Isaia 26 - Baibuli Ekibono kya Katonda 2014

Musengwa Katonda aligha abantu be obughanguzi

¹ Ku lunaku olwo abantu balyemba olwembo luno mu Buyudaaya, bati: Ekibuga kyaife kigumu begulugulu. Katonda mwene n'eyakizimbaku ebimante ebigumu, era mwene n'akikuuma.

² Mwigulegho emiryango gyakyo, muleke abantu ab'eighanga eryesiga Katonda baingire, abantu abo abakola ebituufu.

³ Wo Musengwa Katonda, abo abagumira ku iwe, obaleetera okuba mu miraala gyenegyene, kuba bakwesiga.

⁴ Mwesigenga Musengwa Katonda ebyanda n'ebyanda, kuba Musengwa Katonda oyo ali ng'oti lubaale olwewogomwamu, aidha kubakuumanga ebyanda n'ebyanda.

⁵ Abo abaali beetwala okuba aba ghaigulu abaisiisa ghansi, yaazikiriza ekibuga kyaibwe ekigumu, yaakigwisa ku itaka ghaasigala bwa nkungu.

⁶ Mpegaano abaavu n'abanaku, n'abali kukityankirira n'ebigere byaibwe.

⁷ Musengwa Katonda atereeza engira ey'abeesimbu; yaagyerula baabita nga ghazira kibatetegania.

⁸ Wo Musengwa Katonda, ife tujiira ku ebyo by'oyenda, era titwerabira liina lyo; kuba mu eryo mwe tufunira bye twegomba.

⁹ Omwoyo gwange gwegomba okuba aghalala n'iwe obwire, era nkunoonia obutakoogha. Kuba bw'osalira abantu emisango mu nsi, olwo beega okukola ebituufu.

¹⁰ Ababi ni bw'obakolera ekisa, tibeega kukola bituufu. Ni mu nsi y'abantu abeesimbu mwona bakoleramu bwa bikyamu, baaloba kubona Musengwa Katonda nga bw'ali omukologho.

¹¹ Wo Musengwa Katonda, iwe ogalwire omukono gwo okubabonereza, aye era ekyo tibakibona naire. Kale iwe babonereze obaswaze nga bwe weesoomera okukola abazigu bo. Balage nga bw'olumirwa abantu bo.

¹² Wo Musengwa Katonda, iwe oidha kutugha tubenga mu miraala, kuba ni bye tukola byonabyona niiwe obireetera okutujiira obukalamu.

¹³ Wo Musengwa Katonda waife, waire ng'abandi baatufugaku, aye niiwe wenka ye twidhi ng'Omufuzi waife.

¹⁴ Abo buti bafu era tibaliiramu kabiri kuba balamu; abo buti mizimu buzimu egitaja kwiramu bulamu naire. Kuba wababonereza waabazikiriza, era tighalibaagho abaidhukira kabiri.

¹⁵ Wo Musengwa Katonda, oleeteire eighanga lyaife okweyongeraku obunene, waagaziya ensalosalo dhaalyo dhoonadhoona, era ekyo kyayongera okukugheesa ekitiisa.

¹⁶ Wo Musengwa Katonda, abantu bo bwe baali mu buzibu, baidha baakwagala y'oli; bwe wabakangaivula, baakusaba nga bakweghemba.

¹⁷ Wo Musengwa Katonda, ng'omukazi ali enda bw'ayana ng'ali kulumwa ebisa by'omwana, ni yeegoniola ng'ebiseera bye eby'okuzaala bituuse, twena tutyo bwe twabanga mu maiso go.

¹⁸ Twaba enda, twalumwa okuzaala, aye ghazira kye twazaala. Tuzira kya mugaso kye tufuniemu, waire okubaaku n'obughanguzi bwe tuleetera ensi yaife.

¹⁹ Abantu bo abaafa baliba balamu kabiri, emibiri gyaibwe gyairamu obulamu. Abo boonaboona abalambaire e magombe, balisituka baayemba olw'eisanhu. Ng'amatondo g'omusulo gw'oku nkyo bwe galeetera ebimera ku nsi okwiramu okuboneka obulungi, ni Musengwa Katonda atyo bw'aliiza obulamu mu abo abaafa eira.

Okusalirwa omusango n'okwizibwa obuyaaka

²⁰ Mwidhe imwe abantu bange, mwingire mu ndhu dhaimwe, mweigalize mwegise omwo okumala akaseera, okutuusa obusungu bwa Katonda lwe buliwaagho.

²¹ Musengwa Katonda wuuyo ali kuva mu igulu y'aba, ng'aidha okubonereza abantu ku nsi olw'ebibi byaibwe. Abantu abaatemulwa mu ngiso balimanhibwa mu lwatu. Eitaka liriba tirikaasobola kugisa abo abaitibwa.