Hosea 13 - Baibuli Ekibono kya Katonda 2014

Musengwa Katonda asalira Isiraeli omusango ogusembayo

¹ Mu biseera ebyabita, ab'ekika kya Efuraimu bwe baayogeranga, ng'ab'ebika ebindi mu Isiraeli badhugumira. Abaefuraimu abo baateebwangamu ekinhagansi. Aye nga bwe beereetera omusango olw'okusinza omusambwa Baali, bali n'okufa.

² Ni ye buli eno bakaaja mu maiso n'okukola ebibi, nga bakola ebifaananie mu kyuma ekisaanuusiibwa. Ebifaananie ebyo babikola n'obukugu mu feeza waibwe nga bigheesebwa bantu buntu. Agho baakoba abantu bati: “Mugheeyo emisengo eri ebifaananie ebyo.” Aye abantu basobola batya okunhwegera ebifaananie ebyo eby'ente ento bye bakola obukole?

³ Kale ni abantu abo baliwaagho ng'oti lufu lwa ku nkyo, era ng'oti musulo ogukala nga bukaali na nkyo. Baliba ng'oti musinsi empewo gw'efuuwa okuva ghe bakubira engaano, era ng'oti mwosi ogufuumuukira mu kituli ni gubulagho.

⁴ Musengwa Katonda akoba ati: “Ninze Musengwa Katonda waimwe eyabatoola mu nsi Misiri. Muzira Katonda wundi okutoolaku nze. Era muzira mulokozi wundi okutoolaku nze.

⁵ Ninze eyabalabiriranga nga muli mu irungu, mu nsi enkalu.

⁶ Aye bwe mwatuuka mu nsi enungi, ni mulya era ni mwiguta, olwo mwatoolera okwekuluntaza, mwaneerabira.

⁷ Kale ndibalumba ng'oti mpologoma, era naabwama ku mbali kw'engira ng'oti mpala, naabeeteega.

⁸ Ndibatuumiraku ng'oti n'ekisolo ekikambwe kye banhazeeku obwana bwakyo, naabayuzaamu ghabiri. Ndibakankamira nga muli gheene agho ng'oti mpologoma yeene, naabayuzayuzaamu bukutukutu ng'oti nsolo ya mu nsiko.

⁹ Ndibazikiriza imwe Abaisiraeli. Naani alisobola okubayamba?

¹⁰ Imwe mwaidha mwansaba muti, ‘Tughe kyabazinga, otughe n'abakulembeze.’ Aye mperaano kyabazinga waimwe ali gha abalokole? Abakulembeze baimwe boonaboona bali gha babalwanirire?

¹¹ Nabagha bakyabazinga nga ndiku obusungu, era naamala naababatoolaku nga ndiku ekiruyi.

¹² Ekibi n'omusango eby'Abaisiraeli byaghandiikibwa bukalamu, byateebwa mu iterekero.

¹³ Abaisiraeli abo bali n'omukisa ogw'okuba abalamu. Aye olw'obusiru bwaibwe tibasobola kugukozesa. Bali ng'oti mwana atuuse okuzaalibwa, aye n'aloba okufuluma mu nda ya inhina!

¹⁴ Tirinunula bantu bano kubatoola mu magombe, waire okubawonia okufa. Iwe Okufa, ebibamba by'osindikira abantu biri gha? Iwe Amagombe, okuzikiriza kwo kuli gha? Nze tikaali na kusaasira naire.

¹⁵ Abaisiraeli ni bwe baliba nga n'abali obulungi mu baganda baibwe, nze Musengwa Katonda ndisindika empewo yange ey'e buvandhuba eva mu irungu, yaidha yaakaza ensulo dhaibwe n'emiiga gyaibwe. Era erikokoobya ebintu byaibwe eby'omughendo byonabyona bye baatereka.

¹⁶ Ab'e Samaria balivunaanibwa omusango olw'okundheemera nze Katonda waibwe. Abazigu balibaitira mu ntalo, era abazigu abo balikuba abaana baibwe abaghere ku itaka, baabasekembula okutuusa okufa. N'abakazi baibwe abali enda balibasala amabunda baagaawuza.”