Isaia 31 - Baibuli Ekibono kya Katonda 2014

Katonda aidha kukuumanga Yerusalemu

¹ Bakagwireku abo abaja e Misiri okufunayo obuyambi, abeesiga embalaasi dhaayo, ni beesiga n'abavuzi baadho olw'okuba ab'amaani, era ni beesiga n'ebigaali byayo eby'omu lutalo olw'okuba ebingi einho. Aye ni baaloba okwesiga Musengwa Katonda Omutukuvu wa Isiraeli, waire okumwebuuzaaku abayambe!

² Ate ng'aidhi bukalamu by'akola. Aja yaaleetagho akabi era yaaloba kukyusaamu ky'akobye naire. Yaabonereza abakozi b'ebibi, n'abo ababayambaku okukola ebibi.

³ Abamisiri bantu buntu, se ti Katonda. N'embalaasi dhaibwe dhiri na mubiri, se ti mwoyo mwereere. Musengwa Katonda bw'aligalula omukono gwe okubonereza, abayambi baligangalima, era n'abo be bayamba baagwa, olwo boonaboona baazikirira.

⁴ Agho Musengwa Katonda yankoba ati: “Abaayi ab'ensolo bwebaidha abangi okulumba empologoma eri n'ensolo y'eyiize, tibasobola kugitiisatiisa ni bwe bawowoigana okwekutula. Kale ninze Musengwa Katonda Afuga Amagye, zeena ntyo bwe ndirwanirira olusozi Sioni, nga ghazira kindobera naire.

⁵ Ng'enhonhi bw'eghambaatira abaana baayo okubakuuma, ninze zeena Musengwa Katonda Afuga Amagye ntyo bwe ndidha okukuumanga Yerusalemu, nkirwanirirenga okukiwonia abazigu.”

⁶ Musengwa Katonda era yaakoba ati: “Imwe Abaisiraeli, mwandheemera inho mwakola ebibi. Aye mpegaano mukyuke mwire ye ndi.

⁷ Ku lunaku olwo, mwenamwena mulisuula ere ebisinzibwa ebitali Katonda ebya feeza ni zaabu, imwe beene bye mwekolera ebibaleetera okukola ebibi.

⁸ Abassiria baliitibwa inho mu lutalo, aye nga bantu ti n'ababaita. Abassiria abo balirumuka olutalo, era abaisuka baibwe balifuulibwa bairu.

⁹ Kyabazinga waibwe alitya inho yaalumuka. N'abakungu baibwe baalumuka, era nga bali mu kabuguutano ako, baalekulira agho bendera dhaibwe edh'omu lutalo.” Musengwa Katonda oyo abantu ye basinziza mu Sioni, era ye bookera emisengo mu Yerusalemu, atyo bw'akobye.