Isaia 25 - Baibuli Ekibono kya Katonda 2014

Olwembo olw'okusaaka Musengwa Katonda

¹ Wo Musengwa Katonda wange, ndidha kukugulumizanga era nsaakenga eriina lyo. Kuba okoze ebyewuninkiriza, waatuukiriza n'obwesigwa n'amazima ebyo bye wategeka okukola okuva eira.

² Ebibuga obireeteire okufuuka emungo dh'ebimunku, waazikiriza ebifo byamu eby'okwewogomamu. Ebisaagaati eby'abazigu baife eby'obwakyabazinga tibikaaligho, era tibiriiramu kuzimbwa kabiri.

³ Abantu b'omu maghanga ag'amaani baidha kukughanga ekitiisa; n'ebibuga by'amaghanga amakambwe biidha kukutyanga.

⁴ Niiwe obulumukiro abanaku n'abaavu mwe bafunira obuyambi, niiwe ekifo mwe beewogoma okuwona kiwunga, era niiwe ekiwoleeze ekibakingiriza ni bawona olwota. Kuba obuluukuuli bw'abakambwe buli ng'oti n'amaadhi agalimu kiwunga bwe gasaamira ebimante,

⁵ era bwaba ng'oti n'olwota bwe lumamula mu nsi enkalu. Aye iwe Musengwa Katonda osiriisa abazigu baife, waakomya okwasiikana kw'abakambwe abo, ng'oti n'ekire bwekiwoleezaaku ku lwota lw'omu kasana ghagati.

Musengwa Katonda ategeka embaga

⁶ Ku lusozi luno Sioni, Musengwa Katonda Afuga Amagye alifumbira amaghanga goonagoona embaga, ng'eriku emere esinga bulungi n'omwenge gw'emizabbibu ogusinga bulungi.

⁷ Alizikiriza ku lusozi luno enaku egemye abantu mu maghanga goonagoona n'ebafundekeza.

⁸ Musengwa Katonda alizikiriza okufa kwasaaniragho irala ebyanda n'ebyanda. Alyeya abantu be boonaboona amaziga, yaatoolagho n'okuswazibwa kwe baali nakwo mu nsi yoonayoona. Musengwa Katonda oyo mwene n'ayogeire.

⁹ Ku lunaku olwo balikoba bati: “Mubone, Katonda waife wuuno. Tubairenga tumuteegerera okwidha okutuwonia. Ono ni Musengwa Katonda ye tubairenga tuteegerera, mpegaano ka tusangaale era tusagambe, kuba atulokoire.”

Musengwa Katonda alibonereza Moabu

¹⁰ Musengwa Katonda alikuuma olusozi luno Sioni, aye Abamoabu balityankirirwa ng'oti n'eisubi bwe balityankirira mu busa okukolamu ebigimusa.

¹¹ Balyandhuluza emikono gyaibwe ng'oti n'omuntu ali kwewuga mu maadhi, aye Musengwa Katonda alibamala amaani ago agabaleetera okwekuluntaza.

¹² Alizikiriza ebifo byaibwe eby'okwewogomamu n'ebimante byaibwe ebigulumivu, yaabigwisa ghansi ku itaka okutuukira irala mu nkungu.