Hosea 8 - Baibuli Ekibono kya Katonda 2014

Musengwa Katonda avumirira Abaisiraeli olw'okusinza ebitali Katonda

¹ Musengwa Katonda akoba ati: “Mufuughe amagwala agalaalika olutalo! Abazigu bali kwidha okugwa ku nsi yange Isiraeli ng'oti nsega; kuba abantu bange Abaisiraeli baamenha endagaano ye nakola nabo, baadheemera amateeka gange.

² Waire bandirira bati, ‘Ife Abaisiraeli tukwidhi nga niiwe Katonda waife,’

³ aye Abaisiraeli abo baasuula ere ekintu ekyali ekirungi kyafuuka ng'ekitagasa. Abazigu kyebaliva ni bababingirira.

⁴ Baataagho bakyabazinga nga tibambuuziiza naku, era baataagho abakulembeze nga tibankobeire naku. Baatoola feeza waibwe ni zaabu waibwe, baamukolamu ebisinzibwa ebitali Katonda, ebija okubaleetera beene okuzikirira.

⁵ Nze nakyagha ekifaananie eky'ente ento eya zaabu, abantu b'omu Samaria kye basinza. Obusungu bwange buja kubatumbukiraku ng'oti muliro. Balirekera li okusinza ebitali Katonda, ni bafuuka abalungi?

⁶ Omuisiraeli omugheesi n'eyakola ekifaananie ekyo, aye nga ekifaananie ekyo ti Katonda. Kale ni kirimenhebwamenhebwa kyasigala bukutukutu.

⁷ Nga bwe baasiga empewo era balikungula kiwunga ow'amaani. Engaano nga tetaireeku bifaaganda, terivaamu mere naire. Aye ni bweyanditaireku ebifaaganda n'ebala, era abagwira n'abandigiriire.

⁸ Abaisiraeli boona bafuuse ng'oti n'abamaghanga agandi, era tibakaali na mugaso ng'oti n'entamu emenheike.

⁹ Baaja baatuuka ni mu Assiria nga bali ng'oti ndogoyi ya mu nsiko eri kutambulatambula eyo etyo yonka. Baamala baapangisa abamaghanga agandi okubakuuma.

¹⁰ Aye waire baapangisa abamaghanga agandi, nze ndibasololeza ghalala naababonereza. Era bali kumpi na kulira maziga, nga kyabazinga w'e Assiria atooleire okubatuntuza.

¹¹ Abaisiraeli ye bakoma okuzimba alutaari edh'ebigheebwayo ebyokebwa olw'ebibi, ye bakoma n'okwonoona.

¹² Ni bwenandibaghandiikiire amateeka gange nga gali nkumi na nkumi, era bandigalobye ng'oti tibagawulirangaku.

¹³ Benda inho okumpa emisengo, baaleeta emamba ng'omusengo era baamala baagirya. Aye nze Musengwa Katonda tibasiima, waire okwerabira ebibi byaibwe. Ndibabonereza olw'ebibi ebyo, nabasindika okubaizaayo kabiri e Misiri.

¹⁴ Abaisiraeli bazimbye endhu edh'omughendo aye baaneerabira nze eyabatonda. N'ab'omu Buyudaaya bongeire okuzimba ebibuga ebyezungulwirwa ebimante ebigumu. Aye ndisindika omuliro gwayokya ebibuga byaibwe, era gwasaaniagho ebifo byaibwe eby'okwewogomamu.”