Isaia 23 - Baibuli Ekibono kya Katonda 2014

Ebyalangibwa ku Tiro ni Sidoni

¹ Buno n'obukwenda obugema ku Tiro. Muwowoole amaziga imwe ab'amaato g'e Tarushishi. Ekibuga kyaimwe Tiro bakizikiriiza, tighakaaligho ndhu oba kifo kya kwewogomamu. Amawulire ago gabatuuseeku nga gaviira mu nsi Kupuro.

² Musirike be kye, imwe ababa ku bukalu bw'enhandha imwe abasuubuzi b'e Sidoni. Mwatuma abakwenda nga babitira ku maadhi,

³ baasaabala enhandha okuja okugula engaano y'e Misiri, eyakuzibwa omwiga Kiyira, baaja baasuubulagana n'amaghanga agandi.

⁴ Oswaire iwe Sidoni! Enhandha ekwegaine n'amaadhi gaayo amangi, eti: “Nze tirumwangaku kuzaala, era tizaalangaku naire. Tikuzangaku mwana, k'abe mulenzi oba mughala.”

⁵ Amawulire ag'okuzikirizibwa kwa Tiro bwe galituuka e Misiri, abaayo baliwaamu n'omwoyo.

⁶ Muwowoole amaziga imwe abatyamye b'oku bukalu bw'enhandha, era mulumukire e Tarushishi.

⁷ Bwenebwene kino n'ekibuga ky'e Tiro ekisangaavu ekyazimbibwa eira einho? Ekibuga ekyavangamu abantu ni baja okusenga mu biketezo eby'e ghala?

⁸ Naani eyaleetera ebyo okutuuka ku Tiro ekibuga bakyabazinga mwe batyama, era ekibuga ekirimu abasuubuzi abakologho, abazira muntu wundi abasinga kuba na kitiibwa mu nsi?

⁹ Musengwa Katonda Afuga Amagye n'eyaleetera ebyo okubaagho, asobole okumalagho okwekuluntaza kwaibwe, era aise ghansi abo abazira muntu wundi abasinga kuba na kitiibwa mu nsi.

¹⁰ Imwe abatyamye b'e Tarushishi, mwidhule ensi ng'oti n'omwiga Kiyira bwe gwidhula ni gubanda n'okubanda. Buti tighakaaligho kibalobera, ensi yaimwe.

¹¹ Musengwa Katonda agololeire omukono gwe ku nhandha, yaayuuzayuuza obwakyabazinga bungi. Alagiire ebifo eby'okwewogomamu eby'e Kanaani babizikirize.

¹² Akobye ati: “Iwe ekibuga Sidoni, eisanhu lyo likomye, abantu bo bali kutuntuzibwa. Ni bwe banaalumukira e Kupuro, yoona tibalifunirayo miraala.”

¹³ Baali Bababiloni abaafuula Tiro ekifo eky'ensolo edh'omu nsiko, se ti Bassiria. Baakizimbaku ebituuti ebirengererwaku, baakizingiza okukyezunguluza, baamenha endhu dhaamu, era baazikiriza byonabyona ebyakirimu.

¹⁴ Muwowoole amaziga imwe ab'amaato g'e Tarushishi, kuba ebifo byaimwe eby'okwewogomamu babizikiriiza.

¹⁵ Olunaku olwo bwe lulituuka, abantu balyerabira Tiro, okumala entangama ya myaka nsanvu, egiri ng'oti n'egya kyabazinga gy'amala ng'ali kufuga. Egyo bwe giriwaaku, Tiro kiriba ng'oti ni malaaya mu lwembo luno:

¹⁶ “Iwe malaaya ye beerabira, gema entongooli, oje ng'otambulatambula mu kibuga. Ogikube bukalamu nga bw'oyemba olwembo olunhuma, memale olwo bakwidhukire.”

¹⁷ Emyaka ensanvu bwe giriwaaku, Musengwa Katonda alireka Tiro kyaira ku bye kyakolanga eira. Kiriiramu kabiri okusuubulagana n'obwakyabazinga bwonabwona ku nsi.

¹⁸ Ebirivanga mu kusuubula kwakyo, balibighangayo byaba bya Musengwa Katonda. Abantu abasinza Musengwa Katonda balibikozesanga okugula emere n'engoye bye beetaaga, mu kifo ky'okubitereka ni byebunga obwa agho.