Isaia 10 - Baibuli Ekibono kya Katonda 2014

¹ Mukagwireku imwe abataagho amateeka agatakolera ku mazima, ni mutaagho ebighandiiko ebireetera abantu okutuntuzibwa.

² Mulemesa abanaku okusalirwa emisango mu mazima, mwalemya abaavu okukolerwa ebituufu bye bagwaniire, mwanhaga ebintu bya banamwandu, n'ebya bamulekwa mwabinhaagaana.

³ Mulikola mutya ku lunaku Musengwa Katonda lw'alibabonerezaaku, n'abatuusaaku akabi akaliva mu nsi ey'eghala? Mulirumukira y'ani okubayamba? Era mulikweka gha obukombe bwaimwe?

⁴ Muliba nga muzira kindi kya kukola okutoolaku okutwalibwa mu busibe, oba okwitibwa mu lutalo. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaagalwire omukono gwe okubabonereza.

Katonda akozesa kyabazinga w'Assiria okubonereza

⁵ Musengwa Katonda yaakoba ati: “Assiria, n'omwigo gwe ngema nga nsungughaire, gwe nkozesa okubonereza abo be ndiku n'ekiruyi.

⁶ Ndituma Assiria oyo okulumba eighanga eritantya, era naamulagira okulwanisa abantu abandeeteire okusungughala. Ndimutuma yaanhaga ebintu by'abantu abo, era yaabatyankirira ng'oti bityanka bya mu nguudo.

⁷ Aye nze bye nhenda Assiria oyo akole, ti n'ebiri mu ntegeka dhe, era bizira mu bidhuubo bye naire. By'alowoozaaku n'okuzikiriza n'okusaaniagho amaghanga kamaala.

⁸ Yeesuuta ati, ‘Kiisi muduumizi wa magye gange yeenayeena, aba kyabazinga mulamba.

⁹ Naghangula ekibuga Kalino ng'oti ni bwe naghangula ekibuga Karikemishi, naaghangula ni Hamathi ng'oti ni bwe naghangula Arupadi, era naaghangula ni Samaria ng'oti ni bwe naghangula Damasiko.

¹⁰ Era naghaguza naalumba ensi dha bakyabazinga edhisinza ebifaananie ebibaadhe ebikologho okusinga n'ebyo ebyali mu Yerusalemu ni mu Samaria.

¹¹ Nga bwe nazikiriza Samaria n'ebisinzibwa byamu ebitali Katonda, era ntyo bwe ndizikiriza Yerusalemu n'ebifaananie byamu ebisinzibwa.’

¹² “Aye Musengwa Katonda akoba ati: ‘Bwe ndimala okukola ekyo kye ndi n'okukola ku Lusozi Sioni ni ku Yerusalemu, ndibonereza kyabazinga w'e Assiria olw'okwesuuta n'okwekuluntaza.’”

¹³ Kyabazinga oyo yeesuuta ati, “Ebyo nze nabikola lwa maani gange, na lwa magezi gange, kuba ndi mugezigezi. Namala okutoolagho ensalosalo edh'amaghanga, naanhagulula eby'obukombe byago, naadhooga abantu baago, naabatoola ku bityamo eby'obwakyabazinga ng'oti nte nume etyankirira isubi.

¹⁴ Nayagaana amaghanga nga gali ng'oti kisu kya nhonhi, naasoloza obukombe bwago ng'oti n'ali kusoloza amagi ge balese obwagho, nga ghazira na nhonhi epapazaaku ighagha kuntiisa, waire okwasamya omunwa n'ekyolya okunzindula.”

¹⁵ Aye Musengwa Katonda akoba ati: “Empasa esobola okwesuuta eti n'esinga ole agitemesa? Oba, omusumeeni gusobola okwekuluntaliza ku muntu ali kugusaza? Ate oba oluga ti n'oluwuuba ole alugemye, oba omwigo okubbeeda omuntu atali kiti!”

¹⁶ Kale ni, Musengwa Katonda Afuga Amagye alisindika obulwaire bwagoogombya abalwani ba kyabazinga w'Assiria abageedhu obukalamu, yaabaleetera okukyemuka mu mibiri ng'oti bwa muliro.

¹⁷ Musengwa Katonda oyo eitaala lya Isiraeli aliba omuliro, Katonda oyo Omutukuvu wa Isiraeli yaaba enimi edh'omuliro; ogulyokya ni gusaaniagho mu lunaku olulala, abo boonaboona abali ng'oti n'amawa n'enkandwa.

¹⁸ Musengwa Katonda alizikiriza ebibira ebyesiimisa Assiria, n'amasamba amagimu, ng'oti n'obulwaire namusiza bwe bugoogombya omuntu n'aweekereragho.

¹⁹ Emiti egirisigalagho mu kibira ekyo giriba mitono inho, nga n'omwana omuto asobola okugibala.

Abatono abaliwonagho ku Baisiraeli baliira

²⁰ Mu kiseera ekyo, Abaisiraeli baidhukulu ba Yakobo abalisigalagho nga n'abawoniegho, baliba nga tibakeesiga ighanga eryo eryabaghangula, aye nga mu mazima beesiga Musengwa Katonda, Omutukuvu wa Isiraeli.

²¹ Abatono abo abaliwonagho, baliira eri Katonda ow'amaani.

²² Waire nga mpegaano Abaisiraeli bali kamaala ng'oti n'omusenho bwe guba ku mbali okw'enhandha, aye batono abaliwonagho ni baira. Katonda yasalagho bazikirizibwe, ng'ekyo n'ekibagwaniire.

²³ Bwenebwene Musengwa Katonda Afuga Amagye aja kuleeta okuzikirira mu ighanga lyonalyona, nga bwe yategeka okukola.

Musengwa Katonda alibonereza Assiria

²⁴ Kale Musengwa Katonda Afuga Amagye akoba ati: “Imwe abantu bange ababa mu Sioni, mutatya Bassiria bwe babaswanhula era ni babakuba emiigo ng'Abamisiri bwe baakolanga

²⁵ kuba akaseera kasigaireyo katono inho, ndekere agho okubabonereza imwe, obusungu bwange mbwolekeze beene, mbazikirize.

²⁶ Nze Musengwa Katonda Afuga Amagye ndibakuba abo naababonereza nga bwe naitira Abamidia ku lubaale lw'e Orebu. Ndiita Abassiria abo nga bwe naitira Abamisiri mu nhandha.

²⁷ Olunaku olwo bwe lulituuka, imwe ndibatoola mu buyinza bw'Abassiria, naabatwikula n'obuzito bwe baabatwikanga, naazikiriza ebikoligo ebibali ku mabega.”

Omuzigu aidha okulumba

²⁸ Omuzigu atuuse mu kibuga Ayi, yaabitira mu Miguroni, era ebintu bye yaabitereka e Mikamashi.

²⁹ Bamaze okubita aghaingirirwa, baaja baasula e Geba. Ab'omu kibuga Rama bali kudhugumira olw'okutya, ab'omu kibuga kya kyabazinga Saulo eky'e Gibea balumwike.

³⁰ Mwasiikane imwe ab'e Gallimu! Muntegere kutu imwe ab'e Laisha! Mundhiremu imwe ab'e Anathothi!

³¹ Ab'e Madumena balumwike, n'ab'e Gebimu bali kunoonia ye banaalumukira okuwona.

³² Olwaleero omuzigu aidha kuba e Nobu, ali kwesoomera Olusozi Sioni nga yeesumba ekibuga Yerusalemu.

³³ Bona eno, Musengwa Katonda Afuga Amagye alibaghanulayo ng'oti n'olusaga olutemeibwa ku muti ni lugwa. Abaleeyi abaawaiguka alibasuula ghansi, n'abeetwala okuba aba ghaigulu yaabaisa.

³⁴ Musengwa Katonda alibatema n'empasa ng'oti n'atema emiti mu kibira ghagati, n'agwisa n'emiti emirungi egy'e Lebanoni.