Isaia 19 - Baibuli Ekibono kya Katonda 2014

Katonda alibonereza Misiri

¹ Buno n'obukwenda obugema ku Misiri. Bona, Musengwa Katonda atyaime ku kire ekirumuka embiro, ali kukivuga ng'aja e Misiri. Ebisinzibwa ebitali Katonda eby'e Misiri bija kudhugumira mu maiso ge, n'Abamisiri emyoyo gija kubatekemuka.

² Musengwa Katonda akoba ati: “Ndisiikuula Abamisiri baalwanagana beene na beene, aboluganda baalwanagana beene na beene, ab'omuliiraano baalwanagana beene na beene, ebibuga byalwanagana buli kirala ni kiinaakyo, ni bakyabazinga baalwanagana buli mulala ni mwine.

³ Ndivuyavuya entegeka dh'Abamisiri, naabaleetera okuwaamu amaani. Balyebuuza ku misambwa, ni ku balogo, ni ku balaguzi, ni ku b'amaghembe.

⁴ Ndighaayo Abamisiri abo, naabataaku omufuzi omukakali kaabuluuku; kyabazinga omukambwe yaabafuga. Nze Musengwa Katonda Afuga Amagye ntyo bwe nkobye.”

⁵ Amaadhi ag'omwiga Kiyira galikendeera, omwiga ogwo gwaja nga guseenena okutuusa okukala.

⁶ Emyala egigufukamu amaadhi giriwunha ekivundu, era gyaja nga giwaamu amaadhi okutuusa okukala, n'ebitoogo byaniala.

⁷ Eisubi n'ebintu ebirimiibwa ku mbali kw'omwiga ogwo biriniala byafa, empewo yaabifuuwa ere.

⁸ Ab'amalobo n'obutimba abavuba ebyenhandha mu mwiga ogwo, balinakughala baalira amaziga.

⁹ Abalusi b'engoye empegheevu n'edha pamba, baliwaamu amaani beinhamira.

¹⁰ Abakugu mu kuluka ni mu kukola ebintu ebindi balisoberwa, n'abo boonaboona abapangisibwa okukola emirimo baanakughala.

¹¹ Abakulembeze b'e Zoani baweereereimu irala amagezi; abawi ba kyabazinga ab'amagezi abo, amagezi ge bamugha ga kisiru, kuba bakana batya bwenebwene ni bamukoba bati mbu beene n'abaana abaasikira abawi b'amagezi ab'eira, era mbu n'abaana abaasikira ni bakyabazinga ab'eira?

¹² Iwe kyabazinga w'e Misiri, abagezi abo abakugha amagezi bali gha? Ka bakukobere omanhe, oba nga baidhi akabi ke ntegekeire Misiri nze Musengwa Katonda Afuga Amagye.

¹³ Abakulembeze ab'e Zoani baafuuka basiru, n'ab'e Menfisi baabuzibwabuzibwa. Mu kifo ky'okukulembera ensi Misiri, bagireeteire kudaaliima budaaliime.

¹⁴ Musengwa Katonda abaleeteire okugha abantu amagezi agabawubisawubisa, ekyo kyaleetera ab'omu Misiri okudaaliima mu byonabyona bye bakola, baaba ng'oti n'omutamiivu bw'atagalira mu biseseme bye mwene by'aseseime.

¹⁵ Mpegaano mu Misiri timukaalimu muntu akola bigasa, k'abe mukulu oba muto, k'abe mukulembeze oba akulemberwa.

Misiri erisinza Musengwa Katonda

¹⁶ Olunaku olwo bwe lulituuka, Abamisiri baliba bati inho ng'oti bakazi. Balitya era baadhugumira, bwe balibona nga Musengwa Katonda Afuga Amagye agalwire omukono okubabonereza.

¹⁷ Eighanga Buyudaaya lirireeteranga Abamisiri okutya einho. Buli aliwuliranga nga balyogeraku alityanga inho, olw'akabi Musengwa Katonda Afuga Amagye k'ategeike okubakola.

¹⁸ Olunaku olwo bwe lulituuka, abantu balyogera olulimi Olukanaani mu bibuga bya Misiri bitaanu, era baalayira mu liina lya Musengwa Katonda Afuga Amagye. Ekibuga ekindi ku ebyo balikyeta, Ekibuga ky'Endhuba.

¹⁹ Olunaku olwo bwe lulituuka, mu nsi Misiri balizimbamu alutaari yaaba ya Musengwa Katonda, ni ku nsalosalo y'ensi eyo balimuzimbirayo empango ey'amabaale.

²⁰ Obwo buliba bumanhiso obwoleka nga Musengwa Katonda Afuga Amagye ali mu nsi Misiri. Era abantu bwe balimulirira nga bali kutuntuzibwa, alibatumira omuyambi yaabalwanirira era yaabawonia.

²¹ Ku lunaku olwo Musengwa Katonda alyeyoleka mu Bamisiri, baamumanha, baamusinza nga baghaayo emisengo n'ebigheebwayo ebyokebwa. Balyeyama y'ali era baatuukiriza bye beeyamye.

²² Musengwa Katonda alibonereza Abamisiri, aye ate b'abonereiza alimala yaabawonia. Balikyukira y'ali baamusaba, era yaawulira okusaba kwaibwe yaabawonia.

²³ Olunaku olwo bwe lulituuka, ghalibaagho oluguudo oluva mu Misiri okuja mu Assiria. Abassiria baliidhanga mu Misiri, n'Abamisiri baajanga mu Assiria, era Abamisiri n'Abassiria balisinzizanga ghalala Musengwa Katonda.

²⁴ Olunaku olwo bwe lulituuka, ensi Isiraeli, ni Misiri, ni Assiria, dhiryazayaza ekitiibwa era dhaagheesa ensi yoonayoona enkabi.

²⁵ Musengwa Katonda Afuga Amagye alidhigha enkabi ng'akoba ati: “Misiri eighanga lyange, ni Assiria nze mwene lye natonda, ni Isiraeli lye nalondamu okuba eryange, gagheebwenga enkabi.”