantu ge baasagambirangamu mu kibuga ekyo ekyeyagaza.

¹⁴ Kuba ekisaagaati kya kyabazinga balikirekulira bw'agho, n'ekibuga ekyali kikubyeku abantu kyasigala agho kityo. Ensozi n'ebituuti ebirengererwaku, birifuuka bwa mpuku ebyanda n'ebyanda, endogoyi edh'omu nsiko dhaazaanhiranga omwo, n'ebyayo by'abantu byalyanga omwo eisubi.

¹⁵ Aye ekiseera kirituuka, Katonda yaatuyughaku omwoyo gwe okuva ghaigulu. Olwo eribaire eirungu lyafuuka enimiro egimusa ebirime, ate ebaire enimiro egimusa ebirime yaatwalibwa okuba ng'ekibira.

¹⁶ Mu lyali eirungu mulibaamu okujiira ku mazima, era mu nimiro eyo egimusa ebirime mwabaamu okukola ebituufu.

¹⁷ Era olw'abantu okukola ebituufu kirireetera ensi eno okubaamu emiraala, era kyagiviiramu okuba n'obutebenkevu, n'obwesige, ebyanda n'ebyanda.

¹⁸ Abantu ba Musengwa Katonda baliba mu miraala, baatyamisa mu maka gaibwe era baawuumula nga ghazira kibatiisa naire.

¹⁹ Aye amabaale ag'omugozi galikuba ebibira byasaanagho, n'ekibuga kyazikirizibwa.

²⁰ Muliba ba nkabi imwe abalirimiranga okumpi n'amaadhi, ni muba n'ebyayiro buli ghantu, ente n'endogoyi mwe dhiryeyayiranga dheene.