Isaia 15 - Baibuli Ekibono kya Katonda 2014

Katonda alizikiriza Moabu

¹ Buno n'obukwenda obugema ku Moabu. Ebibuga Ari ni Kiri ebya Moabu babizikiriiza mu bwire bulala buti byafuuka bifunfugu, era ensi Moabu yaawolongera.

² Abantu b'e Diboni baniinieniinie, baaja mu bifo ebigulumivu bye basinzizaamu ku busozi, baalirira eyo amaziga. Abamoabu bali kuwowoola amaziga olw'ebibuga Nebo ni Medeba. Basazeeku enviiri ku mitwe gyaibwe baadhimaliriraku ng'oti mpaata, baasalaku n'ebirevu okwoleka nga bwe bali mu nnaku.

³ Abantu boonaboona mu nguudo bavaire kutiya olw'enaku; n'abali ghaigulu ku ndhu ni mu mpya edh'ekibuga bali kumagaza maziga meereere nga bawowoola.

⁴ Ab'omu Heshiboni n'ab'omu Eleale bali kukuba bwa mpungu, era amamiro gaibwe gawulikika okutuukira irala e Yahazi. Abaisirukale ba Moabu bali kulira nga baasiikana, n'amaani gabawoiremu.

⁵ Omwoyo guli kuunumira ensi Moabu. Abantu baayo balumukiire e Zoari ni mu Egulathi Shelishiya. Abandi baniinieniinie baaja e Luhithi nga bali kulira amaziga. N'abandi baagema engira ey'e Horonaimu, nga bali kuwowoola ebitaloodheka.

⁶ Akaiga Nimurimu kakaze, eisubi ku mbali kwako liniaire, ghazira ito likaameraku naire, n'ebimera byonabyona biweekereiregho.

⁷ Abantu bali kubitira mu kyetebwa Ekiiko ky'obuti obukulira ku mbali kw'omwiga, nga batwala ebintu byaibwe ebingi bye babaire nabyo ni bye baatereka.

⁸ Ensi Moabu yoonayoona eidhwire kuwowoola maziga, era okuwowoola okwo kuwulikika okutuukira irala mu kibuga Egulaimu, era kwatuuka ni mu kibuga Beerelimu.

⁹ Amaadhi g'e Diboni gaidhwire musaayi, aye era nze Musengwa Katonda ndireetayo n'akabi akandi ku bantu baayo: Empologoma dhirirya Abamoabu boonaboona abaliba basigairegho nga bawoniegho.