Isaia 20 - Baibuli Ekibono kya Katonda 2014

Omulanzi atambula madu ng'akamanhiso

¹ Agho kyabazinga Sarugoni ow'e Assiria yaatuma omuduumizi w'eigye lye, yaidha yaalumba ekibuga Ashidodi era yaakigema.

² Mu kiseera kyene ekyo Musengwa Katonda yaakoba Isaia mutabane wa Amozi ati: “Ja otoolemu ekutiya y'ovaire, otoolemu n'engaito mu bigere.” Isaia yaakola atyo, yaatambula ng'ali madu era ng'azira ngaito mu bigere.

³ Musengwa Katonda yaakoba ati: “Omugheereza wange Isaia amaze emyaka esatu ng'atambula madu, okwoleka ebirituuka ku b'e Misiri n'ab'e Ethiopia.

⁴ Kale ni kyabazinga w'e Assiria yeena atyo bw'alitwala abanhage ab'e Misiri n'ab'e Ethiopia, abakulu n'abato, nga bali madu era nga bazira na ngaito mu bigere. Balija batyo nga n'obunhuma bwaibwe ti bughembe bwaku, ekyo kireetere Misiri okuswala.

⁵ Abo abaali beesigulira ku Ethiopia okubabeera, n'abaali beenhumiriza mu Misiri, balisoberwa baawaamu n'eisuubi.

⁶ Olunaku olwo bwe lulituuka, abantu ababa ku mbali kw'enhandha balikoba bati, ‘Oboine ekituuse ku be twesigulirangaku tuti balituwonia kyabazinga w'e Assiria? Kale obwo ife tuliwona tutya?’ ”