Hosea 9 - Baibuli Ekibono kya Katonda 2014

Hosea alangirira ekibonerezo ky'Abaisiraeli

¹ Imwe Abaisiraeli, mulobe kusagamba waire okuba abasangaavu ng'oti n'abantu abatatya Katonda; kuba mwaloba okuba abeesigwa mwava ku Katonda waimwe. Mwasanhukira inho engaano eva mu bifo aghakubirwa engaano, nga mulowooza muti eyo n'empeera emisambwa ye gibagha olw'okwetunda ye giri nga bamalaaya.

² Aye mu bifo aghakubirwa engaano ghaidha kulekera okuvaagho engaano ebamala, ni mu bikunhiro by'omwenge ogw'emizabbibu mulekere okuvaamu omwenge ogw'emizabbibu omusu.

³ Imwe Abaisiraeli, timulisigala mu nsi yange nze Musengwa Katonda. Aye muliirayo kabiri mu nsi Misiri, mwaja ni mu nsi Assiria, ye muliriiranga emere etali nongoofu.

⁴ Nga muli mu nsi edho edh'abamaghanga agandi, timulisobola kugheereza Musengwa Katonda mwenge gwa mizabbibu ng'ekigheebwayo ekifukibwa, waire okumusiimyanga n'emisengo gyaimwe. Emere yaimwe erireeteranga kiisi bantu abaligiryangaku okufuuka abatali balongoofu, ng'oti n'abaliiriire emere aghali omufu. Emere eyo baligiryanga lwa kubamalaku ndhala kyonka. Tibaligitwalanga kugighaayo mu isinzizo lya Musengwa Katonda.

⁵ Mulikola mutya ku nnaku edh'ebibinuko ebyalagirwa, enaku edh'okukuza embaga ya Musengwa Katonda?

⁶ Okuzikirira bwe kulituuka ni kubasansaania, Abamisiri balibasoloza imwe baabaziika e Menfisi. Aghaali eby'obukombe byaimwe ebya feeza ghalimeragho bisaka, n'aghaali weema dhaimwe ghaameregho amawa.

⁷ Ekiseera eky'okubonerezebwa kituuse, ekiseera ekya buli muntu okufuna ekimusaana. Mulikoba muti: “Omulanzi ono musiru,” era muti: “Omuntu ono aliku omwoyo gwa Katonda, mulalu.” Mukoba mutyo, kuba ebibi byaimwe bingi inho, n'obukyayi bwe muli nabwo bubitirivu.

⁸ Nze, ninze omulanzi Katonda ye yatuma, ndabule abantu be Abaisiraeli. Aye buli ghe nja bantega emitego mu ngira ng'oti nhonhi. Ni mu isinzizo lya Katonda lyene, mwona abantu baba bazigu ba mulanzi.

⁹ Beeyonoine inho ng'oti bwe beeyonoona e Gibea. mu biseera ebyabita. Aye Katonda talyerabira bibi byaimwe, alibabonereza olw'okwonoona kwaimwe.

Abaisiraeli n'ebija okubaviira mu bibi byaibwe

¹⁰ Musengwa Katonda akoba ati: “Nayagaana ensi Isiraeli ng'oti n'ole bw'ayagaana emizabbibu egiri kukulira eyo mu irungu. Era naabona badhaadha baimwe ng'oti n'ole bw'abona ebibala eby'omutiini ebisooka okwenga mu mwaka. Aye bwe baatuuka ka lusozi Peori baatoolera okusinza omusambwa Baali, olwo baafuuka ekyenhinhalwa ng'oti n'omusambwa gwene ogwo gwe baasinzanga bwe gwali.

¹¹ Kale ni ekitiibwa kya Isiraeli kirigulukagho ng'oti nhonhi edhiguluka. Tighalibaagho mukazi azaala, waire ali nda, waire atoola nda.

¹² Aye ni bwe balizaala abaana, era ndibabatoolaku boonaboona ghaaloba kusigalagho waire omulala ati omulamu. Lwe ndibavaamu ni mbalekulira agho, baliba bakagwireku!”

¹³ Wo Musengwa Katonda, ndi kubona abaana ba Isiraeli, ng'abazigu bali kubayiiga bwe babaita.

¹⁴ Kiki kye mbe mbasabire iwe obaghe? Kale baghe okutoolanga enda eno nga bwe dhivaamu, oleetere n'amabeere gaibwe obutabaamu mata.

Musengwa Katonda asalira Isiraeli omusango

¹⁵ Musengwa Katonda akoba ati: “Baatandiikira Giligali okukola ebibi. Era eyo nze ye natandiikira okubakyagha. Kale ni ndibabinga mu nsi yange olw'ebibi bye bakola. Tiriiramu kabiri kubagonza. Abakulembeze baibwe boonaboona bandheemera.

¹⁶ Abaisiraeli bali ng'oti kisimbe kye batemye emizi ni gikala, ni kitataaku bibala. Boona tibalizaala baana. Aye era ni bwebandizaire, nandiise abaana baibwe abo abagonzi.”

Omulanzi ayogera ku Isiraeli

¹⁷ Katonda wange alirekulira agho abantu be, kuba baaloba okuwulira by'abakoba. Balitambulatambula eyo batyo mu maghanga agandi.