Isaia 28 - Baibuli Ekibono kya Katonda 2014

Okulabula obwakyabazinga obuli ku luuyi olw'omukono omugooda olw'e buvandhuba

¹ Obwakyabazinga bwa Isiraeli bukagwireku, olw'abantu baamu okwekuluntaza n'okuba abatamiivu. Ekitiibwa kyaibwe kiri kuwaagho, ng'oti n'engule dh'ebimuli edhinialiire ku mitwe gy'abakulembeze baibwe, abatamiira ni bawaamu.

² Bona, Musengwa Katonda ali n'omuntu we ow'amaani aziramu ntete naire, eyeetegeike okubalumba n'amaani. Omuntu oyo ali ng'oti ni kiwunga namuzisa alimu n'omugozi; ali ng'oti ni kiwunga ow'amaani einho, era ng'oti n'amaadhi ag'omwidhuzo agataalaala ni gaidhula ensi.

³ Okwekuluntaza okw'abakulembeze abatamiivu, alikutyankirira n'ebigere.

⁴ Ekitiibwa ky'abakulembeze abo abatamiivu kiriwaagho mangu ng'oti n'ebibala by'emiti emitiini ebisookereza okwenga, abantu bye babona ni babinoga, era ni babirya amangu geene nga byakenga.

⁵ Olunaku lwidha kutuuka, Musengwa Katonda Afuga Amagye mwene abe ng'oti n'engule y'ebimuli ey'ekitiisa, eri abantu be abaliwonagho.

⁶ Aligha abalamuzi omwoyo ogw'okukolanga amazima, era yaagha abaisirukale amaani okukuumanga emiryango gy'ekibuga, okukiwonia okulumbwa abazigu.

Isaia akoba ku bakabona n'abalanzi abatamiivu

⁷ Bakabona n'abalanzi boona omwenge guboonoine, baatuuka n'okutagala olw'obutamiivu. Abalanzi tibakaategeera ebibalagibwa mu kubonekerwa, ni bakabona tibakaasala bukalamu nsonga dha bantu.

⁸ Emeeza edhiba ghe batyama dhiidhula bwa biseseme, nga ghaziraghooku kifo kitukula naire.

⁹ Bakoba bati: “Oyo yeena ayegeresa ani? Naani eyeetaaga ebyo by'ayegeresa? Koodhi aje ayegerese abato abaakava obw'oku mabeere!

¹⁰ Aja yaayegeresa eisomo ku isomo, ekiragiro ku kiragiro, n'akanhiriri ku kanhiriri.”

¹¹ Aye oba nga tibenda kuwulira bye nkoba, Musengwa Katonda alibeegeresa ng'abita mu bantu abagwira aboogera olulimi olugwira.

¹² Yabakoba okughanga akaseera abo abakooye, bawuumulengaku baghegheere, aye baaloba okuwulira.

¹³ Kale ni, Musengwa Katonda ky'aliva n'abeegeresa eisomo ku isomo, ekiragiro ku kiragiro, n'akanhiriri ku kanhiriri. Olwo baje ekyeinhumainhuma bagwe enume y'ekigwo, olutuula lubagemye babatwale nga basibe.

Ebirituuka ku abo abagha amagezi amabi

¹⁴ Kale muwulire imwe abanhoomi abafuga abantu bano mu Yerusalemu.

¹⁵ Musengwa Katonda akoba ati: “Mwesuuta mbu mwakola endagaano n'okufa, era mbu mwataagho entegeeragana ghagati ghaimwe n'amagombe. Era mukoba muti akabi namuzisa bwe kaliidha, imwe tikalibatuukaku, kuba obulimba n'obuguya bye mufiire obulumukiro bwaimwe obubawonia.”

¹⁶ Kale ni, Musengwa Katonda Afuga Amagye kyava n'akoba ati: “Mubone, ndi kuta mu Sioni eibaale erikakasiibwa nga igumu, libe eibaale ery'omughendo ery'omusingi mu nsonda era likole omusingi omugumu begulugulu. Ndidha kulighandiikaku nti, ‘Okwikiriza okugumu era kubaamu n'obuguminkiriza.’

¹⁷ Okukola amazima n'okulifuuka olukoba olupima, ate obutuufu bwaba akagugha akatereeza ekisenge ekizimbibwa.” Kiwunga alimu omugozi alyeyaagho obuguya bwaimwe bwe mwesiga, amaadhi ag'omwidhuzo gaazikiriza ebyo bye mwesiguliraku.

¹⁸ Olwo endagaano yaimwe ye mwakola n'okufa naagimenhagho, n'entegeeragana ye mwataagho ghagati ghaimwe n'amagombe naagisazaamu. Era akabi namuzisa bwe kaliidha, kalibaleka nga kabatenteinetenteine.

¹⁹ Akabi ako buli lwe kalibitanga, kalibakubanga. Kalibitanga omusana n'obwire. Era buli bukwenda obulivanga ye Katonda, bulyongeranga kubaleetera kutya.

²⁰ Muliba ng'oti n'omuntu asula ku buliri obumpi bw'atasobola kwegololeraku, era nga n'omwebwiko gwona mumpi, ogutasobola kumubunia.

²¹ Musengwa Katonda alisituka okulwana ng'oti bwe yakola ku lusozi Perazimu, era alisungughala ng'oti bwe yakola mu kiiko ky'e Gibeoni. Memale olwo yaakola omulimo gwe ogwo ogwewuunhisa ogutali gwabuliidho, era yaayoleka ebintu bye ebyo by'akola ebyewuninkiriza.

²² Kale ni mulobe kunhoomerera kulabula kuno, tiikulwa ng'endhegere edhibasibye bongera bwa kudhinhwegula; kuba mpuliire nga Musengwa Katonda Afuga Amagye mumalirivu okusaaniagho ensi eno.

Amagezi ga Katonda

²³ Mutege amatu muwulire kye nkoba; mute omwoyo ku bye ndhogera.

²⁴ Omulimi ng'ali kutegeka enimiro ye okugisigamu, akola gwa kutegeka ogwo gwonka ekiseera kyonakyona aghazira kukoma? Ekiseera kyonakyona akimala ku kutoodha na kwandhala mu nimiro eyo kwonka aghazira kulekera?

²⁵ Bw'amala okutereeza eitaka obukalamu, tasigamu buwoowo buwoomesa iva, anetho ni kumino? Era tasiga ngaano ni sayiri mu nhiriri dhaabyo, ate ku mbibi y'enimiro n'asimbayo ebirime ebindi?

²⁶ Omulimi oyo amanha okukola omulimo gwe obukalamu, kuba Katonda we amwegeresa.

²⁷ Obuwoowo bw'anetho tibabusekula na kintu kye bamulungulisa ngaano, n'obuwoowo bwa kumino tibabuniiniaku kigaali kighaluzibwa mbalaasi. Aye obuwoowo obwo bwombi, babukubisa mwigo bwigo okubumulungula.

²⁸ Omuntu tamulungula ngaano ya migaati kadeeberero n'atuuka na kugitentena. Bw'aba ali kuginiiniaku ekigaali ekighaluzibwa embalaasi okugimulungula, agyegendereza yaaloba kumanhiangula mpeke.

²⁹ Amagezi ago goonagoona gava wa Musengwa Katonda Afuga Amagye. Oyo n'omuwi w'amagezi ataloodheka era n'omugezi ekibitiriire, atatuukikaku.