Hosea 4 - Baibuli Ekibono kya Katonda 2014

Omusango Musengwa Katonda gw'alumiriza Abaisiraeli

¹ Imwe Abaisiraeli muwulire Musengwa Katonda by'akoba. Ghaligho omusango gw'ali kulumiriza abantu ababa mu nsi eno, kuba abantu b'omu nsi eno ti beesigwa era ti ba kisa, waire okutya Katonda.

² Balayira bye bataatuukirize, balimba, batemula, baiba, era baakola obwenzi. Okwiza emisango kweyongera bweyongere, era obutemo bubaagho buli kiseera.

³ Kale ni ensi eno erikala, na buli kiramu ekigiriku kyafa. Ensolo edh'omu nsiko, n'enhonhi edhiguluka, n'ebyenhandha, byonabyona birifa.

Musengwa Katonda alumiriza bakabona omusango

⁴ Musengwa Katonda akoba ati: “Ghatabaagho alumiriza bantu musango waire okubanenia, kuba imwe bakabona niimwe be ndi kulumiriza.

⁵ Imwe bakabona mugwa mu nsobi omusana n'obwire, n'abalanzi boona baakola n'ekirala ng'oti niimwe. Kale ni ndizikiriza Isiraeli inhaimwe.

⁶ Abantu bange bazikirira olw'okuba tibandidhi nze. Imwe bakabona mwaloba okuumanha nze, kale ni zeena ndibaloba okuba bakabona bange. Era nga bwe mwerabira amateeka gange nze Katonda waimwe, zeena nja kwerabira abaana baimwe.

⁷ Imwe bakabona ye mukoma okweyongera okuba abangi, ye mukoma n'okweyongera okwonoona ye ndi. Kale ni ndibaleetera okuswazibwa mu kifo eky'okuteebwamu ekinhagansi.

⁸ Mufuuka bakombe olw'ebyo ebigheebwayo abantu bange ku lw'ebibi byaibwe, kyemuva mwenda inho beeyongere okwonoona.

⁹ Ekibonerezo abantu kye balifuna, mwena bakabona kye mulifuna. Ndibabonereza olw'engeri dhaimwe embi, naabeesasuulizaaku olw'ebikolwa byaimwe ebibi.

¹⁰ Baliryanga era baalyanga aye nga tibaiguta. Era balikolanga obwamalaaya obw'omu masabo aye nga tibazaalagana naire; kuba banvaaku nze Musengwa Katonda baira ku kusinza bakatonda abandi.”

Musengwa Katonda avumirira okusinza ebitali Katonda

¹¹ Musengwa Katonda akoba ati: “Omwenge omusu n'oguwoze, gumala mu bantu bange okutegeera.

¹² Beebuuza ku bintu ebyakolebwa mu muti obuti. Omwigo obwigo n'ogubakobera bye benda okumanha. Bali ng'oti mukazi mwenzi: banvaaku nze Katonda waibwe, baadaaliima, baaja baasinza bakatonda abandi.

¹³ Baghaayo emisengo ku ngulu okw'ensozi enene, baaghaayo ebigheebwayo ku busozi obutono, ni ghansi gh'emiti emikologho emizibirivu, kuba ebinsense byagyo birungi. Baghala baibwe kyebava ni bakola obwamalaaya, ni bakazi baibwe ni bakola obwenzi.

¹⁴ Tiribonereza baghala baimwe nga bakoze obwamalaaya, waire okubonereza bakazi baimwe nga bakoze obwenzi; kuba n'imwe abasaadha beene muja n'abakazi bamalaaya ab'omu isabo, era mwabeeyimbaku mwaghaayo emisengo. Kale ni abantu abatategeera balizikirira.

¹⁵ Waire nga imwe Abaisiraeli timuli beesigwa ye ndi, Abayudaaya bagwananga baaloba kugwa mu nsobi eyo. Mutajanga kusinziza mu Giligali waire okusinziza mu Bethaveni. Era mutalayiranga muti, ‘Nga Musengwa Katonda bw'ali omulamu.’

¹⁶ Abaisiraeli bamagalavu ng'oti nte nto. Kale nze Musengwa Katonda nnaasobola ntya okubaliikiza mu kyayiro ekigazi, ng'omuntu bw'aliisa entaama ento?

¹⁷ Ebisinzibwa ebitali Katonda bipaaziiza Abaisiraeli. Kale ka basigale batyo.

¹⁸ Bwe bamala okutamiira beemalira mu bwenzi; baasanhukira ebibaswaza, okusinga ebyo ebibateesaamu ekinhagansi.

¹⁹ Empewo eribawungula yaaja nabo, era ensoni dhiribagema olw'emisengo gye baghaayo mu kusinza ebitali Katonda.”