Hosea 3 - Baibuli Ekibono kya Katonda 2014

Hosea n'omukazi atali mwesigwa

¹ Agho Musengwa Katonda yankoba ati: “Ja kabiri ogonze omukazi omwenzi ali n'omusaadha owundi y'ayenda. Omugonze nga nze Musengwa Katonda bwengonza Abaisiraeli, waire nga bakyuka baasinza bakatonda abandi era baasanhukira inho okughaayo emizabbibu egikaziibwa ng'ebigheebwayo eri bakatonda abo.”

² Kale naasasula omwandu gwa bitundu ikumi na bitaanu ebya feeza, ni kilo kikumi n'ataanu edha sayiri.

³ Naamukoba nti: “Oteekwa okumala ekiseera ekireeyi ng'oli wange. Otakola bwamalaaya waire okwenda omusaadha owundi, era zeena ntyo bwendidha okwebisa y'oli.”

⁴ Mu nsambo ng'oti n'eyo, Abaisiraeli boona balimala ekiseera kireeyi nga bazira kyabazinga waire omukulembeze, nga bazira misengo gye baghaayo waire okuba n'empango dh'amabaale edhisinzibwa, nga bazira bivaalo bakabona bye bakozesa mu kulagula waire okuba n'ebifaananie ebisinzibwa ebyetebwa terafimu.

⁵ Aye mu biseera eby'oluvainhuma abantu bange Abaisiraeli balikyuka, kabiri baira eri Musengwa Katonda waibwe n'eri Daudi kyabazinga waibwe. Baliiramu okutya Musengwa Katonda oyo, era baafunanga ebirungi ebiva y'ali.