Isaia 29 - Baibuli Ekibono kya Katonda 2014

Ebirituuka ku Yerusalemu

¹ Arieli, Arieli, okagwireku! Okagwireku iwe Yerusalemu ekibuga Daudi mwe yasimba weema dhe! Omwaka leka gwire ku gwinaagwo, era n'ogundi gutyo; era leka mukuze ebibinuko nga bwe biiraganwaku,

² memale mbabonereze. Abantu baliwowoola amaziga baanakughala, era ekibuga ekyo kiriba ng'oti alutaari yeene, nga kisaabaine omusaayi.

³ Ndikisimbaku weema dhange okukyezunguluza, naakizingiza n'ebituuti ebirengererwaku, era naakibungaku emungo y'eitaka ey'okuniiniraku okukirwanisa.

⁴ Yerusalemu kiriba ng'oti n'omuzimu ogwekakaba okwogera nga guli ghansi mu itaka; amamiro gaakyo galiwulikana ng'oti kaama bwama okuva eyo mu nkungu.

⁵ “Aye iwe Yerusalemu, waire abazigu bo bali lukunkumuli, balifuumuulwa ng'oti nkungu, n'abalwani baibwe abakambwe olukunkumuli, baliba ng'oti bikaba empewo by'efuuwa ere. Ate amangu geene, mu kaseera buseera,

⁶ nze Musengwa Katonda Afuga Amagye ndibalwanirira, nga nkozesa okutyabuka kw'olukuba okw'amaani, era nga ntengeesa ensi ni musisi. Era ndikozesa n'empewo eyeezungulula n'amaani, naakozesa n'enimi edh'omuliro oguzikiriza kiisi kiri mu ngira yaagwo.

⁷ Agho amaghanga olukunkumuli agalwanisa Arieli ekibuga ky'alutaari ya Katonda, ni galumba ebifo byakyo eby'okwewogomamu era ni gakidaazadaaza, galiwaagho ng'oti kirooto bulooto, ng'oti n'ekintu ole kye yeefaanaaniriiza obwefaanaanirize mu bwire.

⁸ Amaghanga ago olukunkumuli ageesoloza okulwanisa Olusozi Sioni, galiba ng'oti n'omuntu endhala y'eruma n'aloota ng'ali kulya, aye n'azuuka ng'ekaamuluma. Oba ng'oti n'ole ali n'endiwo, n'aloota ng'ali kunhwa, aye ate n'azuuka ng'akaali nayo era ng'emukaziiza gha mamiro.”

Okulabulwa abantu kwe baaloba okufaaku

⁹ Mwesirughaze mufuuke basirusiru! Mwetulughaze mufuuke batulu! Mutamiire nga timunhweire na ku mwenge! Mutagale nga timukombye ku kitamiiza naire!

¹⁰ Musengwa Katonda abaleeteire okuwongera ng'oti n'abaja okutenduka endoolo enhingi einho. Imwe abalanzi, amaze okubaziba amaiso. N'imwe ababoni ababonekerwa, emitwe gyaimwe amaze okugighembaku.

¹¹ Amakulu goonagoona agali mu kubonekerwa, gabafuukiire ng'oti n'ekitabo kye basibyeku akamanhiso ekitasoboka kuwumbululwa naire. Bw'okitwalira ole aidhi okusoma, n'omukoba oti: “Nsomeraamuuku,” airamu ati: “Tisobola, kuba bakisibyeku akamanhiso, tikisoboka kuwumbululwa.”

¹² Bw'okitwalira ataidhi kusoma, n'omukoba oti: “Nsomeraamuuku,” airamu ati: “Tisobola kusoma.”

¹³ Agho Musengwa Katonda yaakoba ati: “Abantu bano baidha ye ndi bantaamu ekitiisa mu bibono bubono, aye ng'emyoyo gyaibwe gindi ghala. Ensinza ye bansinzaamu ejiira ku ndhegeresa na mateeka abantu bye bataagho, ni babigema obugeme mu mitwe gyaibwe ng'oti nkusu.

¹⁴ Kale ni ndikola mu bantu bano ebyewuunhisa n'ebyewuninkiriza. Ndizikiriza amagezi g'abagezi, era naamaliragho irala okumanha okw'abeegerese.”

Eisuubi mu biseera ebiidha

¹⁵ Bakagwireku abo abagezaaku okukweka ku Musengwa Katonda entegeka dhaibwe, era bye bakola ni biba bya mu nzikiiza, nga bakoba bati: “Naani atubona? Era naani aidhi bye tukola?”

¹⁶ Bafuulaniafuulania ebintu inho! Bwenebwene ole asobola okugeza omuwumbi ku itosi obutosi? Ekintu omuntu ky'akoze kisobola okukoba eyakikola kiti: “Ti niiwe eyankola?” Oba, ekiwumbe okukoba eyakiwumba kiti: “Totegeera naire?”

¹⁷ Ekaabulayo akaseera katono, ekibaire ekibira ekizibirivu eky'e Lebanoni bakifuulemu enimiro edhigimusa ebirime, ate ebaire enimiro egimusa ebirime eiremu okuba ekibira.

¹⁸ Ku lunaku olwo, abaasemba amatu baliwulira ng'ekitabo kiri kusomwa, n'amaiso g'abatulu ababaire mu nzikiiza etiisa einho, galimoga gaabona.

¹⁹ Abawombeefu baliiramu kabiri okusagambiranga mu Musengwa Katonda, n'abaavu beesiimiranga mu Katonda oyo Omutukuvu wa Isiraeli.

²⁰ Abantu abakambwe balimalibwagho, abo abeekuluntaza baakomezebwa, n'abo boonaboona abanhumirwa okukola ebibi baazikirizibwa.

²¹ Katonda alizikiriza abo abaghaayiriza banaibwe emisango gye batakoze, n'abo abayamba abaizi ab'emisango ni batabonerezebwa, era n'abo abaguya ni balemesa omutuufu okusalirwa omusango mu mazima.

²² Musengwa Katonda eyanunula Aburahamu kyava n'ayogera ku b'endhu ya Yakobo ati: “Imwe abantu bange, timuliiramu kuswazibwa kabiri, era timuliiramu kusiiwuuka mu maiso lwa nsoni kubagema.

²³ Bwe mulibona ku ebyo bye ndibakolera, ni mubona ku baana be ndibagha, muligulumiza eriina lyange, mwayatula nga bwendi Omutukuvu wa Yakobo, era mwantaamu ekitiisa nze Katonda wa Isiraeli.

²⁴ Abasirusiru balifuuka abategeevu, n'abo abatasiima abeemuluguunhia buli kiseera balisangaala olw'okwegeresebwa.”