Isaia 13 - Baibuli Ekibono kya Katonda 2014

Katonda alibonereza Babiloni

¹ Buno n'obukwenda obugema ku Babiloni, Isaia mutabane wa Amozi bwe yafuna mu kubonekerwa.

² “Mughanike bendera ey'olutalo ku lusozi oluziraku isubi naire. Mukaabuke mwete abaisirukale, mubaghemye n'emikono baje ku miryango gy'ekibuga ekirimu abakungu, bakirumbe bakingire.

³ Nze Musengwa Katonda mwene ninze ndagiire abalonde bange, abalwani bange abo ab'amaani mbeese okubonereza abo be nsungughaliire.”

⁴ Muwulire akasasamalo akali ku lusozi ng'oti n'amamiro ag'olukunkumuli lw'abantu. Muwulire okwasiikana okw'obwakyabazinga, okwasiikana okw'amaghanga agali kwesoloza. Musengwa Katonda Afuga Amagye ali kusoloza eigye okulwana olutalo.

⁵ Bava mu maghanga ag'eghala ere ensi y'ekanga. Musengwa Katonda ali kwidha n'obusungu okuzikiriza ensi yoonayoona.

⁶ Muwowoole amaziga kuba olunaku lwa Musengwa Katonda luli kumpi; olunaku oyo Aghanga Ebintu Byonabyona lw'alireeteraku okuzikirira.

⁷ Emikono egya buli muntu girinafugha, abantu boonaboona emyoyo gyabatekemuka.

⁸ Abantu baliidhula okutya baaba n'obulumi, ng'oti n'omukazi ali kulumwa okuzaala. Baliringaganaku mu kutya, nga buli muntu ensoni dhimugemye.

⁹ Bona, olunaku lwa Musengwa Katonda luli kwidha! Ku lunaku olwo aliraga ekiruyi n'obusungu obubitiriire, yaaleka ensi ng'eri bwa bifulukwa byereere era yaasaaniagho abakozi b'ebibi boonaboona mu nsi.

¹⁰ Emuunienie edha buli nsambo ku igulu dhirirekera agho okwaka, endhuba yaagema enzikiiza ng'eri kuvaayo, n'omwezi gwaloba kwaka.

¹¹ Musengwa Katonda akoba ati: “Ndisindika ekibamba ku nsi, naabonereza abantu olw'ebibi byaibwe. Ndiisa ghansi abo abeetwala okuba aba ghaigulu, naabonereza abo abeekuluntaza n'abakola ebikolwa eby'obukambwe.

¹² Abo abaliwonagho ndibafuula ba mughendo okusinga zaabu omukenenule; bwenebwene baliba ba ibula okusinga ni zaabu omulungi ow'e Ofiri.

¹³ Ku lunaku nze Musengwa Katonda Afuga Amagye lwe ndiragiraku obusungu obubitirivu, ndidhugumiza eigulu, n'ensi yaaseetuka okuva mu kifo kyayo.

¹⁴ Olunaku olwo bwe lulituuka, abasenze abaliba mu Babiloni balirumuka okwirayo ewaibwe, ng'oti n'empuli dhe bali kuyiiga, era baasansaana ng'oti n'entaama edhiziraku mwayi, buli muntu yaira mu bantu be.

¹⁵ Kiisi ye baligwikiriza alifumitibwa, na kiisi ye baligemyaku aliitibwa n'empiima.

¹⁶ Abaana baibwe abaghere balibakuba ghansi, baabamanhiangula okutuusa okufa, nga balingiriire bulingirire. Endhu dhaibwe balidhinhagululamu ebintu, ni bakazi baibwe baabagema baabakaka.”

¹⁷ Musengwa Katonda akoba ati: “Bona, nja kubaghendulira Abamedi abatafa ku feeza waire okusendebwasendebwa ni zaabu, baidhe babalumbe babalwanise.

¹⁸ Balikozesa obulaso bwaibwe okutirimbula abaisuka, aghazira kusaasira baana bato, waire okusonigha abaana abaghere.

¹⁹ Waire obwakyabazinga bwa Babilonia n'obusingamu okuba obw'ekitiisa era obweyagaza inho abantu baayo, nze Musengwa Katonda ndibuzikiriza ng'oti ni bwe nazikiriza Sodoma ni Gomorra.

²⁰ Tikiriiramu kabiri kubaamu bantu. Tighalibaagho Muwarabu asimbayo weema, waire okubaagho omwayi ayayirayo ebyayo bye.

²¹ Ensolo edh'omu nsiko n'edhinaabanga eyo, n'endhu dhaabyo dhinaidhulanga ebintu ebirira. Era maaya dhinaabanga eyo, n'emisambwa gyakiniranga eyo.

²² Empiti dhinaabwigukiranga mu minaala gyayo, n'ebibe byaboigokeranga mu ndhu dhaayo enkalamu. Ekiseera kya Babiloni eky'enkomerero kituuse! Enaku dhaakyo dhinaatera okuwaaku!”