Isaia 3 - Baibuli Ekibono kya Katonda 2014

Akatabanguko akaagwa mu Yerusalemu

¹ Bona eno, Musengwa Katonda Afuga Amagye aja kutoola mu Yerusalemu ni mu Buyudaaya, kiisi kintu ekisobozesa abantu okuba abalamu: Aja kutoolagho emere yoonayoona, atoolegho n'amaadhi goonagoona.

² Aja kutoolagho abantu ab'amaani n'abaisirukale, abalamuzi n'abalanzi, abalaguzi n'abakulu b'ebika,

³ n'abo abakulira abalwani amakumi ataanu ataanu, n'ababbede ab'ebitiibwa, n'abawi b'amagezi, n'abakola eby'ekikugu, n'abalengera ebiribaagho.

⁴ Musengwa Katonda alireetera abalenzi obulenzi okufuuka abakulembeze ab'abantu be, era yaaleetera abaana obwana okufuga.

⁵ Abantu balituntuza bantu banaibwe, buli muntu yaakiriga mwine era yaanhigiriza muliraanwa we. Abato balinhooma abakulu, n'abantu abazira kye bagasa baanhooma ab'ebitiibwa.

⁶ Olunaku lwidha kutuuka, abantu ab'omu ndhu endala bakobe owundi ku baganda baibwe bati: “Iwe nga bw'oliku ni ky'ovaala, niiwe obe otukulire, bino ebyonooneibwa obe nga niiwe obifuga.”

⁷ Aye ole alyewozaaku ng'akoba ati: “Tiidha kusobola kuwonia muntu yeenayeena, kuba zeena ewange nzirayo mmere waire eky'okuvaala. Mutaanonda kubakulira.”

⁸ Bwenebwene ekibuga Yerusalemu bakizikiriiza n'ensi Buyudaaya baagireetera okugwa; kuba byonabyona abantu bye bakola ni bye boogera, bivumirira Musengwa Katonda, byanhooma n'ekitiisa kye.

⁹ Okuboolagana kwaibwe kwene kubalumiriza omusango; ebibi byaibwe babikolera gheeru ng'oti n'abe Sodoma, tibabigisaaku naire. Bakagwireku! Kuba beereeseeku beene akabi.

¹⁰ Mukobere abatuufu muti ebyaibwe birungi, kuba baidha kuganhulwanga mu biva mu kukola kwaibwe.

¹¹ Aye ababi bakagwireku! Ebyaibwe bibi, kuba byene bye baakolanga ku bandi, ni byene ebyo bye baidhanga boona okubakolaku.

¹² Abantu bange batuntuzibwa abaana obwana, era abakazi obukazi baabafufunkiriza. Imwe abantu bange, bwenebwene abakulembeze baimwe babakiidhamya, baabaleetera okudaaliima.

Musengwa Katonda asalira abantu be omusango

¹³ Musengwa Katonda asitwike yaidha okulumiriza abantu be, yeetegeike okubasalira omusango.

¹⁴ Musengwa Katonda aja kusalira omusango abakulembeze n'abakungu ab'abantu be, ati: “N'imwe omwamaliriragho amasamba g'emizabbibu, era endhu dhaimwe dhiidhwire bintu bye mwanhagulula ku baavu.

¹⁵ Lwaki mufuutafuuta abantu bange, ni mutentenatentena abantu abaavu mutyo? Nze Musengwa Katonda Afuga Amagye, ninze ndi kubuuza.”

Okulabula abakazi ab'omu Yerusalemu

¹⁶ Musengwa Katonda era akoba ati: “Abakazi b'omu Yerusalemu beebona nga ba ghaigulu, baatambula nga bamadalaiza emitwe, era baamoga bwenzi bwereere. Batambula mpolampola kasaalizo, baaja nga bawolomya obulege bwe bavaala mu bukongoivule.

¹⁷ Aye nze Musengwa Katonda ndidha kuleetera emitwe gy'abakazi b'omu Yerusalemu abo okugwa empaata basigale nga bazira nviiri ku mitwe, era mpembule ebitundu byaibwe eby'ekyama.”

¹⁸ Olunaku olwo bwe lulituuka, Musengwa Katonda alitoola ku bakazi ab'e Yerusalemu ebintu eby'okwewoomya byonabyona ebibaleetera okwekuluntaza: ebyamadholobera bye bavaala mu bukongoivule, ni bye bavaala ku mitwe, ni bye bavaala mu nkoto,

¹⁹ ni bye bavaala ku mikono, ni bye bavaala ku matu. Era alibatoolaku n'ebitambaala bye beeghemberera mu maiso,

²⁰ ni bye beesiba ku mitwe, n'obukomo obuleeta enkabi bwe bavaala ku mikono, n'obunhere bwe beesiba mu nkende,

²¹ n'empeta edh'oku ngalo, n'edh'omu nhindo,

²² n'ebivaalo byaibwe eby'omughendo, n'ebivaalo bye bavaala munda n'ebyo bye bavaala ku ngulu. Era alibatoolaku n'ensawo edh'omu ngalo,

²³ n'embonerwamu dhe beeboneramu, n'engoye dhe baaluka ng'oti butimba n'edho empegheevu, n'ebitambaala eby'oku mutwe, n'engoye edh'okweghemberera.

²⁴ Mu kifo eky'okuwunha akawoowo, baliwunha kivundu; mu kifo eky'okwesiba ensibiro, balyesiba migugha; mu kifo eky'okuba n'enviiri ensunsule obukalamu, baliba na mpaata; mu kifo eky'okuvaala engoye enungi, balivaala kutiya; era obulungi bwaibwe bulifuukamu nsoni.

²⁵ Abasaadha ab'omu Yerusalemu waire abo abalwani ab'amaani, baliitirwa mu ntalo.

²⁶ Endhigi dha Yerusalemu dhiriwowoola amaziga, dhaagegenga. Ate ekibuga Yerusalemu kyene kiriba ng'oti n'omukazi enaku y'ekubye, n'atyama obwagho ku itaka amadu.