Isaia 22 - Baibuli Ekibono kya Katonda 2014

Ebyalangibwa ku Yerusalemu

¹ Buno n'obukwenda obugema ku kyetebwa Ekiiko eky'Okubonekerwa. Kiki ekibatuuseeku ekibaniiniisa mwenamwena, ni muja ghaigulu ku busolya bw'endhu?

² Iwe ekibuga ekiidhwire okwasiikana, akeegugungo n'okusasamala, abantu bo abaitiibwa, tibaitiibwa mpiima waire okufiira mu lutalo.

³ Abakulembeze bo boonaboona baalumuka, era abazigu baamala baabagema nga tibalasiisaaku kasaale waire akalala kati. Abazigu baagema abo boonaboona be baayagaana, waire nga baali balumwike nga batuuse ghala.

⁴ Agho naakoba nti: “Muleke kuuningirira. Muje ere, mundeke nze ndire enaku yange, olw'abantu bange be nfiiriirwa. Mutadaaga na kunsaasira.”

⁵ Kino kiseera kya kutya kungi, kutyankirirwa, na kusoberwa, ebyo nga Musengwa Katonda Afuga Amagye by'atutuusiisaaku mu Kiiko kino eky'Okubonekerwa. Ebimante by'ekibuga kyaife babiguumwireguumwire byagwa ghansi, abantu baakubira enduulu eyo mu nsozi nga benda babayambe.

⁶ Abaisirukale b'omu nsi Elamu baidhira ku bigaali by'omu lutalo ni ku mbalaasi, nga bagemye obulaso n'obusaale. N'abaisirukale b'omu nsi Kiri baidha nga bagemye engabo.

⁷ Ebiiko bya Buyudaaya ebisingamu bugimu byaidhula bwa bigaali bya mu lutalo. Abaisirukale ab'oku mbalaasi beesimba ku miryango gy'ekibuga Yerusalemu.

⁸ Olwo obusobozi bwa Buyudaaya okwekuuma abazigu, bwaba nga tibukaaligho naire. Ebyo nga bimaze okubaagho, mwaja mwaleeta eby'okulwanisa okuva mu eyetebwa Endhu ey'Ekibira.

⁹ Mwabona ng'ebituli biri kamaala bye baawomola mu kimante ky'oku kibuga Yerusalemu. Agho mwaleeta ghalala amaadhi g'omu kidiba ky'eifo,

¹⁰ era mwabala endhu edhaali mu Yerusalemu dhoonadhoona, mwamenhaku edhindi okufunamu eby'okuzimbisa buli aghaawomolwa.

¹¹ Mwasima ekidiba mu kibuga, okukuumiramu amaadhi agava mu kidiba kire ekikaire. Aye timwafaayo ku Katonda eyategeka okuva eira ng'ebintu ebyo byakubaagho, era n'abireetera okubaagho.

¹² Era mu biseera ebyo, Musengwa Katonda Afuga Amagye, yali ali kubeeta mulire era mube mu nnaku, mumwe ku mitwe gyaimwe enviiri okudhimaliriraku ng'oti mpaata, era muvaale ekutiya.

¹³ Aye mu kifo ky'okukola mutyo, imwe mwaira bwa mu masanhu na kusagamba, mwaita ente n'entaama, mwalya emamba era mwanhwa n'omwenge. Eno nga mukoba muti: “Ka tunhwe era tulye, kuba enkyo tuja kwefiira.”

¹⁴ Musengwa Katonda Afuga Amagye yankoba ati: “Bwenebwene ekibi ekyo tija kukibasonigha okutuusa lwe mulifa.” Musengwa Katonda oyo Afuga Amagye atyo bw'akoba.

Okulabula Shebuna

¹⁵ Musengwa Katonda Afuga Amagye, yankoba ati: “Ja eri Shebuna omughanika alabirira ekisaagaati kya kyabazinga, omukobe oti,

¹⁶ ‘Weeyeta ki iwe? Era naani akwidhi weena, memale obwo otuuke n'okwesimira amagombe mu lubaale?

¹⁷ Kale ni waire ng'oli w'amaani otya, Musengwa Katonda aliidha yaakugingulagho, yaakusuula ere bya ntaka.

¹⁸ Bwenebwene alikusikambulasikambula, yaakukanhuugirira ere ng'oti mupiira, waagwa eyo mu nsi enene. Olifiira eyo, n'ebigaali byo eby'omu lutalo bye weesuuta nabyo byasigala eyo. Bwenebwene oswaza n'okuswaza ab'endhu ya musengwa wo.

¹⁹ Musengwa Katonda alikutoola ku bukulu bw'oliku, yaakughanula mu kifo kyo ekya ghaigulu, yaakusuula ghansi.’ ”

²⁰ Musengwa Katonda yaakoba Shebuna ati: “Olunaku olwo bwe lulituuka, ndyeta omugheereza wange Eliakimu mutabane wa Hilikia,

²¹ naamuvaaza ekivaalo kyo eky'obukulu bw'oliku, naamusiba n'olusibiro lwo, era naamugha n'obuyinza bw'obaire oli nabwo. Aliba ng'oti ni lata ow'abatyamye b'omu mu Yerusalemu era ow'Abayudaaya boonaboona.

²² Ndimugha obuyinza bwonabwona obw'okulabirira eby'obwakyabazinga bwa Daudi. Ndimugha n'ebisimuluzo, nga bw'aba aigwiregho tighabaagho asobola kwigalagho, era nga bw'aba aigairegho tighabaagho asobola kwigulagho.

²³ Ndimuleetera okugumira mu kifo kye, ng'oti n'enkondo ye bakomereire n'eguma, era alireetera ab'endhu ya ise okuteebwamu ekinhagansi.

²⁴ “Aye ab'endhu ya ise abo balimutwika ebizibu byaibwe, byamuzitoogherera ng'oti n'enkaayi, n'ebikopo, n'ebikozesebwa ebindi ebighanikiibwa ku nkondo ni bigirengeedheraku.”

²⁵ Musengwa Katonda Afuga Amagye akoba ati: “Olunaku olwo bwerulituuka, enkondo ye baali bakomereire mu kifo kyayo n'eguma, erisimbukayo yaagwa. Era eyo n'eriba enkomerero y'ebyo byonabyona ebigighanikiibwaku.” Musengwa Katonda n'ayogeire.