Hosea 2 - Baibuli Ekibono kya Katonda 2014

¹ Kale mukobere Baisiraeli banaimwe, bamanhe bati “Bantu ba Katonda” era bati “Bagonzi ba Musengwa Katonda.”

Omukazi Gomeri atali mwesigwa

² Baana bange, mukobe ku inhaimwe, waire nga takaali mukazi wange, era nga zeena tikaali iba. Mumukobeku alekere okukola obwenzi n'obwamalaaya.

³ Bw'ataalekere ndidha kumwambulamu ebivaalo asigale madu ng'oti ni bwe yali ku lunaku lwe baamuzaaliraku. Ndidha kumufuula ng'oti irungu, abe ng'oti itaka ikalu ery'olubbalangu, era mmuleetere okufa endiwo.

⁴ Tija kusaasira baana be naire, kuba baazaalibwa mu bwamalaaya.

⁵ Inhaibwe yakola obwamalaaya, oyo eyabazaala yeebisa mu nsambo eswaza ng'akoba ati: “Ndidha kuja y'abagonzi bange, bampe emere, n'amaadhi, n'engoye empegheevu, n'edho edhaakolebwa mu buviiri bw'entaama, n'omuzigo ogw'ebibala eby'emiti emyoliva, n'eby'okunhwa.”

⁶ Kale ni ndidha kumukolera olukomera olw'amawa okumwezunguluza, era nzimbe ekimante okumwezunguluza abulwe gh'abita.

⁷ Alirumuukirira abagonzi be, aye talibaagaana. Alibanoonia, aye talibabona. Agho alikoba ati: “Ka nje ndhireyo ye baze wange eyasooka, kuba eyo nabanga bulungi okusinga bwendi mperaano.”

⁸ Tiyayatulaku naire ati ninze eyamughanga engaano, n'omwenge ogw'emizabbibu, n'omuzigo ogw'ebibala eby'emiti emyoliva. Waire okwatulaku ati ninze eyamudoomooleranga feeza ni zaabu bye yaghangayo mu kusinza omusambwa Baali.

⁹ Kale ni ndimutoolaku engaano yange n'omwenge ogw'emizabbibu mu biseera eby'amakungula. Era naamutoolaku n'engoye empegheevu, n'edho edhaakolebwa mu buviiri bw'entaama, dhe yavaalanga n'awona okuba amadu.

¹⁰ Ndimutoolamu ebivaalo yaaba madu mu maiso g'abagonzi be, ghaabulagho amutoola mu buyinza bwange.

¹¹ Ndirekeza ebintu byonabyona ebimuleetera okusagamba: embaga edh'ebibinuko bye byonabyona eby'Okuboneka kw'Omwezi, n'edha Sabbato, n'edh'ebibinuko bye ebindi byonabyona ebyalagirwa.

¹² Ndyonoonayonoona emizabbibu gye n'emiti gye emitiini, gye yakoba ati: “Gino n'empeera yange abagonzi bange ye bampa olw'okubagheerezanga.” Aye nze ndigireetera okuzika gyafuuka kibira. Era ensolo edh'omu nsiko dhiriidha dhaalya emizabbibu n'emiti emitiini egyo.

¹³ Ndimubonereza olw'okukuzanga ebibinuko by'omusambwa Baali era n'aguniokezanga obubbaani. Era ndimubonereza olw'okuvaala empeta n'ebyamadholobera, n'aja n'abagonzi be, olwo nze n'aneerabira. Musengwa Katonda n'akobye.

Musengwa Katonda agonza abantu be

¹⁴ Kale ni bona eno, ndimulembereza naamutwala mu irungu, naayogera naye mu kugonza okungi.

¹⁵ Eyo ye ndimugheera amasamba ge ag'emizabbibu. Era ekyetebwa Ekiiko eky'Ebizibu ndikifuula omulyango ogwingira mu kusuubira. Era ng'ali eyo aliiramu okumpulira, nga bwe yampuliranga mu buto bwe mu kiseera kye yaviiramu e Misiri.

¹⁶ Agho mu biseera ebyo aliiramu okundheta iba yaalekera agho okundheta Baali,

¹⁷ kuba tirimuganha kwiramu kabiri kwatula liina eryo.

¹⁸ Mu biseera ebyo ndikola endagaano n'ensolo edh'omu nsiko, n'enhonhi edhiguluka, n'ebyo ebyeghaluliza ku itaka, bibe nga tibikola kabi ku bantu bange. Era nditoolagho obulaso, n'empiima, n'eby'okulwanisa ebindi byonabyona mu nsi, olwo abantu bange babenga mu miraala.

¹⁹ Iwe Isiraeli, nze ndikwandhula waaba mukazi wange ebyanda n'ebyanda. Ndiba wa mazima era omutuufu y'oli, era ndikugonza n'ekisa obutalekera.

²⁰ Ndiba mwesigwa y'oli, era olwo olimanha nga ninze Musengwa Katonda.

²¹ Mu biseera ebyo nze Musengwa Katonda, ndiwulira okusaba kw'abantu bange Abaisiraeli, naalagira eigulu lyagwisa ku nsi amaadhi.

²² N'ensi eribaza engaano, n'emizabbibu, n'emyoliva.

²³ Ndita abantu bange mu nsi yaibwe, baaba bukalamu. Ndisaasira abo abaali beetebwa bati “Tibasaasirwa,” era abo abaali beetebwa bati “Timuli bantu bange,” ndibakoba nti: “Muli bantu bange.” Boona baliiramu bati: “Niiwe Katonda waife.”