Hosea 5 - Baibuli Ekibono kya Katonda 2014

¹ “Imwe bakabona muwulire kino! Imwe Abaisiraeli mufeeyo ku kye nkoba! Imwe ab'endhu ya kyabazinga mutege kutu! Omusango baligubasalira; kuba e Mizipa mwafuukira abantu ekizibu ng'oti mutego, e Tabori mweraliikiriza abantu ng'oti lutuula olutegeibwa,

² era e Shittimu mwatiisa abantu ng'oti kiina ekireeyi. Aye ndibabonereza imwe mwenamwena.

³ Nze ndidhi Abaisiraeli nga bwe bafaanana era tibasobola kuneegisaaku. Abaisiraeli abo tibabaire beesigwa naire, era bafuuse abatali balongoofu.”

Hosea abalabula beekuumenga obutasinza bitali Katonda

⁴ Ebikolwa byaibwe tibibaganha kukyuka kwira ye Katonda waibwe; kuba batwalirizibwa okusinza ebitali Katonda, baaloba okumanha Musengwa Katonda oyo.

⁵ Abaisiraeli abo okwekuluntaza kwaibwe kubabonekera ni ku maiso. Ebibi byaibwe biribaleetera okugwa, n'Abayudaaya boona baagwa ghalala nabo.

⁶ Ni bwebalija okunoonia Musengwa Katonda bagheeyo ku mbuzi, ni ku nte, ni ku ntaama dhaibwe ng'emisengo, tibalimuzuula gh'ali; kuba yabavaaku.

⁷ Tibabaire beesigwa naire ye Musengwa Katonda era bazaire abaana abatali babe. Aye tibaabite mu Kibinuko eky'Okuboneka kw'Omwezi, baja kuzikirira beene ghalala n'enimiro dhaibwe.

Olutalo ghagati gh'Abayudaaya n'Abaisiraeli

⁸ Mufuuwe endeka e Gibea! Mufuuwe amagwala e Rama! Era mukube enduulu edh'omu lutalo e Bethaveni! Mwete Ababenjamini baidhe mu lutalo.

⁹ Ensi Isiraeli erifuuka bifulukwafulukwa ku lunaku olw'okubonerezebwaku. Bwenebwene nangirira mu bika bya Isiraeli, nti kye ndikukoba kiri n'okutuukirira.

¹⁰ Musengwa Katonda akoba ati: Abakulembeze b'omu Buyudaaya, bafuuse ng'oti n'abantu abakyusa embibi ni banhaga eitaka lya banaibwe. Kale ndibamaliraku ekiruyi kyange ng'oti n'ali kubabboomaku amaadhi.

¹¹ Isiraeli bamutuntuza era baamusaliriza omusango gwamusinga, olw'okuba yaikiriza okukolera ku biragiro eby'abo abatandigwaniire kumulagira naire.

¹² Kale kyendiva ni nsaaniagho Isiraeli ng'oti n'ekintu ekiriiriibwa ebisiisa, ni mmaliragho irala Buyudaaya ng'oti n'ekintu ekivunze n'enhengere.

¹³ Isiraeli bwe yabona obulwaire bwayo, ni Buyudaaya n'ebona ebibwa byayo, Isiraeli eyo yaatumisa kyabazinga omukologho ow'e Assiria aidhe agiyambe. Aye nga tasobola kuwonia bulwaire obwo waire ebibwa ebyo.

¹⁴ Kale ndirumba Isiraeli ni Buyudaaya ng'oti mpologoma. Era nze mwene, ninze ndibayuzayuza, memale neejiira. Ndibaghaluudhania naabatwala nga ghazira n'asobola kubawonia.

¹⁵ Ndiirayo mu kifo kyange ye mba, okutuusa lwe baliikiriza ni baatula ebibi byaibwe era ni baanoonia ye ndi. Bwe baliba mu kudaagadaaga kwaibwe baliinoonia ye ndi.