Isaia 2 - Baibuli Ekibono kya Katonda 2014

Emiraala egitaliwaagho

¹ Buno n'obukwenda obugema ku Buyudaaya ni Yerusalemu, Katonda bwe yagha Isaia mutabane wa Amozi.

² Olunaku lwidha kutuuka, olusozi oluliku eisinzizo, lube nga n'olusinga buleeyi mu dhoonadhoona, era nga lusooloobye n'obusozi bwonabwona. Abantu abamaghanga kamaala balisomboka, baidha ku lusozi olwo,

³ abantu abangi abo balikoba bati: “Mwidhe tuje ku lusozi lwa Musengwa Katonda, mu isinzizo lya Katonda wa Isiraeli, atwegerese by'ayenda tukole, era tujiire ku ebyo by'atwegeresa; kuba Musengwa Katonda aba eyo mu Yerusalemu yaayegeresa abantu be, era aba eyo mu Sioni yaayogera n'abantu be.”

⁴ Musengwa Katonda aliramula amaghanga, yaasalira abantu kamaala emisango gyaibwe. Edhibaire empiima dhaibwe edh'okulwanisa balidhigheesaamu mbago, ate amafumo gaibwe baagagheesaamu busolobyo bwa kuwoolera. Amaghanga tigaliirayo kugema bya kulwanisa kuja kulumba gainaago, waire okwirayo okutendekebwa mu by'entalo.

⁵ Kale ni, imwe baidhukulu ba Yakobo, mwidhe tutambulire mu butangaavu bwa Musengwa Katonda.

Okwekuluntaza kuja kumalibwagho

⁶ Wo Katonda waife, bona olekuliire agho abantu bo baidhukulu ba Yakobo. Ensi yaibwe bagiidhwiza bya bulogo ebiva e buvandhuba, n'eby'obulaguzi ebiva mu Filisitia. Era bajiira ku mpisa dh'abagwira.

⁷ Ensi yaibwe eidhwire feeza ni zaabu, era obukombe bwaibwe tibukoma. Ensi yaibwe eidhwire mbalaasi, era ebigaali byaibwe eby'omu lutalo tibiwaayo.

⁸ Ensi yaibwe eidhwire ebisinzibwa ebitali Katonda, abantu baasinza ebyo beene bye bakola n'emikono gyaibwe; ebintu obuntu bye bakola n'engalo dhaibwe.

⁹ Omuntu owabuliidho yaakuba amakiryaivu, n'omukungu yeena yeewombeeka. Kale ni, Wo Musengwa Katonda, otabasonigha naire.

¹⁰ Muje mwingire mu mpuku edh'omu gabaale, mwegise ni mu biina mu itaka, mulumuke Musengwa Katonda atiisa, oyo ow'ekitiisa era ow'obuyinza.

¹¹ Olunaku lwidha kutuuka, okwekuluntaza okuli mu bantu kumalibwegho, n'okwegulumiza kwaibwe kusaanizibwegho. Ku olwo, Musengwa Katonda yenka n'aligulumizibwa.

¹² Kuba ghaligho olunaku, Musengwa Katonda oyo Afuga Amagye lw'aliikizaaku ghansi, abo abeekuluntaza ni beebona nga ba ghaigulu, n'abo abeekudumbaza ni beegulumiza.

¹³ Musengwa Katonda alizikiriza emiti emivule gyonagyona egy'e Lebanoni egyaleegherera ni gigungumala, era yaazikiriza n'emiti emikologho gyonagyona egy'e Bashani.

¹⁴ Alisaaniagho ensozi dhoonadhoona endeeyi, yaasaaniagho n'obusozi bwonabwona obugungumavu.

¹⁵ Alisaaniagho kiisi kituuti ekirengererwaku ekireeyiriri, yaasaaniagho na kiisi kifo kya kwewogomamu.

¹⁶ Alisaaniagho amaato goonagoona ag'e Tarushishi, yaasaaniagho n'ebintu byonabyona ebyakolebwa ebisanhusa okubona.

¹⁷ Okwekuluntaza okuli mu bantu kulimalibwagho, n'okwegulumiza kwaibwe kwasaanizibwagho. Ku olwo Musengwa Katonda yenka n'aligulumizibwa.

¹⁸ N'ebisinzibwa byonabyona ebitali Katonda biriweekereragho irala.

¹⁹ Abantu balingira mu mpuku edh'omu gabaale, ni mu biina mu itaka, nga balumuka olw'okutya Musengwa Katonda ow'ekitiisa era ow'obuyinza, lw'alisituka okwidha okudhugumiza ensi.

²⁰ Ku lunaku olwo, abantu balisuula ere ebisinzibwa ebitali Katonda ebya feeza ni zaabu. Ebintu ebyo beene bye beekolera okubisinzanga, balibirekera mpube na buwundowundo,

²¹ beene baingira mu mpuku edh'omu gabaale, ni mu ntanda edh'omu nsozi, nga balumuka olw'okutya Musengwa Katonda ow'ekitiisa era ow'obuyinza, lw'alisituka okwidha okudhugumiza ensi.

²² Muve ku kwesiganga abantu, kuba, okutoolaku omuuka ogw'omu nhindo gwe bagheera, kiki ekindi eky'omughendo kye bali nakyo?