Hosea 6 - Baibuli Ekibono kya Katonda 2014

Abantu beenenia bwa ku ngulu

¹ Abantu baja baakoba bati: “Mukole twire ye Musengwa Katonda. Waire nga mwene n'eyatuyuzayuza aye alituwonia; era waire nga n'eyatufumita aye alitunhiga ebibwa ebyo.

² Mu nnaku ibiri oba isatu alitwizaamu obulamu, twaba balamu mu maiso ge.

³ Ka tufube inho okumanha Musengwa Katonda. Okwidha kwe ye tuli kukakafu ng'oti bwire kukya. Aliidha ye tuli ng'oti maadhi matoigo, agagwa ni gafukirira ensi.”

⁴ Aye Musengwa Katonda akoba ati: Imwe Isiraeli ni Buyudaaya, mbakolere ki? Engeri ye mungonzaamu ya kiweeragho, ng'oti lufu lwa ku nkyo bwe luwaagho amangu, era ng'oti musulo bwegukala amangu.

⁵ Kyenva ni ntuma abalanzi ye muli, ni babaleetera obukwenda bwange obw'okubazikiriza era obubalumiriza imwe omusango. Kye mbendaku kibonekeragho ng'oti butangaavu.

⁶ Mbendaku okungonzanga obutalekera, aye ti misengo; n'okuumanhanga nze Katonda waimwe, okusinga okumpa ebigheebwayo ebyokebwa.

⁷ “Aye boona okufaananaku ni Adamu baamenha endagaano ye nakola nabo, baaloba kuba beesigwa ye ndi.

⁸ Gileadi kibuga kya bakozi ba bibi, era kiidhwire bitaba bya musaayi ogw'abantu be baise.

⁹ Ng'ekikuukuulu ky'abanhazi bwe kyeteega omuntu, ni bakabona boona batyo beeyimba, baatemula abantu ku ngira eja mu kifo ekitukuvu e Shekemu. Bwenebwene bakola ebibi ebyo nga bagendereire.

¹⁰ Mu Isiraeli mboinemu ekintu ekibi einho. Abantu bange abo ti beesigwa ye ndi naire. Bali ng'oti n'omwenzi era beereeteire okuba abatali balongoofu.

¹¹ N'imwe Abayudaaya mwena, ekiseera namala okukitaagho, eky'okubabonereza olw'ebyo bye mukola.”