Isaia 16 - Baibuli Ekibono kya Katonda 2014

Embeera mu Moabu emalamu amaani

¹ Abantu b'e Moabu baatoola entaama ento okuva mu kibuga Sela ekiri mu irungu, baadhigheereza ng'ekirabo, eri oyo afuga mu Yerusalemu.

² Abamoabu abo buti bali ku kifo abantu ghe basomokera omwiga Arunoni. Bali kupapala nga baguluka ng'oti n'enhonhi dhe babinze mu kisu ni dhisansaana.

³ Bali kukoba ab'omu Buyudaaya bati: “Mutughe ku magezi, mutukobere eky'okukola. Mukingirize akabi kalobe kututuukaku ng'oti n'omuti bwe gutaagho ekinsense mu kasana ghagati. Mutuleke twewogome mu kinsense ekyo. Ife tuli kunoonia bubudamo mutukweke aghantu ghe bataatubone.

⁴ Mutuleke tusenge mu nsi yaimwe, mutuwonie oyo ali kwenda okutuzikiriza; kuba oyo atunhigiriza alituusa ekiseera yaavaagho, yaalekera agho okutuzikiriza. Oyo atutyankirira n'ebigere aliva mu nsi yaife.

⁵ Olwo omuntu ow'oku lulyo lwa Daudi, alityama ku kityamo eky'obwakyabazinga, yaafuga abantu n'ekisa ng'abagonza obutalekera era nga tasaliriza. Aliba mwangu mu kukola ebituufu ng'akolera ku mazima.”

⁶ Aye ab'omu Buyudaaya bakoba bati: “Twawulira ira okwekuluntaza kw'Abamoabu, n'okwebona bonka. Era twidhi nga bwe beetwala okuba aba ghaigulu nga beepankapanka. Aye ebyo bye beesaakiriza nabyo bya bwereere.”

⁷ Abamoabu baliwowoola amaziga olw'okudaagadaaga okutakobeka, n'abantu boonaboona baawowoola ku lwa Moabu. Balirira nga baidhukiire emere enungi, ye baalyanga mu kibuga Kiriharesethi era balituuka n'okuwaamu eisuubi.

⁸ Amasamba g'e Heshiboni gakaze, n'emizabbibu gy'e Sibima gyona gikaze, gye baakunhangamu omwenge ogwatamiizanga abafuzi b'amaghanga. Amasamba g'emizabbibu egyo nga gaja gaatuukira irala e Yezeri, gaava eyo gaatuuka ku irungu, era gaava eyo gaabitira ku luuyi olundi, gaatuuka ere ku Nhandha Eyomuunhu.

⁹ Mpegaano ndi kulira olw'emizabbibu egy'e Yazeri era naalira n'emizabbibu egy'e Sibima; era ndi kumagaza amaziga olwa Heshiboni ni Eleale, kuba amakungula g'ebibala byaimwe gamiriibwa olutalo.

¹⁰ Tighakaaligho muntu asanhukiraku mu masamba ago amagimu, waire okwemberaku enhembo mu mizabbibu, oba okwasiikaniramu. Ghazira akunha mizabbibu kugikolamu mwenge, era emizira gy'abakunhi ngikomiiza.

¹¹ Kyenva ni ngegenga olwa Moabu, era ni ndira enaku olwa Kiriheresi.

¹² Abamoabu beekooyeza bwereere okuja mu bifo ebigulumivu bye basinzizaamu, okusaba emisambwa gyaibwe. Ghazira kye baliganhulwamu naire.

¹³ Obwo n'obukwenda obugema ku Moabu, Musengwa Katonda bwe yayogera.

¹⁴ Aye mpegaano Musengwa Katonda akoba ati: “Mu myaka esatu gyonka, ebitiibwa bya Moabu biriba nga tibikaaligho. Ku bantu baakyo waire nga bangi batyo, batono bati n'abalisigalagho ate nga tibakaali na maani naire.”