Isaia 1 - Baibuli Ekibono kya Katonda 2014

¹ Buno n'obukwenda obugema ku Buyudaaya ni Yerusalemu, Katonda bwe yagha Isaia mutabane wa Amozi mu kubonekerwa. Yabumugha mu kiseera eky'obufuzi bwa bakyabazinga ba Buyudaaya bano: Uzzia, ni Yothamu, ni Ahazi, ni Hezekia. Musengwa Katonda yaakoba ati:

Katonda avumirira abantu be

² “Iwe eigulu wulira n'iwe ensi tega kutu, muwulirise bye nkoba. Abaana be nalera ni nkuza, bandheemeire.

³ Ente emanha mwene yo, n'endogoyi yaamanha ekintu musengwa waayo mw'agigheera eby'okulya; aye abantu bange Abaisiraeli okumanha okwaibwe tikutuuka agho, era abantu bange abo baziramu kategeera naire.”

⁴ Okagwireku iwe eighanga eikozi ly'ebibi, abantu aboonooni imwe, abaidhukulu ab'abakozi b'ebibi imwe, era abaana aboonoonefu. Muviire ku Musengwa Katonda, mwamunhooma Omutukuvu wa Isiraeli oyo, mwamwetooleraku irala.

⁵ Iwe Buyudaaya, lwaki oyongera okuba omudheemu otyo? Oyenda bongere okukubonereza? Omutwe gwo gwonagwona gwidhwire bibwa byereere, n'omwoyo gwo gwazirika.

⁶ Okuviira irala ku mutwe okutuukira irala ku bigere ghaziraku ghalamu naire. Oidhwire bwa binuubulenuubule, na bikwadulekwadule, na bibwa ebiri kutiiriika omusaayi, ebitanaaziibwa waire okusibwaku ekighero, oba okuteebwaku obulezi.

⁷ Ensi yaimwe bagizikiriiza, n'ebibuga byaimwe baabyokya omuliro byasiriira; abantu abagwira balumbye ensi yaimwe; baaginhaga era baazikiriza n'ebigirimu nga mubona muti.

⁸ Ekibuga Sioni kisigaire agho kityo ng'oti n'ekibuga kye bazingiiza, kiri ng'oti n'entindi eyeewolookereire mu isamba ly'emizabbibu, era ng'oti n'ekigangu kye bakuumiramu enimiro y'amaliibwa.

⁹ Ngoli Musengwa Katonda Afuga Amagye tiyatulekeraghooku bantu batono abaawonagho, twandibaire ng'oti n'ab'e Sodoma, era twafaanana ng'oti n'ab'e Gomorra mu ebyo ebyabatuukaku.

¹⁰ Muwulirise Musengwa Katonda by'akoba, imwe abakulembeze ba Yerusalemu abali ng'oti n'ab'e Sodoma; mutege kutu imwe abantu abali ng'oti n'ab'e Gomorra, mwetegereze Katonda waife by'abeegeresa.

¹¹ Musengwa Katonda oyo akoba ati: “Emisengo gyaimwe olukunkumuli gye mughaayo, nze gingasa ki? Nsiniirwa entaama enume dhe mughaayo, n'amasavu g'ensolo dhaimwe empiite ge mughaayo ng'ebigheebwayo ebyokebwa. Nzira isanhu lye nfuna mu kumpa musaayi gwa nte nume, waire ogw'entaama n'ogw'embuzi enume.

¹² Naani eyabakoba okwidhanga mu maiso gange, ni mutyankirira empya dh'eisinzizo lyange?

¹³ Mulekere agho okuleetanga ebigheebwayo ebiziramu makulu. Obubbaani bwe muniokeza buneenhinhasa, oteeku n'Ebibinuko eby'Okuboneka kw'Omwezi bye mukuza, n'enaku dha Sabbato dhe mukuza, n'okwesoloza kwaimwe okw'okusinza. Tisobola kuguminkiriza bibi byaimwe, ni nguminkiriza na kwesoloza kwaimwe okwo okw'okusinza.

¹⁴ Tyendera irala mbaga dha bibinuko byaimwe eby'Okuboneka kw'Omwezi, waire edh'ebibinuko byaimwe ebindi ebyalagirwa. Mbyesiniirwa inho, era nkooye okubiguminkiriza.

¹⁵ Agho ni, bwe munaayandhuluzanga emikono gyaimwe nga muneeghemba, tiidhanga kubalingaku; ni bwe munansabanga einho mutya, tiidhanga kubawulirisa; kuba engalo dhaimwe dhisaabaine musaayi.

¹⁶ Munaabe, mutukule mukomye agho bye mukola nga mbona, ebitali bya butuukirivu. Mulekere agho okukolanga ebibi,

¹⁷ mwege okukolanga ebirungi. Mufubenga okukola mu butuufu, mulekezenga agho abantu okutuntuza banaibwe, mulwanirirenga bamulekwa era muwolerezenga banamwandu.”

¹⁸ Musengwa Katonda akoba ati: “Kale ni mwidhe twogere ku bintu ebyo twisanie. Ebibi byaimwe ni bwe biba nga byabamyusa bwe myu myu myu, ndidha kubanaaza mutukule ng'oti mugozi; era ebibi ebyo ni bwe biba nga byabafuula ba kasaayisaayi omugemu, ndidha kubaamula mube beeru ng'oti n'enhonhi dhe beeta enhange.

¹⁹ Bwe munaabanga abagonvu era abawulize, mwidha kulyanga ku bibala ebirungi ebiva mu nsi yaimwe.

²⁰ Aye bwe munaadheemanga obudheeme, mwidha kwitibwanga bwitibwe. Nze Musengwa Katonda, ninze ndhogeire.”

Ekibuga ekikozi ky'ebibi

²¹ Kyewuunhisa okubona ng'ekibuga ekyalinga ekyesigwa, kifuuse ng'oti malaaya. Ate nga kyaidhulangamu abantu abakola amazima, era kyabangamu abantu abatuufu. Aye mperaano kirimu batemo beereere.

²² Iwe Yerusalemu wali wa mughendo ng'oti feeza, aye mperaano ozira mugaso ng'oti iseedha buseedha; wali mulungi ng'oti mwenge gwa mizabbibu, aye mperaano oli ng'oti maadhi buudhi.

²³ Abakulembeze bo badheemu, era bagemagana na baibi. Buli muntu agonza kulya nguzi era yaagunirira okugheebwa ebirabo. Tibalwaniriraku bamulekwa, waire okuwulirisa ensonga banamwandu dhe babaleetera.

²⁴ Kale ni Musengwa Katonda Afuga Amagye, Katonda oyo owa Isiraeli Aghanga Ebintu Byonabyona, akoba ati: “Ha, imwe abazigu bange ndidha kubamaliraku obusungu bwange, era mbeesasuulizeeku imwe abantakania.

²⁵ Ndidha kubakolaku, mbasaanuuse ng'oti bwe basaanuusa ekyuma, era mbakenenule mbamaliremu irala ebidomboodo byonabyona ebibalimu.

²⁶ Ndidha kubairizaagho abakulembeze abakalamu ng'oti ni bale abaasooka, mbairizeegho n'abawi b'amagezi abakalamu ng'oti ni bale be mwasooka nabo. Olwo Yerusalemu baliiramu okukyetanga ekibuga eky'abantu abatuufu era ekibuga eky'abantu abeesigwa.”

²⁷ Olw'okuba Musengwa Katonda akolera ku mazima era nga mutukuvu, alinunula Yerusalemu n'abantu baamu boonaboona abeenenia.

²⁸ Aye alizikiriza abo abamudheemera n'abo abakola ebibi, era yaasaaniagho abo abamuvaaku.

²⁹ Ensoni dhiribagema imwe olw'emiti emikologho gye mwasinzanga, n'olw'enimiro dhe mwasengangamu emisambwa.

³⁰ Muliba ng'oti n'omuti omukologho oguniala amakaba, era mwaba ng'oti n'enimiro etafuna ku maadhi naire.

³¹ Ab'amaani baliba ng'oti isubi ikalu, ate ebibi bye bakola byaba ng'oti nnimi dha muliro, olwo baliyiira ghalala nabyo, era ghaabulagho n'omuntu asobola okulobera okuzikirizibwa kwaibwe.